މަދަނީންގެ ގޮތުގައި އައީ އެ އުޅަނދުތައް އުފެއްދި ކުންފުނީގެ މީހުން: ސަރުކާރު
11 މެއި 2024 | ހޮނިހިރު 11:04ސިވިލިއަނުން ތިބެގެން ރާއްޖޭގެ މިނިވަންކަމަށް ގެއްލުންވާނެ ކަމަކަށް ނުފެނޭ
ނޫސްވެރިންގެ ބައްދަލުވުމުގައި ޑިފެންސް މިނިސްޓަރު މުހައްމަދު ޣައްސާން މައުމޫން ވާހަކަދައްކަވަނީ
އަސްކަރީ އުޅަނދުތައް އޮޕަރޭޓް ކުރަން ރާއްޖެއަށް މަދަނީންގެ ގޮތުގައި އައީ އެ އުޅަނދުތައް އުފެއްދި ކުންފުނީގެ މީހުން ކަމަށް ސަރުކާރުން ބުނެފިއެވެ.
ހޮނިހިރު ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓަރު މޫސާ ޒަމީރު ވިދާޅުވީ ސިވިލިއަނުން ތިބެގެން ރާއްޖޭގެ މިނިވަންކަމަށް ގެއްލުންވާނެކަމަށް ސަރުކާރަށް ނުފެންނަ ކަމަށާއި، ނަމަވެސް ރައްޔިތުންނަށް އެގޮތަށް ފެނިއްޖެނަމަ ސަރުކާރުން އެކަމާ ފުންކޮށް ވިސްނާނެ ކަމަށެވެ.
މިނިސްޓަރު ޒަމީރު ވިދާޅުވީ އިންޑިއާގެ ސިފައިންގެ ފަރާތުން ދިގު މުއްދަތަކަށް ތިބޭ ކަމަށްވާނަމަ ރާއްޖޭގެ މިނިވަންކަމާއި ސިޔާދަތަށް ގެއްލުންވާނެ ކަމަށް ނިންމީ ރައްޔިތުން ކަމަށެވެ.
ރާއްޖޭގައި މަދަނީން ތިބުމާއި ގުޅޭގޮތުން ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވީ ސިވިލިއަނުން ތިބުމުން ރާއްޖޭގެ ކޮމާންޑް އެންޑް ކޮންޓްރޯލް ދިވެހި ސިފައިންގެ އަތުގައި އޮންނާނެ ކަމަށެވެ.
އަދި މިއާއެކު ނޫސްވެރިން ވަނީ ކުރިން އެކަން އޮތީ ކިހިނެއްތޯ ސުވާލު ދަންނަވާފައެވެ.
އެ ސުވާލުގެ ޖަވާބުގައި މިނިސްޓަރު ޣައްސާން ވިދާޅުވީ، ކޮމާންޑް އެންޑް ކޮންޓްރޯލްގެ ވާހަކަ ދައްކަވަން ޖެހިވަޑައިގެންނެވި ސަބަބަކީ ދިވެހީންގެ ހުއްދަ ނެތި މިދިޔަ ސަރުކާރުގައި ފްލައިޓެއް ދުއްވާފައިވާތީ ކަމަށެވެ.
މީގެ އިތުރުން، މަދަނީން ރިޕޯޓު ކުރަންޖެހެނީ ކޮން ބަޔަކަށްތޯ ތަކުރާރުކޮށް ނޫސްވެރިން ސުވާލު ދެންނެވުމުން މިނިސްޓަރު ޣައްސާން ވިދާޅުވީ، އެއީ މަދަނީންކަން އެމްއެންޑީއެފަށް ޔަގީން ކުރެވޭ ކަމަށާއި، އެމީހުން ޖަވާބުދާރީވާނީ ވެސް ދިވެހި ސިފައިންނަށް ކަމަށެވެ.
