މާލޭ ސަރަހައްދުން އެކަނި ވެސް ހަށިވިއްކުމުގެ ވިޔަފާރިކުރާ 111 ތަނެއް ފާހަގަކުރެވިފައިވޭ: މިނިސްޓަރު އިހުސާން
މިތަންތަން ހިންގަމުންދަނީ މާސާޖް ޕާލާ، ސެލޫން ނުވަތަ އެނޫން ވެސް އެކި ނަންނަމުގައި
ހުޅުމާލޭގައި ފުލުހުން ކުރިއަށް ގެންދިޔަ ޚާއްސަ އޮޕަރޭޝަނެއްގައި މަގު ބަންދުކޮށްފައި- ފައިލް ފޮޓޯ
މާލޭ ސަރަހައްދުން އެކަނި ވެސް ހަށިވިއްކުމުގެ ވިޔަފާރިކުރާ 111 ތަނެއް ފާހަގަކުރެވިފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ހޯމަ ދުވަހު ހޯމް މިނިސްޓްރީއާއި އެ މިނިސްޓްރީގެ ދަށުން ހިންގާ އިދާރާތަކުންގެ މަސައްކަތްތަކާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އިހުސާން ވިދާޅުވީ މާލޭގައި އަދި މާލެސަރަހައްދުގައި ހަށިވިއްކުމުގެ ވިޔަފާރި ހިންގާ 111 ތަނެއް ފާހަގަކުރެވިފައިވާ ކަމަށެވެ. މިތަންތަން ހިންގަމުންދަނީ މާސާޖް ޕާލާ، ސެލޫން ނުވަތަ އެނޫން ވެސް އެކި ނަންނަމުގައި ކަމަށް މިނިސްޓަރު ވިދާޅުވިއެވެ.
މިނިސްޓަރު އިހުސާން ވިދާޅުވީ ބޭރުގެ ގައުމުތަކުން ހަށިވިއްކުމުގެ ވިޔަފާރިއަށް މީހުން ގެންނަނީ ޓޫރިސްޓު ވިސާގައި ކަމަށެވެ.
ހަށިވިއްކުމުގެ ވިޔަފާރި ހުއްޓުވުމަށް ކުރަމުންދާ މަސައްކަތްތަކަށް އިޝާރާތް ކުރައްވައި މިނިސްޓަރު އިހުސާން ވިދާޅުވީ ފިޔަވަޅު އެޅުމަށް މަސައްކަތް ކުރަމުންދާ ކަމަށާއި، ޕޮލިސީގެ ތެރެއިން ރާއްޖެއިން ބޭރުގެ މީހުން ޑީޕޯޓު ކުރަމުންދާ ކަމަށެވެ.
މާލޭ ސަރަހައްދުން އެކަނި ވެސް އެކިއެކި ނަންނަމުގައި ހަށިވިއްކުމުގެ ވިޔަފާރިކުރާ 111 ތަނެއް ފާހަގަކުރެވިފައިވާއިރު، ދޭތެރެދޭތެރެއިން ހަކިވިއްކާކަމުގެ ތުހުމަތުގައި ބައެއް މީހުން ހައްޔަރު ކުރެއެވެ. މަސާޖުޕާލާތަކާއި ސްޕާތަކުގެ ނަންނަމުގައި ހަށިވިއްކާ މައްސަލަ މިހާރު ވަނީ ވަރަށް ބޮޑުވެފައެވެ.
