ދިވެހިރާއްޖޭގެ ޚާއްސަ އިގްތިޞާދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްދޯނިތަކަކަށް އިންޑިއާ ސިފައިން އަރާފައިވާ މައްސަލަ އާއި ގުޅިގެން ރައްޔިތުންގެ މަޖިލީހަށް ކުއްލި މައްސަލަ އެއް ހުށަހަޅައިފިއެވެ.

ހޯމަ ދުވަހުގެ ޖަލްސާ އަށް ހުށަހެޅި އެ މައްސަލަ ހުށަހަޅުއްވާފައި ވަނީ ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދުއެވެ. އެ މައްސަލައިގައި ބުނެފައި ވަނީ ދިވެހި ކަނޑުގެ ސަރަހައްދުގެ ތެރެއިން މަސްއޮޑިތަކަކަށް ބޭރުގެ ސިފައިން ހަތިޔާރާއި އެކު އެރި ވާހަކަތަކާއި ބަސްދީގަތުންތަކާއި ފޮޓޯ އަދި ވީޑިއޯ އާއި، އިޖުތިމާއީ ވިއުގަތަކުން ކެނޑިނޭޅި ދައުރުވަމުންދާ ކަމަށެވެ. އެހެންނަމަވެސް ދިވެހި ދައުލަތުގެ ސަރަހައްދާއި، ދިވެހި ރައްޔިތުންގެ ސަލާމަތާއި ހިމާޔަތާއި ރައްކާތެރިކަން ކަށަވަރުކުރުމަށް ޤާނޫނީ ޒިންމާ އުފުލާން އޮތް ސަރުކާރުގެ އިދާރާތަކުން ރަނގަޅު މައުލޫމާތު ފޯރުކޮށް ނުދޭކަމަށް އެ މައްސަލައިގައި ވަނީ ބުނެފައެވެ.

އެކަމުގެ ސަބަބުން އާއްމުންގެ ތެރޭގައި ނުތަނަވަސްކަމާއި ބިރުވެރިކަން އުފެދިފައިވާ ކަމަށް އެ މައްސަލައިގައި ވަނީ ބުނެފައެވެ. ވަހީދު އިތުރަށް ވިދާޅުވީ މި މައްސަލަ އާއި ދައުލަތުގެ މަތީ މަސްލަހަތާއި، ސިޔާދަތާއި، މިނިވަންކަމާއި، ހަމަޖެހުމާއި، އިސްތިގްލާލު ގުޅިފައިވާ ކަމަށާއި މިއީ އާއްމުންގެ މެދުގައި އިންތިހާ އަށް ކަންބޮޑުވުން އޮތް މައްސަލަ އެއް ކަމަށެވެ.

އެ މައްސަލަ އަށް ބަހުސްކުރެއްވި މެމްބަރުން ވިދާޅުވީ އެއީ ވަރަށް މުހިންމު މައްސަލައެއް ކަމަށެވެ. އަދި ރާއްޖޭގެ އިގްތިސާދީ ސަރަހައްދަށް އިންޑިއާ ސިފައިން ވަތް ނަމަ އެއީ ކަންބޮޑުވާ ކަމެއް ކަަމަށް މެމްބަރުން ވިދާޅުވިއެވެ. މީގެ އިތުރުން ޗައިނާގެ އުޅަނދެއް ރާއްޖެ އައިސް ރާއްޖޭގައި ދިރާސާތަކެއް ކުރަމުންދާ ކަމަށް އަޑު ފެތުރިފައިވާތީ މި ދަނޑިވަޅުގައި މިފަދަ ކަމެއް ހިނގުމަކީ އިއްތިފާގެއްތޯ މެމްބަރުން ސުވާލު އުފެއްދެވިއެވެ.

މެމްބަރުން ވަނީ ބޭރުގެ މިލިޓަރީ ބައެއް ދިވެހި މަސް ދޯންޏަކަށް އެރުމަކީ ބަލައިގަނެވޭނެކަމެއް ނޫން ކަމަށާއި އެކަމުގެ ސަބަބުން ދިވެހިންގެ ހިތުގައި ބިރުވެރިކަން އުފެދޭނެ ކަމަށް ފާހަގަކުރައްވާފައެވެ، މިކަން ހިނގި ގޮތް ސަރުކާރުން ސާފުކޮށް ބުނެދޭން ޖެހޭ ކަމަށާއި ސަރުކާރުން އާއްމުންނަށް ޖަވާބުދާރީވާން ޖެހޭ ކަމަށް އޭނާ ވިދާޅުވިއެވެ.

ދިވެހިރާއްޖޭގެ ޚާއްސަ އިގްތިޞާދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްދޯނިތަކަކަށް އިންޑިޔާ އަސްކަރިއްޔާ އިން ބޯޑުކޮށް ހިންގި އޮޕަރޭޝަނަކީ ދިވެހިރާއްޖޭގެ ކަމާގުޅޭ އެއްވެސް އިދާރާއަކާ ކޯޑިނޭޓް ކުރުމެއްނެތި އަދި ބައިނަލްއަގްވާމީ ކަނޑުގެ ގާނޫނުތަކާއި އުސޫލުތަކާއި ޚިލާފަށް ހިންގި އޮޕަރޭޝަނެއްކަމަށް ޑިފެންސް މިނިސްޓްރީން ވަނީ ބުނެފައެވެ.

ރާއްޖޭގެ ތިން މަސްދޯންޏަކަށް އިންޑިޔާ ސިފައިން އެރި މައްސަލައެއް ފެންމަތިވެފައިވާއިރު އެކަމާއި ގުޅޭގޮތުން ޑިފެންސް މިނިސްޓްރީން ނެރުނު ބަޔާނުގައި ބުނެފައިވަނީ 31 ޖެނުއަރީ ގައި ހއ ދިއްދޫގެ އިރުއުތުރުން 72 ނޯޓިކަލް މޭލު ބޭރުން ރާއްޖޭގެ ޚާއްސަ އިގްތިޞާދު ސަރަހައްދުގެ ތެރޭގައި މަސްވެރިކަންކުރަމުންދިޔަ އދ މަހިބަދޫ އަސުރުމާ 3 ނަމަކަށް ކިޔާ މަސްދޯންޏަކަށް ބޭރުގެ އަސްކަރިއްޔާގެ ބަޔަކު އަރައި ތިބި ކަމުގެ މައުލޫމާތު ލިބުނުކަމަށެވެ.

އެމައުލޫމާތު ލިބުމާއި ގުޅިގެން ދޯނީގެ ލޮކޭޝަން ކަށަވަރުކުރުމަށްފަހު، އެމްއެންޑީއެފް ނޮދަން އޭރިއާގައި އެހެން އޮޕަރޭޝަނެއްގައި އެވަގުތު ހަރަކާތްތެރިވަމުންދިޔަ އެމްއެންޑީއެފް ކޯސްޓްގާޑުގެ އުޅަނދު "ޝަހީދު އަލީ" ސިފައިންގެ އެންމެ މަތީވެރިޔާ ރައީސުލްޖުމްހޫރިއްޔާގެ އަމުރުފުޅަށް ރީޓާސްކު ކުރެވި އެސަރަހައްދަށް ދިޔުމަށް ފުލް ސްޓީމުގައި ދަތުރު ފެށުނުކަމަށެވެ. އަދި ކޯސްޓްކާޑުގެ އުޅަނދު "ޝަހީދު އަލީ" އެސަރަހައްދަށް ގޮސް އަސުރުމާ 3 ނަމަކަށް ކިޔާ މަސްދޯންޏާއި މަސްވެރިންގެ ސަލާމަތާއި ރައްކަތެރިކަން ކަށަވަރުކުރިކަމަށެވެ.

މީގެއިތުރުން އެމްއެންޑީއެފް ކޯސްޓްގާޑުގެ އުޅަނދު "ޝަހީދު އަލީ" އެސަރަހައްދަށް ދިޔުމުން އިތުރު 2 މަސްދޯންޏަކަށްވެސް ބޭރުގެ އަސްކަރިއްޔާއިން އަރާފައިވާ ކަމުގެ މައުލޫމާތު ލިބިގެންދިޔަކަމަށް ޑިފެންސް މިނިސްޓްރީގެ ބަޔާނުގައި ބުނެފައިވެއެވެ.