އެންސިސް ކޭނަރީ މިފްކޯއަށް ގަތުމުގައި ކޮރަޕްޝަނުގެ ތުހުމަތު
ރާއްޖޭގައި މިފަދަ އެހެން ފެކްޓްރީތައްވެސް ހުއްޓާ ވަކިފެކްޓްރީއެއް ގަތުމުގެ މަސައްކަތް ކުރާތީ ގިނަބަޔަކު ސުވާލު އުފައްދާ
ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު ރާއްޖެ ޓީވީގެ "ޓީވީޓޯކް" ޕްރޮގްރާމްގައި ވާހަކަ ދައްކަވަނީ
އެންސިސް ފިޝަރީސް އިން ހުޅުމާލޭގައި ގާއިމް ކޮށްފައިވާ ކޭނަރީ މިފްކޯއަށް ގަތުމުގައި ކޮރަޕްޝަނަށް މަގުފަހިވާ ކަންކަން ހިމެނޭ ކަމަށް ތުހުމަތު ކުރެވޭ ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު ވިދާޅުވެއްޖެއެވެ.
ރާއްޖެޓީވީގެ "ޓީވީޓޯކް" ޕްރޮގްރާމްގައި ޑރ. ޝަމްހީދު ވަނީ މިކަމުގައި އެކުލެވޭ ކޮރަޕްޝަނަށް ތުހުމަތުކުރެވޭ ބައެއް ކަންކަން ފާހަގަ ކުރައްވާފައެވެ.
ޑރ. ޝަމްހީދު ވިދާޅުވީ މިކަހަލަ ކަންކަމުގައި ސަރުކާރުން ގެންގުޅޭ ސިޔާސަތުތައް ހާމަކަން ބޮޑު ގޮތެއްގައި ރައްޔިތުންނާ ހިއްސާކުރަން ޖެހޭނެކަމުގައެވެ. ނަމަވެސް މިއަދާ ހަމަޔަށް އައިއިރުވެސް އެންސިސް ކޭނަރީ މިފްކޯއަށް ގަތުމުގެ އެއްވެސް މައުލޫމާތެއް ސަރުކާރުން ރައްޔިތުންގެ މަޖިލީހުގެ މާލިއްޔަތު ކޮމިޓީއާވެސް ހިއްސާކޮށްފައި ނުވާކަމީ ކަންބޮޑުވާންޖެހޭ ކަމެއްކަމުގައި ޑރ. ޝަމްހީދު ފާހަގަ ކުރައްވާފައިވެއެވެ.
މި ޓްރާންސެކްޝަން އަށް ބޭނުންވާ ފައިސާ މިފްކޯ އިން ހަމަޖެހިގެން ދިޔުމަކީ ނާދިރު ކަމެއްކަމަަށް ފާހަގަ ކުރައްވާ ޑރ. ޝަމްހީދު ވިދާޅުވީ އެހެންކަމުން މިކަމަށް ބޭނުންވާ ފައިސާ ހަމަޖެއްސޭނީ ކެޕިޓަލް އިންޖެކްޝަނެއްގެ ގޮތުގައި ފިނޭން މިނިސްޓްރީން ކަމުގައެވެ. ސަބަބަކީ މިފްކޯގެ މާލީ ހާލަތު އޮތް ގޮތުން އެކުންފުންޔަށް ލޯނެއް ލިބޭނެ ގޮތެއްވެސް ނެތުމުން ކަމުގައެވެ.
އަދި މަޖިލީހުގައި ބައެއް ބޭފުުޅުން މިކަމާ ގުޅޭގޮތުން ވާހަކަދެއްކިއިރު ފާހަގަ ކޮށްފައިވާ ކަންކަމުގެ ތެރޭގައި، މީގެ ކުރިން މިހާރުގެ ފިނޭންސް މިނިސްޓަރުގެ ކުންފުންޏެއް މާލީގޮތުން ވަރަށް ދަށް ހާލަތެއްގައި އޮއްވާ އެންސިސް ކުންފުނިން ގަތް ވާހަކަ ވެސް ފާހަގަ ކޮށްފައިވެއެވެ. އެހެން ކަމުން މިކަމުގައި ކޮންފްލިކްޓް އޮފް އިންޓްރެސްޓް އަންނާތީ، މިއީ ކޮރަޕްޝަނަށް ވަރަށް ބޮޑަށް މަގުފަހިވާ ކަމެއް ކަމަށް ގިނަބަޔަކު ބުނަމުންދާ ކަމަށް ޑރ. ޝަމްހީދު ވިދާޅުވިއެވެ.
މީގެ އިތުރުން ދިވެހިރާއްޖޭގައި ވަރަށް ބައިވަރު ކޭނިން ފެކްޓްރީތައް ހުއްޓާ ވަކި ފެކްޓްރީއެއް ގަންނަން ނިންމުމަކީ ވެސް މިކަމުގައި ސުވާލު އުފެދޭ އެތަައްކަމެއް އެކުލެވޭ އަދި ކޮރަޕްޝަންގެ ތުހުމަތު ކުރެވޭ ސަބަބެއް ކަމަަށް ޑރ. ޝަމްހީދު ވިދާޅުވިއެވެ.
