ޑޯނިއާ އަދި ހެލިކޮޕްޓަރު އޮޕަރޭޓުކުރުމުގައި އިންޑިޔާގެ ސިފައިންގެ ބަދަލުގައި، އެގައުމުގެ އާންމު ރައްޔިތުން ތިއްބަސް އެންމެ ރަނގަޅު: ސަރުކާރު

އިންޑިޔާގެ ސިފައިން، ރާއްޖޭގައި އޮޕަރޭޓުކުރާ ޑޮނިއޯ މަތިންދާ ބޯޓު އަދި ހެލިކޮޕްޓަރު ދުއްވުމަށް، އިންޑިޔާގެ ސިފައިންގެ ބަދަލުގައި އާންމު މީހުން ތިބުން އެންމެ ރަނގަޅުކަމަށް ސަރުކާރުން ބުނެފިއެވެ.

އިންޑިޔާ ސިފައިން ރާއްޖެއިން ބޭލުމަކީ ރައީސް ޑރ. މުޙައްމަދު މުއިއްޒުގެ ވައުދުފުޅެކެވެ. އެގޮތުން މި އަންނަ މާރިޗުގެ 15 ގެ ކުރިން އެ ސިފައިން ރާއްޖެއިން ބޭލުމުގެ މަޝްވަރާތައް، ދެ ގައުމުގެ ސަރުކާރުން އާދިއްތަ ދުވަހު ވަނީ ފަށާފައެވެ.

Advertisement

އެކަމުގެ މައުލޫމާތު ދެއްވަމުން ރައީސް އޮފީހުގެ ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހީމް ވިދާޅުވީ އާދިއްތަ ދުވަހުގެ ހެނދުނުން ފެށިގެން ވަރަށް ތަފްސީލީ މަޝްވަރާތަކެއް ދެގައުމުގެ އިސްބޭފުޅުންގެ ކޮމެޓީގައި އެކަމާ ގުޅިގެން ކުރެވެމުން ދިޔަ ކަމަށާއި، މި މައްސަލައިގެ މަޝްވަރާއަށް، އިންޑިޔާއިން އެކަމަށް ޚާއްސަ ބޭފުޅުން ވެސް ރާއްޖޭގައި އެބަ އުޅުއްވާ ކަމަށެވެ.

އެގޮތުން އެ މަޝްވަރާގެ ތެރެއިން ރާއްޖޭގައި އެއްވެސް ކަހަލަ ބޭރުގެ ސިފައިންގެ ބަޔަކު ނުބޭތިއްބުމަށް ރާއްޖެއިން ހުށަހަޅާއިރު، ހެލިކޮޕްޓަރު އަދި ޑޯނިއާ ދުއްވުމަށް އިންޑިޔާގެ އާންމު ރައްޔިތުން ތިބުން އެންމެ ރަނގަޅުކަމަށް ސަރުކާރަށް ފެންނަ ކަމަށާއި، މަޝްވަރާތައް ކުރިއަށް ދަނީ އެގޮތުގެ މަތީން ކަމަށް ނާޒިމް ވިދާޅުވިއެވެ.

އެހެން ނަަމަވެސް ނާޒިމް ވިދާޅުވީ އެ މަޝްވަރާތައް ނިމޭނެ ގޮތެއް ވިދާޅުވާން އަދި މާ އަވަސް ކަމަށާއި، އެ ޚިދުމަތް އިންޑިއާ ސަރުކާރުގެ ފަރާތުން ނުދެވޭނެ ނަމަ، ދިވެހި ސަރުކާރުގެ ފަރާތުން ވެސް އެ ޚިދުމަތް ދޭނެ ގޮތެއް ސަރުކާރުން އެ މަޝްވަރާތަކުގެ ތެރެއިން ހޯދާނެ ކަމަށެވެ.

ނާޒިމް އެފަދައިން ވިދާޅުވިއިރު، ޑޯނިއާ އަކީ އިންޑިޔާގެ މިލިޓަރީ ބޭނުންތަކަށް، އެގައުމުން ބޭނުންކުރި މަތިންދާބޯޓެކެވެ. އެ ބޯޓު ރާއްޖޭގައި އޮޕަރޭޓް ކުރަނީ ދިވެހި ސިފައިންނާ ގުޅިގެން ނަމަވެސް، އިންޑިޔާގެ ސިފައިންނެވެ. އެހެން ކަމުން އެ ބޯޓު އަދި ހެލިކޮޕްޓަރު އޮޕަރޭޓްކުރުމަށް އިންޑިޔާގެ އާންމުން ބޭނުންކުރެވޭނެ ގޮތަކާ މެދު ޢާންމުންދަނީ ސުވާލު އުފައްދަމުންނެވެ.