އެއް ވަނައިގައި އޮތް ލިވަޕޫލް ބަލިކޮށް، އާސެނަލްއިން ފަރަގު ކުޑަކޮށްފި

އިނގިރޭސި ޕްރިމިއަރ ލީގު ތާވަލްގެ އެއްވަނައިގައި އޮތް ލިވަޕޫލް ބަލިކޮށް, އާސެނަލް އިން ފަރަގު ކުޑަކޮށްފިއެވެ.

އަމިއްލަ ދަނޑުގައި ކުޅުނު މެޗު ކާމިޔާބުކޮށް, އާސެނަލް ވަނީ ލީގު ތާވަލްގެ ދެވަނަ އަށް ޖެހިލާފައެވެ. މެޗު އާސެނަލް އިން ކާމިޔާބުކުރީ 3-1 ނެވެ. 14 ވަނަ މިނިޓްގައި އާސެނަލް އަށް ލީޑް ނަގައިދިނީ ސަކާ އެވެ. އެކަމަކު ފުރަތަމަ ހާފްގެ ފަހު މިނިޓްގައި ގަބްރިއަލް އަތުން ބައިކޮޅަށް ވަން ލަނޑުން ނަތީޖާ ހަމަހަމަ ވިއެވެ. އާސެނަލްއަށް ދެވަނަ ފަހަރަށް ކުރި ހޯދައިދިނީ ދެވަނަ ހާފްގައި މާޓިނެލީ އެވެ. އަދި ލީޑް ފުޅާކޮށް, މެޗުން މޮޅު ޔަގީންކޮށްދިނީ މެޗުގެ އިތުރު ވަގުތުގައި ޓްރޮސާޑް އެވެ. އާސެނަލް އިން ޖެހި ތިން ގޯލްގެ ތެރެއިން ދެ ގޯލް ވަނީ ކީޕަރު އެލިސަން ބެކާއަށް ހެދުނު ގޯހެއްގެ ސަބަބުންނެވެ. މިއީ މިސީޒަންގެ ލީގުގައި ލިވަޕޫލްގެ ދެވަނަ ބައްޔެވެ.

ލީގު ތާވަލްގެ އެއްވަނައިގައި ލިވަޕޫލް އޮތީ 23 މެޗުން 51 ޕޮއިންޓާ އެކުއެވެ. ދެވަނައިގައި އާސެނަލް އޮތީ 23 މެޗުން 49 ޕޮއިންޓާއެކު އެވެ. މިނަތީޖާއާއެކު އެންމެ ބޮޑު ހިތްހަމަ ޖެހުމެއް ލިބުނީ 21 މެޗުން 46 ޕޮއިންޓާއެކު އޮތް ޗެމްޕިއަން މެންޗެސްޓަރ ސިޓީ އަށެވެ. މެޗުގެ އަދަދު ހަމަކުރާއިރު އެއްވަނަ އަސް ޖެހިލުމުގެ ފުރުޞަތު ސިޓީއަށް އެބައޮތެވެ.