މިފްކޯއިން ސަރުކާރު ކެންޑިޑޭޓުން ޕްރޮމޯޓްކުރުމަށް ޝިޔާމްގެ ދިފާއު- "މިފްކޯގެ ޕްރޮޑަކްޓް ޕްރޮމޯޓްކުރުމަށް މެންބަރު ވަޑައިގަތަސް އެ މެހެމާންދާރީ ލިބިވަޑައިގަންނަވާނެ"
ފޮޓޯ އާއްމުކުރުމުން އަމާޒުވި ފާޑުކިޔުންތަކަށް ފަހު މިފަދަ 5 ޕޯސްޓެއް މިފްކޯއިން ވަނީ ޑިލީޓުކޮށްލާފައި
މިފްކޯއިން ޕީއެންސީގެ ކެންޑިޑޭޓުންނަށް ހަދިޔާކުރާ ބްރޭންޑް ފޮށިތައް
މިފްކޯއިން ރައްޔިތުންގެ މަޖިލީހުގެ އިންތިޚާބުގައި ސަރުކާރު ހިންގާ ޕީއެންސީގެ ކެންޑިޑޭޓުން ޕްރޮމޯޓުކުރަނީ ނޫންކަމަށާއި އެއީ ޕްރޮޑަކްޓު ޕްރޮމޯޓްކުރުމަށް މެހެމާންދާރީ އަދާކުރަނީ ކަމަށް މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް ވިދާޅުވެއްޖެއެވެ.
މިނިސްޓަރު ޝިޔާމް މިހެން ވިދާޅުވީ މަސް ގަންނަ އަގު ދަށްކުރުމަށް ސަރުކާރުން ނިންމާފައިވުމާ ގުޅޭ ގޮތުން ސުވާލުކުރުމަށް މަޖިލީހަށް ހާޒިރުކުރެވުމުން، އިތުރު ސުވާލުގެ ވަގުތުގައި ދާންދޫ ދާއިރާގެ މެންބަރު ކުރެއްވި ސުވާލަށް ޖަވާބުދެއްވަމުންނެވެ.
މެންބަރު ޔައުގޫބް ވަނީ މިފްކޯއިން ޕީއެންސީގެ ކެންޑިޑޭޓުން ޕްރޮމޯޓްކޮށް މަސްދަޅު ބަހަމުންދަނީ ކޮން އުސޫލެއްގެ ދަށުންތޯ ސުވާލުކުރައްވާފައެވެ.
އެ ސުވާލުގެ ޖަވާބުގައި މިނިސްޓަރު ޝިޔާމް ވިދާޅުވީ މިފްކޯ އަށް މެންބަރު ޔައުގޫބު ވަޑައިގަތަސް، މިފްކޯގެ ޕްރޮޑަކްޓު ޕްރޮމޯޓްކުރުމަށްޓަކައި ހަމަ އެ މެހެމާންދާރީ ލިބިވަޑައިގަންނަވާނެ ކަމަށް ޤަބޫލުކުރައްވާ ކަމަށެވެ.
ޝިޔާމް މިފަދައިން ވިދާޅުވެފައިވާއިރު މިފްކޯ އިން ވަނީ ޕީއެންސީގެ ފަރާތުން ރައްޔިތުން މަޖިލިސް އިންތިޚާބުގައި ވާދަކުރާ ކެންޑިޑޭޓުންތަކަކަށް މަރުހަބާ ކިޔުމުގެ ގޮތުން "ފަސްމީރު" ބްރޭންޑުގެ އެކި ބާވަތުގެ މަސްދަޅާއި އެ ބްރޭންޑުގެ އެކި އުފެއްދުންތައް ހިމަނާފައިވާ ފޮއްޓެއް ހަދިޔާކޮށްފައެވެ. އަދި މި ފޮށި ހަދިޔާކުރާ މަންޒަރު ފެންނަ ފޮޓޯ ވެސް މީސްމީޑިއާގައި ހިއްސާކޮށްފައެވެ. މި ކަމަށް އާއްމުންގެ ފާޑުކިޔުން ރައްދުވުމުން މިފްކޯ އިން ވަނީ އެ މަންޒަރުތައް ޑިލީޓްކޮށްފައެވެ. މީގެ ކުރިން މި ތުހުމަތުތަކާއި ގުޅޭގޮތުން ފިޝަރީޒް މިނިސްޓްރީން އެއްވެސް ޖަވާބެއް ދީފައެއް ނުވެއެވެ.
