އުޅަނދުތައް އޮޕަރޭޓް ކުރަން އިންޑިޔާގެ ސިފައިންގެ ބަދަލުގައި، އެގައުމުގެ އެހެން ބަޔަކު ގެންނަން ސަރުކާރުން އެއްބަސްވެއްޖެ
10 މޭއި ގެ ކުރިން ރާއްޖޭގައި ތިބި ހުރިހާ އިންޑިޔާގެ ސިފައިން ބަދަލުކުރުމަށް އެ ބައްދަލުވުމުގައި ނިންމާފައިވޭ
ރާއްޖޭގައި ހަރަކާތްތެރިވާ އިންޑިޔާގެ ސިފައިންތަކެއް
ރާއްޖޭގައި ތިބި އިންޑިޔާގެ ސިފައިން އެގައުމަށް އަނބުރާ ފޮނުވާލުމަށްފަހު، ރާއްޖޭގައި ބޭނުންކުރަމުންދާ އިންޑިޔާގެ ތިން އުޅަނދު އޮޕަރޭޓްކުރަން އެގައުމުގެ އެހެން ބަޔަކު ގެންނަން ސަރުކާރުން އެއްބަސްވެއްޖެއެވެ.
އިންޑިޔާ ސިފައިންގެ މައްސަލައިގައި ރާއްޖެ އާއި އިންޑިޔާ އާދެމެދު ކުރިއަށްގެންދާ ހައި-ލެވެލް ކޯ ގްރޫޕު ބައްދަލުވުންތަކުގެ ދެވަނަ ބައްދަލުވުން ހުކުރު ދުވަހު ވަނީ ބާއްވާފައެވެ. އެގޮތުން އިންޑިޔާގެ ވެރިރަށް، ނިއު ދިއްލީގައި ބޭއްވި މި ބައްދަލުކުރުމުގައި ދެ ގައުމުން ވެސް އިންޑިޔާގެ ސިފައިން ރާއްޖެއިން ބާލާނެ ތާޜީޚުތަކެއް ކަނޑައަޅާފައެވެ.
އެގޮތުން ރާއްޖޭގެ ފޮރިން މިނިސްޓްރީ ނެރުނު ބަޔާނުގައި ބުނީ, 10 މާޗުގެ ކުރިން އިންޑިޔާގެ ސިފައިންގެ އެއް ބެޗު ފޮނުވާލެވޭނެ ކަމަށާއި، ބާކީ ތިބި ސިފައިން، މޭއި 10 ގެ ކުރިން ފޮނުވާލަން ދެ ގައުމުން އެއްބަސްވެފައިވާ ކަމަށެވެ.
އެހެން ނަމަވެސް، އެ ބަޔާނުގައި ސިފައިން ފޮނުވާލުމުގެ ބަދަލުގައި ބުނެފައިވަނީ "ބަދަލުކުރުމަށް" ނިންމާފައިވާ ކަމަށެވެ. އެ ބަޔާނުގައި އެހެން އޮތުމުގެ މާނައަކީ، ސަރުކާރުން ބުނި ގޮތަށް، ސިފައިންގެ ބަދަލުގައި އުޅަނދުތައް އޮޕަރޭޓްކުރުމަށް މަދަނީ މީހުން ގެނައުން ކަމަށް ވުން ވެސް ވަރަށް ގާތެވެ. އެގޮތުން އެކަމަށް ބާރުދޭ ކަމަކީ، ޑޯނިއާ އަދި ހެލިކޮޕްޓަރުގެ އޮޕަރޭޝަންތައް ނުހުއްޓި ކުރިއަށްގެންދެވޭ ގޮތެއް ހޯދުމަށް ދެގައުމުން އެ ބައްދަލުވުމުގައި މަޝްވަރާކުރުމެވެ.
އެގޮތުން ޑޯނިއާ އަދި ހެލިކޮޕްޓަރު އޮޕަރޭޝަންތައް ދެމެހެއްޓެނިވި ގޮތެއްގައި ހިންގުމަށްޓަކައި ދެ ގައުމުގެ ދެމެދުގައި މަސައްކަތްކުރެވޭނެ ގޮތްތަކެއް ކަނޑައެޅުމަށް ދެ ގައުމުން އެއްބަސްވެފައިވާ ކަމަށް އިންޑިއާގެ އެކްސްޓާނަލް މިނިސްޓްރީން ނެރުނު ބަޔާނުގައި ފާހަގަކޮށްފައިވެއެވެ.
