ޝަރުތުތަކަކާއި އެކު ޤަތަރާ މަޝްވަރާއަށް ތައްޔާރު: ޤަތަރާއި ގުޅުން ކަނޑާލި ހަތަރު ގައުމެއް

ޤަތަރަށް ކުރި ޑިމާންޑްތައް ގަބޫލްކުރާނަމަ އެ ގައުމާ އެކު މަޝްވަރާތައް ފަށަން ތައްޔާރަށް އޮތް ކަމަށް ޤަތަރާ ޑިޕްލޮމެޓިކް ގުޅުން ކަނޑާލި ހަތަރު ގައުމެއް ކަމުގައިވާ ސައުދީ އަރަބިއާ، މިސްރު، ޔޫއޭއީ އަދި ބަހްރައިން އިން ބުނެފިއެެވެ.

ގަތަރާއި ގުޅުން ކަނޑާލި ހަތަރު ގައުމެއް ފޮރިން މިނިސްޓަރުން ބަހްރައިންގެ ވެެރިރަށް މަނާމާގައި ގައި، ޤަތަރުގެ މައްސަލައާއި ބެހޭ ގޮތުން ބޭއްވި މަޝްވަރާއަށް ފަހު، މިހެން ބުނިއިރު ޤަތަރުގެ މައްސަލަ ހައްލުކުރަން އދ އިން އެހީތެރިވުމަށް ޤަތަރުގެ ފޮރިން މިނިސްޓަރު ޝެއިޚް މުހަންމަދު ބިން އަބްދުއްރަހްމާން އަލް ސާނީ ވަނީ ބުރާސްފަތި ދުވަހު ގޮވާލައްވާފައެވެ.

ޤަތަރުގެ ފޮރިން މިނިސްޓަރު މިހެން ވިިދާޅުވީ ޤަތަރުގެ މައްސަލައާއި ބެހޭގޮތުން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް އާއި ބައްދަލު ކުރެއްވުމަށް ފަހު ރިޕޯޓަރުންނާއި ވާހަކަފުޅުދައްކަވަމުންނެވެ. ޤަތަރުގެ ފޮރިން މިނިސްޓަރު ވިދާޅުވީ ޤަތަރުގެ މައްސަލަ ހައްލު ކުރުމުގައި އދ. ގެ ސެކިއުރިޓީ ކައުންސިލާއި، ޖެނެރަލް އެސެމްބްލީ އަދި އދ. ގެ ހުރިހާ ގުނަވަންތަކުގެވެސް ރޯލެއް އެބައޮތް ކަމަށެވެ. އޭނާ އިތުރަށް ވިދާޅުވީ ގަތަރުން މައްސަލަތައް ހައްލުކުރަން އެތައް ފަހަރަކު ބުނެފި ކަމަށާއި މަޝްވަރާގެ މަތިން ކަންކަން ހައްލު ކުރުމަށް ޤަތަރުން ބޭނުންވާ ކަމަށެވެ. ޤަތަރުގެ ފޮރިން މިނިސްޓަރު ޝެއިޚް މުހަންމަދު ބިން އަބްދުއްރަހްމާން އަލް ސާނީ ބުރާސްފަތި ދުވަހު ވިދާޅުވީ ޤަތަރާއި އެކު އޮންނަ ގުޅުން، އެއްގަމު، ވައި، އަދި ކަނޑު މަގުން ކަނޑާލި ގައުމުތަކުން ބައިނަލް އަގްވާމި ގާނޫނުތަކާ ހިލާފުވެފައިވާ ކަމަށާއި އަދި އެގައުމުތަކުން "ގޮތްދޫނުކުރުން" ދައްކަމުން ދާ ކަމަށާއި މައްސަަލަ ހައްލުކުރުމަށް އެއްވެސް ފިޔަވަޅެއްވެސް ނާޅާ ކަމަށެވެ.

ޤަތަރާއި ގުޅުން ކަނޑާލި ހަތަރު ގައުމެއް ފޮރިން މިނިސްޓަރުން ބަހްރައިންގެ ވެެރިރަށް މަނާމާގައި އާދީއްތަ ދުވަހު ބޭއްވި ބައްދަލު ކުރެއްވުމަށްފަހު ދެއްވި ޖޮއިންޓް ނިއުސް ކޮންފަރެެންސްއެއްގައި ބަހްރައިންގެ ފޮރިން މިނިސްޓަރު، ޝެއިޚް ހާލިދް ބިން އަލް-ހަލީފާ ވިދާޅުވީ އެ ހަތަރު ގައުމުން ކޮށްފައިވާ ތޭރަ ޑިމާންޑްތަކަށް ބޯލަނބާ، އެހެން ގައުމުތަކުގެ ދާހިލީ ކަންކަމަަށް ނުފޫޒު ނުފޯރުވާ އަދި ޓެރަރިޒަމަށް ފަންޑުކުރުން ހުއްޓާލުމަށް ނިންމައިފިނަމަ މަޝްވަރާއަށް ތައްޔާރު ކަމަށެވެ.

ސައުދީ އަރަބިއާ، މިސްރު، ޔޫއޭއީ އަދި ބަހްރައިން އިން ގަތަރަށް 13 ޑިމާންޑެއް ކޮށްފައިވާއިރު އޭގެތެރޭގައި ގަތަރުން މުސްލިމް ބްރަދާހޫޑަށް ވާގިވެރިވުން ހުއްޓާލުމާއި، އަލް ޖަޒީރާ ޓީވީ ޗެނަލް ބަންދު ކުރުމާއި އިރާނާއި އެކު އޮންނަ ގުޅުން ކުޑަ ކުރުން ފަދަ ޑިމާންޑްތައް ހިމެނެއެވެ.

ޤަތަރުން ޓެރަރިޒަމަށް ހިތްވަރު ދޭ ކަމަށް ބުނެ ޤަތަރާ އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ވަނީ ކަނޑާލާފައެވެ. އެ ގައުމުތަކަކީ ސައުދީ އަރަބިއާ، ޔޫއޭއީ، މިސްރު، ބަހްރައިން, ޔަމަން އަދި ލީބިއާއެވެ. ގަތަރާ މެދު ކުރެވޭ އެންމެހާ ތުހުމަތުތައް ގަތަރުން ދޮގު ކުރަމުންނެވެ. ޑިޕްލޮމެޓިކް ގުޅުން ކަނޑާލި ގައުމުތަކުން ދަނީ ގަތަރަށް އެކި ގޮތްގޮތުން ފިއްތުންތައް ކުރިމަތި ކުރަމުންނެވެ.