ވަގުތީ ގޮތުން މޯލްޑިވިއަން އިން ދަތުރުނުކުރެވޭ ގޮތް ހަދައި، ޖާބިރުގެ މައްސަލަ ޕޮލިހަށް ހުށަހަޅައިފި

މޯލްޑިވިއަންގެ ޕައިލެޓަކާ ހުތުރު ބަހުން ވާހަކަ ދައްކަވައި، އެ މީހުންނަށް ނުރައްކާވާ ގޮތަށް ޢަމަލު ކުރެއްވި މައްސަލައިގައި އެ ކުންފުނީގެ ފްލައިޓްތަކުން ކާށިދޫ ދާއިރާގެ މެންބަރު އަބްދުﷲ ޖާބިރަށް ވަގުތީ ގޮތުން ދަތުރުނުކުރެވޭ ގޮތް ހަދައި، އޭނާގެ އެ މައްސަލަ ފުލުހުންނަށް ހުށަހަޅައިފިއެވެ.

ޖާބިރު، މޯލްޑިވިއަންގެ ފްލައިޓުގެ ކްރޫ އަދި ޕައިލެޓުންނަށް ހުތުރުބަހުން ވާހަކަ ދެއްކެވި ވީޑިޔޯ އެއް މީސް މީޑިޔާގައި ދައުރުވަމުން އަންނަ އިރު، އެ މައްސަލަ ފުލުހުންނަށް ހުށަހަޅާފައިވަނީ އެ ކުންފުނީގެ ފަރާތުންނެވެ.

އެގޮތުން އެ ކުންފުނީގެ ޕީއާރް އެންޑް ކޮމިއުނިކޭޝަން އަހްމަދު މުޝްއިލް ވިދާޅުވީ، މެންބަރު ޖާބިރުގެ އެ މައްސަލަ އެ ދުވަހު ފުލުހުންނަށް ހުށަހަޅާފައިވާ ކަމަށެވެ.

އަދި ޖާބިރުގެ އެ މައްސަލަ، ކުންފުނީގެ ފަރާތުން ވެސް ބަލަމުންދާ ކަމަށާއި، އެ މައްސަލަ ބަލައި ނިމެންދެން ވަގުތީ ގޮތުން މޯލްޑިވިއަން އިން ދަތުރުކުރުން ޖާބިރަށް މަނާކޮށްފައިވާ ކަމަށް މުޝްއިލް ވިދާޅުވިއެވެ. 

މުޝްއިލް ވިދާޅުވި ގޮތުގައި، ޖާބިރަށް މޯލްޑިވިއަންގެ ފްލައިޓުތަކުން އެއްކޮށް ދަތުރުނުކުރެވޭނެ ގޮތަށް މަނާކުރާނަމަ އެކަން އިނގޭނީ، އޭވިއޭޝަންގެ ގާނޫނުތަކަށް އަދި ކުންފުނީގެ ގާނޫނުތަކަށް ވެސް ރިއާޔަތްކޮށް، މިހާރު ބަލަމުންދާ މައްސަލަ ބަލާ ނިމުމުން ކަމަށެވެ.

މޯލްޑިވިއަންގެ ޕައިލެޓަކަށް އަދި ކްރޫ އިންނަށް ޖާބިރު ހުތުުރު ބަހުން މުއާމަލާތްކޮށްފައިވާއިރު، ހުތުރު ބަހުން މުއާމަލާތް ކުރުމުގެ ސަބަބުން ޖާބިރު ވަނީ އެމްޑީޕީން ވެސް ވަކިކޮށް، އޭނާ އެމްޑީޕީގެ ޕްރައިމަރީގެ ގޮނޑި ކާމިޔާބު ކުރި ކާށިދޫ ދާއިރާގެ ޓިކެޓު ވެސް އަތުލާފައެވެ.