ދައުލަތުން ވިޔަފާރިއާ ދުރަށް ދާންޖެހޭ، ވިޔަފާރި ކުރުމަކީ ދައުލަތުގެ މޯޓިވް އަކަށް ވެގެން ނުވާނެ : އަލީ ހުސެއިން
14 އޯގަސްޓު 2025 | ބުރާސްފަތި 08:43މި ސަރުކާރުގައި ޕްރައިވެޓް ސެކްޓަރ ދަނީ ހަލާކުވަމުން
ރާއްޖެޓީވީގެ ''ޓީވީޓޯކް'' ޕްރޮގްރާމްގައި މަޝްހޫރު ގާނޫނީ ވަކީލް އަލީ ހުސެއިން ވާހަކަދައްކަވަނީ
ދައުލަތުން ވިޔަފާރިއާ ދުރަށް ދާންޖެހޭ ކަމަށާއި، ވިޔަފާރި ކުރުމަކީ ދައުލަތުން ކޮއްގެން ވާނެ ކަމެއްނޫން މަޝްހޫރު ގާނޫނީ ވަކީލް އަލީ ހުސެއިން ވިދާޅުވެއްޖެ އެވެ.
ރާއްޖެޓީވީގެ ''ޓީވީޓޯކް'' ޕްރޮގްރާމްގައި އަލީ ހުސެއިން ވިދާޅުވީ މިހާރު ވެސް ރާއްޖޭގެ ދަރަނި އިންތިހާއަށް ބޮޑު ކަމަށާއި، މުޅި ދުނިޔޭގެ ނިސްބަތުން 6 ވަނަ އަށް އެންމެ ދަރަނި ބޮޑު ގައުމަކީ ރާއްޖެ ކަމަށެވެ. ގައުމުގެ ހާލަތު މިދަރަޖާގައި އޮތްއިރު، މިފްކޯ ފަދަ ދައުލަތުގެ ކުންފުނިތަކުން އިތުރަށް ދަރަނިވެރިވެ، އެހެން ކުންފުނިތައް ގަނެ، ދަރަނި ބޮޑު ކުރުމަކީ މަސައްކަތް ކުރަންޖެހޭ ގޮތް ނޫން ކަމަށް އޭނާ ވިދާޅުވިއެވެ.
ދައުލަތުން ވިޔަފާރިއާ ދުރުވާންޖެހޭކަން ފާހަގަކުރައްވައި އަލީ ހުސެއިން ވިދާޅުވީ އެކަމުގެ ސަބަބުން ޕްރައިވެޓް ސެކްޓަރ ހަލާކުވާ ކަމަށާއި، އެ މަންޒަރު މިހާރު ފެންނަމުންދާ ކަމަށެވެ. ވިޔަފާރީގައި އަމިއްލަ މީހާއަށް ދައުލަތާ ވާދަކުރަންޖެހޭއިރު، ސަރުކާރުގެ ކުންފުނިތަކުން ވިޔަފާރީގައި ގެއްލުންވުމުން ސަބްސިޑީ ލިބޭ ކަމަށާއި، ސަބްސިޑީން ހަމަނުޖެހޭ ނަމަ ލޯނު ނަގާ ކަމަށާއި، ލޯނުން ހަމަ ނުޖެހޭ ކަމަށްވާނަމަ، ޓީބިލް ވިއްކާ ކަމަށް އޭނާ ވިދާޅުވިއެވެ. އަދި ވިދާޅުވީ މިގޮތަށް އަމަލު ކުރުމުން އާހިރުގައި ރައްޔިތުންނަށް ލިބޭ ގެއްލުން މާ ބޮޑު ކަމަށެވެ.
ހަރުފަތަކަށްފަހު ހަރުފަތެއް ގިރާ ކުރަމުން ގޮސް ގްރެޖުއަލީ އަޅުގަނޑުމެން އެބަޖެހޭ ސަރުކާރުން މި ވިޔަފާރިތަކާ ދުރަށް ދާން. އެކަން ކުރުމަށްޓަކައި މިފްކޯގެ އޮޕަރޭޝަނަސް ކުޑަ ކޮށްފައި ވީހާ ވެސް ބޮޑަށް ފްރައިވެޓް ސެކްޓަރގެ ރޯލު އޭގައި އިތުރު ކުރަންޖެހޭ. އެކަން ކުރަން ދެއްތޯ ކުރީ ސަރުކާރުން ވެސް ފެލިވަރުގެ ކޭނަރީ ފެކްޓްރީގެ ކެޕޭސިޓީ އިތުރު ކުރުމަށް އެވަރުގެ ބޮޑު އިންވެސްޓްމަންޓެއް ހަގީގަތުގައި މިކުރީ. މާރުކޭޓުގައި އެއިރެއްގައި ހުރި އަގު ކަމަށް ހަދަންޖެހޭ. ސިޔާސީ މީހުން ބޭނުންވީމަ ބޭނުންހާ ގޮތަކަށް އަގު ކުޑަކޮށް އަގު ބޮޑުކޮށް ހެދިގެން ނުވާނެ. އަދި ވަކިން ޚާއްސަކޮށް އިންތިޚާބު ދުވަސްވަރު މިދައްކާ ވާހަކަތަކަކީ ތާކުންތާކު ނުޖެހޭ ހޮޅި ވާހަކަތަކެއް.މަޝްހޫރު ގާނޫނީ ވަކީލް އަލީ ހުސެއިން
އެންސިސް ފިޝަރީޒް އިން ގާތްގަނޑަކަށް 25 މިލިއަން ޑޮލަރު ޚަރަދުކޮށްގެން ހުޅުމާލޭގައި ހިންގި ކޭނަރީ ގަތުމަށް މަޝްވަރާތަކެއް ކުރަމުން އަންނަކަމަށް މިފްކޯއިން ބުނެފައިވަތީ އެކަމަށް އިޝާރާތް ކުރައްވައި އަލީ ހުސެއިން ވިދާޅުވީ އެއީ ބްލަންޑަރ އެއް ކަމަށާއި، އެކަމުގެ ސަބަބުން ދައުލަތް ދަރަަނިވެރިވުން ނޫން ކަމެއް ނުވާނެ ކަމަށެވެ. އަދި ކުންފުނި ގަތުމަކީ ކޮރަޕްޝަނަށް ހުޅުވާލެވޭ އިތުރު ދޮރެއް ކަމަށް އޭނާ ވިދާޅުވިއެވެ.
މީގެ އިތުރުން އަލީ ހުސެއިން ވިދާޅުވީ ދައުލަތުގެ އެންމެ އަސާސީ ބޭނުމަކީ އަދުލުއިންސާފު ގާއިމްކޮށްދިނުމާއި، ރައްޔިތުންގެ ސަލާމާތާއި ރައްކާތެރިކަން ގާއިމްކުރުން ކަމަށެވެ. އަދި ވިޔަފާރި ކުރުމަކީ އެއީ ދައުލަތުގެ މޯޓިވް އަކަށް ވެގެން ނުވާނެ ކަމަށެވެ.
އަލީ ހުސެއިން ވިދާޅުވީ މި ހާލަތު ބަދަލު ކުރަންޖެހޭ ކަމަށާއި، ރައްޔިތުންނަށް ފައިދާވާ ގޮތަށް ކަންކަން ބަދަލުކުރަން ޖެހޭ ކަމަށެވެ.
