ތުޅާދޫ މަސްވެރިންގެ މުޒާހަރާ ހުއްޓުވާލީ، މަސްވެރިންގެ އަތުން މެމްބަރު ހަންނާނު ބޮޑު އަގުގައި މަސްގަނެގެން
ރައީސް މުއިއްޒު ތުޅާދޫ އަށް ވަޑައިގެންނެވި ދުވަހު މަސްވެރިން ކުރަން އުޅުނު މުޒާހަރާ، މެމްބަރު ހަންނާނު ހުއްޓުވާލީ މަސްވެރިންގެ އަތުން ބޮޑު އަގުގައި މަސް ގަނެގެން
ރައީސް މުއިއްޒު ބ. ތުޅާދޫ އަށް ވަޑައިގެން ބޭއްވި ޖަލްސާގައި، ތުޅާދޫ ދާއިރާގެ މެމްބަރު އަބްދުލް ހަންނާން އަބޫބަކުރު ވާހަކަ ދައްކަވަނީ
ރައީސް މުއިއްޒު ތުޅާދޫ އަށް ވަޑައިގަތް ދުވަހު މަސްވެރިން ކުރަން އުޅުނު މުޒާހަރާ މެމްބަރު ހަންނާނު ހުއްޓުވާލީ އެދުވަހު މަސްވެރިންގެ އަތުން، ނުކިރި ހުރި މަސްތައް ބޮޑު އަގުގައި ގަނެގެން ކަމަށް ރާއްޖެއެމްވީ އަށް މައުލޫމާތު ލިބިއްޖެ އެވެ.
ތުޅާދޫއިން މިކަމާ ގުޅޭ މައުލޫމާތު އެނގޭ މީހަކު ބުނީ، ރައީސް މުއިއްޒު ތުޅާދޫއަށް ވަޑައިގަތް ދުވަހު ތުޅާދޫގެ މަސްވެރިން ދިޔައީ، މަސްވެރިންގެ ކަންބޮޑުވުންތަކުގެ އަޑު އުފުލުމަށްޓަކާ މުޒާހަރާ ކުރަން ތައްޔާރު ވަމުންނެވެ. މިކަމުގެ ހަބަރު ލިބުމުން ރައީސް ތުޅާދޫއަށް ވަޑައިގަތުމުގެ ގާތްގަނޑަކަށް 30 މިނެޓް ކުރިން މެމްބަރު ހަންނާނު އަދި އޭދަފުށީ ދާއިރާގެ މެމްބަރު އަހުމަދު ސަލީމް ތުޅާދޫ މަސްވެރިންނާއި ބައްދަލު ކުރި އެވެ. އެތަނުގައި 4 މަސް ދޯނީގެ މީހުން ތިއްބެވެ.
މަސްވެރިންނާ ބައްދަލު ކޮށް ރައީސް މުއިއްޒު ކުރިމަތީގައި މުޒާހަރާ ނުކުރަން މެމްބަރު ހަންނާނު މަސްވެރިންގެ ކައިރިން އެދުނެވެ. އަދި ކޮންމެ ގޮތެއް ހަދައިގެން ނަމަވެސް އެދުވަހުގެ މުޒާހަރާ ހުއްޓަލުމަށް އެދުނެވެ. އަދު މަސްވެރިން ކައިރިން ބޭނުންވަނީ ކޮން ކަމެއްތޯ އެހުމުން އެންމެ ފުރަތަމަވެސް މަސްވެރިން ފާހަގަ ކުރީ 4 ދޯނީގައި ނުކިރި ހުރި މަހުގެ ވާހަކަ އެވެ. އެހިސާބުން މަސްވެރިންގެ މަޖުބޫރީ ހާލަތުގެ ފައިދާ ނަގާ އެމަސްތައް ބޮޑު އަގުގައި ގަތުމަށް މެމްބަރު ހަންނާނު ހުށަހެޅިކަމަށް ތުޅާދޫއިން މައުލޫމާތުދިން ފަރާތް ބުނެފައިވެ އެވެ.
ބޭނި މަސްކޮޅު އެކަށީގެންވާ އަގެއްގައި ކިރޭން ގޮތެއް ނެތިފައި ތިބި މަސްވެރިންނަށް އެވަގުތު ވިސްނުނީ، އެ ހުރިހާ މަހެއް މެންބަރު ހަންނާނަށް ބޮޑު އަގުގައި ވިއްކާލުމުން އެެންމެ ކުޑަމިނުން ކަންމަތީ ފިހާރަތަކަށް ދަރާފަ ހުރި ދަރަނިން ބައެއް ދައްކާލެވެނެ ކަމުގައެެވެ. އެންމެ ފަހުން މަސްވެރިން ނިންމީ މެމްބަރުގެ ހުށަހެޅުން ގަބޫލުކޮށް މުޒާހަރާ ހުއްޓާލުމަށެވެ.
ރައީސް މުއިއްޒު ތުޅާދޫއަށް ވަޑައިގަތް ދުވަހު މަސްވެރިންގެ އަތުން ބޮޑު އަގުގައި މަސް ގަތް މެމްބަރު އޭގެފަހުން މަސްވެރިންގެ އަތުން މަސް ގަނެފައިނުވާ ކަމަށްވެސް ތުޅާދޫ އިން މައުލޫމާތު ދިން ފަރާތް ފާހަަގަ ކުރިއެެވެ.
މަސްވެރިންނަސް އެކަށިގެންވާ އަގެއްގައި މަސްނުކިރުވުމުގެ ޝަކުވާ އަކީ އޭދަފުށީގެ މަސްވެރިންގެ އިތުރުން މުޅި ރާއްޖޭގެ އެންމެހާ މަސްވެރިންގެ ވަރަށް ބޮޑު ކަންބޮޑުވުމެކެވެ.
ރައީސް މުއިއްޒު ވަނީ މަހުގެ ކިލޯއަކަށް މިވެރިކަމުގެ ކުރިން ލިބެމުން އައި 25 ރުފިޔާގެ ބަދަލުގައި މަސް ކިލޯއެއް މިފްކޯއިން ގަންނަ އެންމެ ބޮޑު އަގު 16 ރުފިޔާއަށް ދަށްކޮށްފައެވެ.
ނަމަވެސް ވެރިކަމަށް ވަޑައިގަތުމުގެ ކުރިން ރިޔާސީ ކެމްޕެއިން ތެރޭގައި ތަކުރާރުކޮށް އެތަކެއް ފަހަރު ރައީސް މުއިއްޒު ވަނީ މަސް ކިލޯއެއްގެ އަގު 20 ރުފިޔާ އަށްވުރެ ކުޑަ ނުކުރަށްވާނެ ކަމަށް ވައުދު ވެފައެވެ. އެގޮތުން މ. ދިއްގަރު، ޅ. ނައިފަރު އަދި ކ. ގާފަރަށް ވަޑައިގެންވެސް ރައީސް މުއިއްޒު ވަނީ ވަރަށް ހަރު އަޑުން ރައްޔިތޔުންގެ ކުރިމަތީގައި މިކަން ކޮއްދެއްވާނެ ކަމަށް ވިދާޅުވެފައެވެ.
ނަމެވެސް ވެރިކަމަށް ވަޑައިގަތުމަށްފަހު ރައީސް މުއިއްޒު ވަނީ އެމަނިކުފާނު އާއްމު އުސޫލުން ކަން ކުރައްވާ ގޮތަށް މި ވައުދާވެސް ހިލާފުވެ މަސްވެރިން އިތުރަށް ނިކަމެތި ކޮށްލާފަ އެވެ.
