ސެނެގާލްގެ ރިޔާސީ އިންތިޚާބު ޑިސެމްބަރު މަހުގެ 15 ވަނަ ދުވަހަށް ފަސްކުރުމަށް އެގައުމުގެ ގާނޫނު ހަދާ މަޖިލީހުން ހޯމަ ދުވަހު ފާސްކޮށްފިއެވެ.

މި ބިލް ފާސްކޮށްފައިވާއިރު، ފަހަކަށް އައިސް ސެނެގާލްގައި ޑިމޮކްރަސީ ނެތެމުންދާތީ، ބައިނަލްއަގުވާމީ ފެންވަރުގައި ވަނީ ހަމަނުޖެހުންތައް އުފެދިފައެވެ.

މި ބިލު ފާސްކޮށްފައިވަނީ އިދިކޮޅު ގިނަ މެމްބަރުންތަކެއް ސަލާމަތީ ބާރުތަކުން ޗެމްބަރުން ގަދަކަމުން ނެރުމަށްފަހު ނެގި ހަލަބޮލި ވޯޓަކުން، ގާތްގަނޑަކަށް އިއްތިފާގުންނެވެ. ފެބްރުއަރީ މަހުގެ 25 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބު ފަސްކުރުމަށް ރައީސް މެކީ ސަލް ނިންމެވީ މިދިޔަ ހޮނިހިރު ދުވަހުއެވެ.

165 ގޮނޑީގެ ޗެމްބަރުގެ 105 މެމްބަރުންގެ ތާއީދާއެކު ހުށަހަޅާފައިވާ މި ބިލުގައި ސަލްގެ ދައުރު ވަރަށް ބޮޑަށް  އިތުރުކޮށްފައިވާއިރު، އެ މުއްދަތު އަންނަ އޭޕްރީލް މަހުގެ 2 ވަނަ ދުވަހު ހަމަވާނެއެވެ.

މިފިޔަވަޅުގެ ސަބަބުން ހަރުކަށި އިހުތިޖާޖުތަކެއް ފަށާފައިވާއިރު، ވެރިރަށް ޑަކަރްގެ މަގުތަކުގައި ހަމަނުޖެހުންތައް އިތުރުވަމުންދާ ދަނޑިވަޅެއްގައި، ކަމާބެހޭ ފަރާތްތަކުން ވަނީ ހޯމަ ދުވަހު މޮބައިލް އިންޓަނެޓް ބޭނުންކުރުން މަނާކޮށްފައެވެ.

މި ބިލަށް މެމްބަރުން ބަހުސް ކުރައްވަމުން ގެންދަވަނިކޮށް ސަލާމަތީ ބާރުތަކުން ވަނީ ގާނޫނު ހަދާ މަޖިލީހުގެ އިދާރާގެ ބޭރުގައި އެއްވެ ތިބި މީހުންނާ ދިމާއަށް ކަރުނަ ގޭސް ޖަހާފައެވެ. މަގުތަކަށް ނުކުމެ ޓަޔަރު ރޯކޮށް، ރައީސް ސަލްއަށް ފާޑުކިޔުމުން އެތައް ބަޔަކު ވަނީ ހައްޔަރުކޮށްފައެވެ.

ވޯޓުލުން ފަސްކުރަން ނިންމި ނިންމުން އިސްތިއުނާފު ކުރުމަށް އިދިކޮޅު ދެ ޕާޓީއަކުން ކޯޓަށް މިހާރުވަނީ ހުށަހަޅާފައެވެ.

ސެނެގާލްގައި މިފަދަ ބިލެއް ފާސްކޮށްފައިވާއިރު، މިއީ އެ ސަރަހައްދުގައި ހަމަނުޖެހުންތައް އިތުރުވެފައިވާ ދަނޑިވަޅެކެވެ. އެގޮތުން ނައިޖަރާއި ބުރްކީނާ ފާސޯއާއި މާލީގެ ބޯޑަރު ސަރަހައްދުގައި އޮންނަ ހުރިހާ ގައުމަކުން ވެސް ފާއިތުވި އަހަރުތަކުގައި ވަނީ އަސްކަރީ ޖަންޓާތަކުން ބާރުތައް އަތުލާފައެވެ.

ސެނެގާލްގައި ވެސް ފާއިތުވި އަހަރެއްހާ ދުވަހުގެ ތެރޭގައި ސިޔާސީ ނުތަނަވަސްކަން ބޮޑުވެފައިވާއިރު، 2023 ވަނަ އަހަރުގެ ޖޫން މަހު އިދިކޮޅު ލީޑަރު އުސްމާނޭ ސޮންކޯގެ ސަޕޯޓަރުން ސަލާމަތީ ބާރުތަކާ ކުރިމަތިލުމުން ކަމާބެހޭ ފަރާތްތަކުން ވަނީ މޯބައިލް ފޯނުން އިންޓަނެޓްގެ ޚިދުމަތް ކަނޑާލާފައެވެ.

ސޮންކޯއަކީ މި މަހުގެ ތެރޭގައި ރިޔާސީ ކެންޑިޑޭޓުންގެ ފައިނަލް ލިސްޓުން ގޮނޑި ނުގެއްލޭ ކަމަށް އިލެކްޝަންސް އޮތޯރިޓީން ކަނޑައެޅި އިދިކޮޅު ދެ ލީޑަރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ.

ރައީސް ސަލް މީގެ ކުރިން ވަނީ ތިންވަނަ ދައުރަކަށް ކުރިމަތިނުލައްވާނެ ކަމަށް ވިދާޅުވެފައެވެ. ވޯޓު ފަސްކުރުމަށް ނިންމެވި ނިންމެވުން ޖަސްޓިފައި ކުރެއްވުމުގެ ގޮތުން އޭނާ ވަނީ ކެންޑިޑެސީއާ ގުޅޭގޮތުން މަޖިލީހާއި ޝަރުއީ ދާއިރާއާ ދެމެދު އުފެދިފައިވާ އިންތިޚާބީ ޚިޔާލު ތަފާތުވުންތަކަށް އިޝާރާތް ކުރައްވާފައެވެ.

އެފްރިކަން ޔޫނިއަނުން ބުނީ އެ ގައުމުގެ އިންތިޚާބު ލަސްކުރަން ހުށަހަޅާފައިވާކަން އެނގިފައިވާކަމަށާއި، ސެނެގާލްގެ ކަމާބެހޭ ފަރާތްތަކަށް ވީހާވެސް އަވަހަކަށް އިންތިޚާބު ބޭއްވުމަށް ގޮވާލާ ކަމަށެވެ.

މިދިޔަ އާދީއްތަ ދުވަހު މުޒާހަރާ ބްރޯޑްކާސްޓް ކުރުމުން ސިގްނަލް ކަނޑާލި ޕްރައިވެޓް ވޯލްފް ޓީވީ ނެޓްވޯރކުން ބުނީ އެ މީހުންގެ ބްރޯޑްކާސްޓިންގ ލައިސަންސް ބާތިލްކޮށްފައި ވާކަމަށެވެ.

މިކަމާ ގުޅިގެން، އެމްނެސްޓީ އިންޓަރނޭޝަނަލްގެ ހުޅަނގު އަދި މެދުތެރޭ އެފްރިކާގެ ސަރަހައްދީ އޮފީހުން ވަނީ ބަޔާނެއް ނެރެފައެވެ.