"ޖަލަކްދިކްލާޖާ" ޝޯ ގެ ސީޒަން 10 އެއްގެ ޖަޖަކަށް މިފަހަރު ސްރީދޭވީ

"ޖަލަކްދިކްލާޖާ" ޝޯ ގެ ސީޒަން 10 އެއްގެ ޖަޖަކަށް މިފަހަރު ސްރީދޭވީ ކަޕޫރް ހަމަޖައްސާފައިވާ ކަމަށް އިންޑިއާގެ ބައެއް ނޫސްތަކުން ބުނެއެވެ.

ސްރީދޭވިއަކީ އަށްޑިހައިގެ އަހަރުތަކުގައި ފިޔަޖަހާލި، އެންމެންގެ ލޯބިލިބުނު މޮޅު އަންހެން އެކްޓަރެކެވެ. ސްރީދޭވީ ވަނީ އިންޑިއާގެ މަޝްހޫރު ފިލްމުތައް ކަމަށްވާ "ހިންމަތްވާލާ"، "ސަދްމާ" އަދި "ޖުދާއީ" ގައި އެކްޓް ކޮށްފައެވެ.

"ޖަލަކްދިކްލާޖާ" އަކީ މިހާތަނަށް އިންޑިއާގައި ވަރަށް މަޤުބޫލް ޝޯއެކެވެ. ނަމަވެސް "ޖަލަކްދިކްލާޖާގެ އެންމެ ފަހުގެ ޝޯ ވެގެންދިޔައީ އިންޑިއާގެ ބެލުންތެރިންނަށް އެހާ މަޤުބޫލް ޝޯއަކަށް ނޫނެވެ. 6 މަހަށް ކުރިއަށްގެންދިޔަ "ޖަލަކްދިކްލާޖާގެ ޝޯ އެއްކޮށް ހުއްޓާލައިފާނެ ކަމަށްވެސް އަޑުތަކެއް ފެތުރިފައިވަނިކޮށް "ޖަލަކްދިކްލާޖާ" ޝޯގެ ސީޒަން 10 އެއް ފައްޓާނެކަމަށް އިންޑިއާގެ ނޫސްތަކާއި ހަވާލާދީ ބައެއް ފަރާތްތަކުން ބުނެއެވެ.

"ޖަލަކްދިކްލާޖާ"ގައި ތަފާތު އެކި މަޝްހޫރު ބޮލީވުޑް އެކްޓަރުންވަނީ ޖަޖުކަން ކޮށްފައެވެ. ޖަޖުކަން ކޮށްފައިވާ ބޮލީވުޑް އެކްޓާރުންނަށް ބަލާއިރު މާދޫރީ ދިކްޝިތްއާއި ޝާހިދު ކަޕޫރުއާއި ޖޫހީ ޗާވްލާ ހިމެނެއެވެ.

"ޖަލަކްދިކްލާޖާ" ސީޒަން 10 އެއްގައި ސްރީދޭވީގެ އިތުރުން މަޝްހޫރު ބޮލީވުޑް އެކްޓަރެއް ކަމަށްވާ ގޯވިންދާ އާއި މަލައިކާ އަރޯރާ ޖަޖުކަން ކުރަންވަނީ ހަމަޖެހިފައެވެ.

"ޖަލަކްދިކްލާޖާ" ސީޒަން 9 ގައި ޖަޖުކަން ކޮށްފައި ވަނީ ކަރަން ޖޮހަރްއާއި ފަރާ ޙަންއާއި ޖެކޮލިން ފެނާންޑޭޒް އަދި ގަނޭޝްއެވެ.