އެޗްބީއޯގެ މަޤުބޫލު ސީރީޒް، ގޭމް އޮފް ތްރޯންސްގެ ކުރިއަށް އޮތް ސީޒަނުގައި މަޝްހޫރު އިނގެރޭސި ލަވަކިޔުންތެރިޔާ އެޑް ޝީރާން ފެނިގެން ދާނެކަން އެ ސީރީޒްގެ ޕްރޮޑިއުސަރުން ޔަޤީންކޮށްދީފިއެވެ.

ސައުތު ބައު ސައުތުވެސްޓް ފިލްމް ފެސްޓިވަލްގައި ވާހަކަ ދައްކަމުން، ގޭމް އޮފް ތްރޯންސްގެ ޕްރޮޑިއުސަރުން ކަމުގައިވާ ޑޭވިޑް ބެނިއޯފް އާއި ޑޭން ވީސް ބުނީ، އެ ސީރީޒްގައި އެޑް ޝީރާން ދައްކައިލުމަށް މަސައްކަތް ކުރާތާ ދުވަސްތަކެއް ވެފައިވާ ކަމަށެވެ.

މިކަން އެޑް ޝީރާންވެސް ވަނީ ކަށަވަރުކޮށްދީފައެވެ.

ސީރީޒްގެ ޕްރޮޑިއުސަރުންނާއި، އެޑް ޝީރާންވެސް މި ޚަބަރު ޔަޤީން ކޮށްދީފައި ވީނަމަވެސް، ގޭމް އޮފް ތްރޯންސްގައި އެޑް ޝީރާން ކުޅޭނީ ކޮން ކަހަލަ ރޯލެއް ކަމެއް އަދި ހާމަކޮށްފައެއް ނުވެއެވެ.

އެޑް ޝީރާން އަކީ މި ސީރީޒްގައި ފެނިގެންދާ މިއުޒިކީ ހަމައެކަނި ފަންނާނެއް ނޫނެވެ. އެގޮތުން، މިއުޒިކް ބޭންޑުތައް ކަމަށްވާ ކޯލްޑްޕްލޭ އާއި މަސްޓޯޑޮން އަދި އޮފް މޮންސްޓަރޒް އެންޑް މެން ގެ އިތުރުން، ސައިގަރ ރޮސް ގެ މެންބަރުންވެސް މީގެ ކުރިން މިސީރިޒްގައި ވަނީ ފެނިގެން ގޮސްފައެވެ.

މީގެ ތެރެއިން އޮފް މޮންސްޓަރޒް އެންޑް މެން އާއި، ސައިގަރ ރޮސްގެ މެންބަރުން މިއުޒކް ބޭންޑްތަކެއްގެ ގޮތުގައި މި ސީރީޒްގައި ދައްކައިދީފައި ވާއިރު، އެޑް ޝިރާންވެސް ފެނިގެންދާނީ އެފަދަ ރޯލަކުންކަން ނުވަތަ ނޫންކަންވެސް އަދި ހާމަކޮށްފައެއް ނުވެއެވެ.

ފަހަރުގައި މަސްޓޯޑޮންގެ މެންބަރުން ފަދައިން، އެޑް ޝީރާންވެސް ވައިލްޑްލިންގް ތަކެއް ނުވަތަ ވައިޓް ވޯކަރޒް ތަކެއްގެ ގޮތުގައިވެސް ފެނިގެން ދިއުމަކީ އެކަށީގެންވާ ކަމެކެވެ.

މީގެ އިތުރުން ޑޭވިޑް ބެނިއޯފް އާއި ޑޭން ވީސް ހާމަކޮށްފައިވާ ގޮތުގައި އަންނަ ޖުލައި މަހުގެ 16 ވަނަ ދުވަހު ރިލީޒް ކުރުމަށް ހަމަޖެހިފައިވާ ގޭމް އޮފް ތްރޯންސްގެ 7 ވަނަ ސީޒަންގައި ހިމެނޭނީ 6 އެޕިސޯޑެވެ.