ސުޕްރީމު ކޯޓުގެ ނިންމުމަށް އަމަލުނުކުރަން ނިންމީ އެ ނިންމުމަށް ގޮންޖަހާކަށް ނޫން: ރާއީ
މަޖިލީހުގެ އަދަދު ގުނުމާ ގުޅޭ ގޮތުން ސުޕްރީމް ކޯޓުން ނެރެފައިވާ ވަގުތީ އަމުރަށް އަމަލު ނުކުރާނެކަން އިއުލާންކުރެއްވީ މަޖިލީހުގެ ރައީސް މުހައްމަދު އަސްލަމް
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ ޖުމްލަ އަދަދު ގުނުމާ ގުޅޭގޮތުން މަޖިލީހުގެ ގަވާއިދަށް ގެނެވުނު ބަދަލާ ގުޅިގެން ސުޕްރީމު ކޯޓުން ކުރި ވަގުތީ ޙުކުމަށް އަމަލު ނުކުރަން ނިންމެވީ، އެ ކޯޓުގެ ޙުކުމަށް ގޮންޖެހުމަށް ނޫން ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަ ދައްކަވަމުން ރާއީ ވިދާޅުވީ، ރައްޔިތުންގެ މަޖިލީހުގެ ޖުމްލަ އަދަދު ގުނުމާ ގުޅޭ ގޮތުން ސުޕްރީމް ކޯޓުން ނެރެފައިވާ ވަގުތީ އަމުރާ ދެކޮޅަށް ވަކާލާތު ކުރީ ހަމައެކަނީ އެމްޑީޕީގެ މެންބަރުންނެއް ނޫން ކަމަށާއި، އެ ނިންމެވުމާ ދެކޮޅަށް މަޖިލީހުގެ ޖުމްލަކޮށް ގިނަ މެންބަރުން ދެކޭގޮތް ވަރަށް ސާފުކޮށް ހާމަކުރެއްވި ކަމަށެވެ.
ރާއީ ވިދާޅުވީ މަޖިލީހަކީ މުޅިން މިނިވަން މުއައްސަސާއެއް ކަމަށާއި، މަޖިލިސް ހިނގަމުން ދަނީ މަޖިލީހުގެ ގަވާއިދު ކޮމެޓީން ނިންމައި، ފާސްކޮށް އަދި އެއަށް އަމަލުކުރަން ފަށާފައި އޮތް ކަމެއްގެ މައްޗަށް ކަމަށެވެ.
އެގޮތުން ރާއީ ވިދާޅުވީ އެމްޑީޕީއަށް ނިސްބަތްވެވަޑައިގަންނަވާ މަޖިލީހުގެ ރައީސް ޖަލްސާގައި އިންނެވި ނަމަވެސް، އެމްޑީޕީގެ މެންބަރުންގެ އިތުރުން، އަމިއްލަ މެންބަރުންނާއި އެހެން ޕާޓީތަކުގެ މެންބަރުން ވެސް، ނިޒާމީ ނުކުތާ ނަންގަވައިގެން އެކަން އެގޮތަށް ނުކުރެވޭނެ ކަން ވަރަށް ސާފުކޮށް ވިދާޅުވެދެއްވި ކަމަށެވެ.
ރާއީ ވިދާޅުވި ގޮތުގައި އޭގެ އެއް ސަބަބަކީ އެ މައްސަލައަކީ ސުޕްރީމު ކޯޓުން ބަލަމުންދާ މައްސަލައަކަށް ވުމާއެކު، އެ މައްސަލައަކީ އަދި ނިމިފައި ނެތް މައްސަލައަކަށް ވުމެވެ.
އަދި ދެވަނަ ސަބަބަކަށް ރާއީ ވިދާޅުވީ، ސުޕްރީމު ކޯޓަށް އެ މައްސަލަ ހުށަހަޅައި، އެ މައްސަލައިގެ ޤާނޫނީ ލަފާ އަރުވާފައިވަނީ މަޖިލީހުން ރުހުން ނުދޭން ނިންމަވާފައި ހުންނެވި އަޙްމަދު އުޝާމް ކަމަށް ވުމާއެކު ވެސް، އެކަމަކީ ވެސް މައްސަލަ ޖެހޭ އެއް ކަމަށް ވުމެވެ.
ރާއީ އެފަދައިން ވިދާޅުވިއިރު، މަޖިލީހުގެ އަދަދު ގުނުމާ ގުޅޭ ގޮތުން ސުޕްރީމް ކޯޓުން ނެރެފައިވާ ވަގުތީ އަމުރަށް އަމަލު ނުކުރާނެކަން އެ މަޖިލީހުގެ ރައީސް މުހައްމަދު އަސްލަމް ވަނީ އާދިއްތަ ދުވަހު ބޭއްވި ޖަލްސާގައި އިއުލާންކުރައްވާފައެވެ.
އެގޮތުން އަސްލަމް އެހެން ވިދާޅުވެފައިވަނީ، މަޖިލީހުގެ ޖުމްލަ މެންބަރުންގެ އަދަދު ގުނާ ގޮތް ބަދަލު ކުރުމަށް މަޖިލީހަށް ހުށަހެޅުނު އިސްލާހު ފާސްކުރުމަށް ފަހު ދެއްކެވި ވާހަކަފުޅުގައި އެވެ.
45 މެންބަރުންގެ ވޯޓުން ފާސްކުރެއްވި އެ އިސްލާހަށް ފަހު އަސްލަމް ވިދާޅުވީ، މަޖިލީހުގެ ޖުމްލަ އަދަދު އޭގެ ފަހުން ގުނާނީ ފާސްކުރެވުނު އިސްލާހުގައި އޮތް ގޮތަށް ކަމަށާއި، އެހެންކަމުން މިވަގުތަށް މަޖިލީހުގެ މެންބަރުންގެ އަދަދަކީ 80 ކަމަށެވެ.
މަޖިލީހުގައި ޖުމްލަ 87 މެންބަރުން ތިއްބަވާއިރު، ހަތް މެންބަރަކު ވަޒީރުކަމަށް ވަޑައިގަތުމާއެކު، އެ ހަތް ގޮނޑި ހުސްވިއެވެ. އެ ހަތް ދާއިރާއަށް އަލުން ބޭފުޅުން އައްޔަނުކުރަން ނިންމީ، ގާނޫނުގައި ބުނާ ފަދަ މުއްދަތެއް ނެތުމާއެކު އިލެކްޝަންސް ކޮމިޝަނުންނެވެ. އެގޮތުން މި ދައުރު ނިމި، އައު ދައުރަށް އިންތިހާބުކުރުމަށް ބޭއްވޭ އިންތިހާބު މި އަންނަ މަހުގެ ތެރޭގައި ބޭއްވުމަށް ވަނީ ހަމަޖެހިފައެވެ.
