4 މިލިއަން ރުފިޔާ ދެއްކުމަށް އާޒިމާގެ މައްޗަށް ކުރި ޙުކުމް މަޑުޖައްސާލުމުގެ އަމުރެއް
ފައިސާ 6 މަސްދުވަހުގެ ތެރޭގައި ދެއްކުމަށް ވަނީ ހުކުމްކޮށްފައި
އާޒިމާ ޝަކޫރު
މޯލްޑިވްސް އިސްލާމިކް ބޭންކުން ނަގާފައިވާ ފެސިލިޓިއަކަށް 4 މިލިއަން ރުފިޔާ ދެއްކުމަށް އާޒިމާގެ މައްޗަށް ކުރި ޙުކުމް މަޑުޖައްސާލަން ސިވިލް ކޯޓުން އަމުރުކޮށްފިއެވެ.
ސިވިލް ކޯޓުން އެ އަމުރު ނެރެފައިވަނީ އާޒިމާގެ ފަރާތުން އެ ޙުކުމް އިސްތިއުނާފު ކޮށްފައިވާތީ، އިސްތިއުނާފު ކޮށްފައިވާ މައްސަލައިގައި ވަކި ގޮތެއް ކަނޑައެޅެންދެނެވެ.
ސިވިލް ކޯޓުން ބެލި މި މައްސަލައަކީ މ. އާސްތާނާ، އައިޝަތު އާޒިމާ ޝަކޫރު ރަހުނު ބަހައްޓައިގެން، މޯލްޑިވްސް އިސްލާމިކް ބޭންކް އިން ދޫކޮށްފައިވާ 3،186369.23 ރުފިޔާގެ ޑިމިނިޝިން މުޝާރަކާ ޕްރޮޕަޓީ ފައިނޭންސިންގ ފެސިލިޓީއަށް އާޒިމާގެ ފަރާތުން އެއްބަސްވެފައިވާ ގޮތަށް ފައިސާ އަދާކުރަމުންނުދާ ކަމަށް ބުނެ، ފެސިލިޓީގެ ފައިސާއާއި މަހުން މަހައަށް އަރަމުންދާ މަންތްލީ ރެންޓަލް ފައިސާއާއި ޗެރިޓީގެ ގޮތުގައި އަރަމުންދާ ފައިސާ އެކުގައި އެއްފަހަރާ އާޒިމާގެ ކިބައިން ހޯދުމަށް އިސްލާމިކް ބޭންކުން ކޮށްފައިވާ ދައުވާއެކެވެ.
ހުކުމުގައި ބުނެފައިވަނީ އާޒިމާ ރަހުނު ބަހައްޓައިގެން އިސްލާމިކް ބޭންކުން އޭނާއަށް 3،186،369.23 ގެ ޑިމިނިޝިން މުޝާރަކާ ޕްރޮޕަޓީ ފައިނޭންސިން ފެސިލިޓިއެއް ދޫކޮށްފައިވާކަން ސާބިތުވާ ކަމަށެވެ. އަދި ޑިމިނިޝިން މުޝާރަކާ ޕްރޮޕަޓީ ފައިނޭންސް ފެސިލިޓީގެ ދަށުން 2 ޖެނުއަރީ 2024 ގެ ނިޔަލަށް ފެސިލިޓީގައި ބާކީވާ 4،030،856.19 ރުފިޔާއާއި ޗެރިޓީގެ ގޮތުގައި އަރާފައިވާ 125،499.13 ރުފިޔާއެކު ޖުމްލަ 4،156،355.32 ރުފިޔާ އިސްލާމިކް ބޭންކަން އާޒިމާ ދައްކަންޖެހޭ ކަމަށް ސާބިތުވާ ކަމަށް ކަނޑައަޅާ ކަމަށެވެ.
އަދި 2 ޖެނުއަރީ 2024 ގެ ނިޔަލަށް ފެސިލިޓީއަށް އަރާފައިވާ ފައިސާއާއި ޗެރިޓީގެ ގޮތުގައި ދައްކަންޖެހޭ ޖުމްލަ 4،156،355.32 ރުފިޔާ އާއި މަހުން މަހަށް އަރަމުންދާ މަންތްލީ ރެންޓަލްއާއި ޗެރިޓީ ފައިސާ 2 ޖެނުއަރީން ފެށިގެން 6 މަސް ދުވަހުގެ ތެރޭގައި ދެއްކުމަށް އަންގާފައިވެއެވެ.
މި މައްސަލައިގެ ހުކުމް ކޮށްފައިވަނީ އާޒިމާގެ ޣައިރު ހާޒިރުގައެވެ.
