އިންޑިއާގެ ޔޫޕީއައި ޕޭމަންޓްގެ ހިދުމަތް ލަންކާގައި ތައާރަފްކޮށްފި

އިންޑިއާގެ ޔުނިފައިޑް ޕޭމަންޓް އިންޓަފޭސް (ޔޫޕީއައި) ގެ މުއާމަލާތްތައް، ލަންކަންކިއުއާރް މެދުވެރިކޮށް ސްރީލަންކާއަށް ރަސްމީކޮށް ތައާރަފްކޮށްފިއެވެ.

ހޯމަ ދުވަހު މިޚިދުމަތް ވާޗުއަލް އިވެންޓެއްގައި ތަޢާރަފްކޮށްފައިވާއިރު، ރިއަލް ޓައިމް ޕޭމަންޓް ސިސްޓަމްގެ އަމާޒަކީ ސްރީލަންކާގައި ތިބި އިންޑިއާގެ ޓޫރިސްޓުންނަށް ޑިޖިޓަލް ޕޭމަންޓް އިތުރުކުރުންކަމަށް އިންޑިއާގެ ނޫސްތަކުން ބުނެއެވެ.

އިންޑިއާގެ އިންސްޓަންޓް ޕޭމަންޓް ޓެކްނޮލޮޖީ ޔުނިފައިޑް ޕޭމަންޓް އިންޓަފޭސް (ޔޫޕީއައި) ގެ ހިދުމަތް ސްރީލަންކާގެ އިތުރުން މޮރިޝަސްގައިވެސް ހަމަ އެ އިވެންޓްގައި އެއްފަހަރާ އިފްތިތާހުކޮށްފައިވަނީ އިންޑިއާގެ ބޮޑުވަޒީރު ނަރެންދުރަ މޯދީ އާއި ސްރީލަންކާގެ ރައީސް ރަނިލް ވިކްރަމަސިންހަ އާއި މޮރިޝަސްގެ ބޮޑުވަޒީރު ޕްރަވިންދު ޖަގްނައުތުގެ ވާޗުއަލް ކޮށެވެ.

ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) އިންޓަނޭޝަނަލް ޕޭމަންޓްސް ލިމިޓެޑާއި ލަންކަންޕޭ ޕްރައިވެޓް ލިމިޓެޑް ގުޅިގެން ކުރިއަށް ގެންދާ މި އިނީޝިއޭޓިވްގެ އަމާޒަކީ ހަލުވިކަމާއެކު މި ޚިދުމަތް ފުޅާކުރުން ކަމަށާއި، މި ޕްރޮގްރާމް ތައާރަފްކުރިތާ ކުޑައިރުކޮޅެއްގެ ތެރޭގައި 10،000 މާޗަންޓުން ޔޫޕީއައި ޕޭމަންޓް ބަލައިގެންފައިވާ ކަމަށް ރިޕޯޓްތައް ބުނެއެވެ.

އަދި 2024 ވަނަ އަހަރުގެ މާރޗް މަހުގެ ނިޔަލަށް މި އަދަދު 65،000 އަށް އަރާނެ ކަމަށާއި، މިކަމުގެ ސަބަބުން ލަންކާއާއި މޮރިޝަސްގައި ތިބޭ އިންޑިއާގެ ފަތުރުވެރިންނަށް ފައިސާ ދެއްކޭނެ ހައްލެއް ލިބިގެންދާނެ ކަމަށް އިންޑިއާގެ އޮފިޝަލުންނާއި ހަވާލާދީ ރިޕޯޓްތައް ބުނެއެވެ.

އިންޑިއާގެ އެކްސްޓާނަލް އެފެއާޒް މިނިސްޓްރީން ބުނީ އިންޑިއާގެ ބޮޑުވަޒީރު ނަރެންދުރަ މޯދީ އާއި ސްރީލަންކާގެ ރައީސް ރަނިލް ވިކްރަމަސިންހަ އަދި މޮރިޝަސްގެ ބޮޑުވަޒީރު ޕްރަވިންދު ޖަގްނައުތު ސްރީލަންކާ އާއި މޮރިޝަސްގައި ޔުނިފައިޑް ޕޭމަންޓް އިންޓަފޭސް (ޔޫޕީއައި) ގެ ހިދުމަތް ތައާރަފްކުރުމުގެ އިތުރުން ފެބްރުއަރީ 12 ވަނަ ދުވަހުގެ މެންދުރު ފަހު 1:00 ގައި ވީޑިއޯ ކޮންފަރެންސް މެދުވެރިކޮށް މޮރިޝަސްގައި ރުޕޭ ކާޑުގެ ހިދުމަތް ވެސް ބައްލަވާލައްވާނެ ކަމަށެވެ.

ރިއަލް ޓައިމް ޕޭމަންޓް ސިސްޓަމެއް ކަމަށްވާ ޔޫޕީއައި އަކީ މޯބައިލް ފޯނު މެދުވެރިކޮށް އިންޓަ ބޭންކް މުއާމަލާތްތައް ކުރެވޭނެ މަގު ފަހިކޮށްދިނުމުގެ ގޮތުން ނެޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) އިން އުފައްދާފައިވާ ސިސްޓަމެކެވެ.

ވިސާ ނުވަތަ މާސްޓާކާޑެއް ފަދައިން ރުޕޭ އަކީ ވެސް އިންޑިއާގެ ގްލޯބަލް ކާޑު ޕޭމަންޓް ނެޓްވޯކަކަށް ވާއިރު، ފިހާރަތަކާއި އޭޓީއެމް އަދި އޮންލައިން ޕްލެޓްފޯމްތަކުގައި ވެސް ގިނަ ބަޔަކު އެ ކާޑް ބަލައިގަނެއެވެ.

ސްރީލަންކާ އާއި މޮރިޝަސްގައި އިންޑިއާގެ ހިދުމަތް ތައާރަފްކުރުމުގެ މަސައްކަތް ކުރިއަށް ދަނީ ނިއު ދިއްލީއިން ދެ ގައުމާ އެކު އިގްތިސާދީ ގުޅުން ބަދަހިކުރަމުން އަންނަ ދަނޑިވަޅެއްގައި ކަމަށްވާއިރު، އޭގެ ސަބަބުން ސްރީލަންކާ އާއި މޮރިޝަސްއަށް ދަތުރުކުރާ އިންޑިއާގެ ރައްޔިތުންނަށާއި އިންޑިއާއަށް ދަތުރުކުރާ މޮރިޝަސްގެ ރައްޔިތުންނަށް ޔޫޕީއައި ސެޓްލްމަންޓް ގެ ހިދުމަތް ލިބޭނެ މަގު ފަހިވެގެންދާނެއެވެ.