ރާއްޖޭގައި ތިބި އިންޑިޔާގެ ސިފައިން ފޮނުވާލުން އަވަސްކުރަން އިންޑިޔާއިން އެއްބަސްވެއްޖެ
އިންޑިޔާއިން މިފަދައިން އެއްބަސްވެފައިވަނީ ދެ ގައުމުގެ އިސް ބޭފުޅުންތަކެއް ހިމެނޭ ކޯ-ގްރޫޕެއްގެ އެންމެ ފުރަތަމަ ބައްދަލުވުމުގައި
އިންޑިޔާ ސަރުކާރުން ރާއްޖެއަށް ހަދިޔާ ކުރި ހެލިކޮޕްޓަރު، މި ހެލިކޮޕްޓަރު އޮޕަރޭޓް ކުރަނީ އިންޑިޔާގެ ސިފައިން
ރާއްޖޭގައި ތިބި އިންޑިޔާގެ ސިފައިން ފޮނުވާލުމުގެ މަސައްކަތް ބާރު ސްޕީޑެއްގައި ކުރިއަށް ގެންދަން ކޯ-ގްރޫޕުގައި އިންޑިޔާއިން އެއްބަސްވެފައިވާ ކަމަށް ފޮރިން މިނިސްޓްރީން ބުނެފިއެވެ.
އިންޑިޔާގެ ސިފައިން ރާއްޖެއިން ފޮނުވާލުމަށް، ދެ ގައުމުގެ އިސް ބޭފުޅުންތަކެއް ހިމެނޭ ކޯ-ގްރޫޕެއް ހެދުމަށް ރައީސް ޑރ. މުހައްމަދު މުއިއްޒު އަދި އިންޑިޔާގެ ބޮޑުވަޒީރު ނަރެންދުރަ މޯދީ ނިންމެވީ، ކޮޕް 28 ސަމިޓުގެ ހަވާސާގައި ބޭއްވި ބައްދަލުވުމުގައެވެ. އެ ގްރޫޕުގެ އެންމެ ފުރަތަމަ ބައްދަލުވުން އާދިއްތަ ދުވަހު ރާއްޖޭގެ ފޮރިން މިނިސްޓްރީގައި ވަނީ ބާއްވާފައެވެ.
އެގޮތުން އެ ބައްދަލުވުމުގެ މައުލޫމާތު ދެމުން ފޮރިން މިނިސްޓްރީން ބުނީ، ދެ ގައުމުގެ ދެމެދުގައި އޮތް ދާޚިލީ ގުޅުމާ މެދު އަދި ވެފައިވާ އެއްބަސްވުންތަކާ ބެހޭ މަޝްވަރާތައް އެ ބައްދަލުވުމުގައި ކުރެވުނު ކަމަށެވެ.
އަދި އެ ބައްދަލުވުމުގައި ރާއްޖޭގައި ތިބި އިންޑިޔާގެ ސިފައިން ފޮނުވާލުމުގެ މަސައްކަތް، "ފާސްޓް ޓްރެކް"ގައި ކުރިއަށް ގެންދިޔުމަށް އިންޑިޔާއިން އެއްބަސްވެފައިވާ ކަމަށް ވެސް ފޮރިން މިނިސްޓްރީން ބުންޏެވެ.
