ރާއްޖޭގައި ތިބި އިންޑިއާގެ ހުރިހާ ސިފައިން ފައިބާފައިވާ ކަމަށާއި، ފޭބި އިންޑިއާ ސިފައިންގެ އަދަދަކީ 76 ކަމަށް ސަރުކާރުން ބުނެފި އެވެ.
ހޮނިހިރު ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓަރު މޫސާ ޒަމީރު ވިދާޅުވީ ސެނަހިޔާގައި މަސައްކަތް ކުރަން ތިބި ޑޮކްޓަރުން ފިޔަވައި، ހުރިހާ ސިފައިން ރާއްޖެއިން ފައިބާފައިވާ ކަމަށެވެ.
މިނިސްޓަރު ވިދާޅުވީ 76 ސިފައިން ފޮނުވާލީ މިދިޔަ ތިން މަހުގެ ތެރޭގައި ހަ ތާރީހެއްގެ މަތިން ކަމަށެވެ. ތަފްސީލުތަކަށް އިޝާރާތް ކުރައްވައި މިނިސްޓަރު ވިދާޅުވީ 7 މާޗު ގައި އައްޑޫ ގަމުގައި ތިބި 12 ސިފައިން، 9 މާޗުގައި އައްޑޫ ގަމުގައި ތިބި 14 ސިފައިން، 7 އޭޕްރީލްގައި ހަނިމާދޫގައި ތިބި 13 ސިފައިން، 9 އޭޕްރީލްގައި ހަނިމާދޫގައި ތިބި 12 ސިފައިން، 7 މެއިގައި ކައްދޫގައި ތިބި 12 ސިފައިން، އަދި 9 މެއިގައި ކައްދޫގައި ތިބި 13 ސިފައިން ފައިބައިފައިވާ ކަމަށެވެ.
މީގެ އިތުރުން މިނިސްޓަރު ވިދާޅުވީ ސެނަހިޔާގައި ތިއްބެވި ޑޮކްޓަރުންގެ ފަރާތުން ވެސް މިނިވަންކަމާއި އިސްތިގުލާލަށް ގެއްލުންވާކަމަށްވާނަމަ އެބޭފުޅުން ވެސް ފޮނުވާލައްވާނެ ކަމަށެވެ.
އޭގެ އިތުރުން ސެނަހިޔާގައި ތިއްބެވި ޑޮކްޓަރުންނަކީ އެއީ 10 ޑިސެންބަރު 2012 އިން ފެށިގެން ތިބި ސިފައިންގެ އެދުމުގެ މަތިން ސިފައިންނަށް ޚިދުމަތް ދިނުމަށްޓަކައި ގެނެސްފައި ތިބި ޑޮކްޓަރުން. މީގައި ރައީސްގެ ވިސްނުންފުޅަކީ އެމީހުންގެ ފަރާތުން ދިވެހިރާއްޖޭގެ މިނިވަންކަމާއި އިސްތިގުލާލަށް ގެއްލުންވާ ފަދަ ކަމެއް އޮތީވިއްޔާ އަޅުގަނޑުމެންނަށް އެމީހުން މިވަގުތު ބޭނުންކުރަން ނުޖެހޭ ކަމަށްވެއްޖެއްޔާ އެބޭފުޅުން ހަމަ ގެންދަން އިންޑިއާ ސަރުކާރުގައި ދަންނަވާގެން އެކަން ކުރިއަށް ގެންދިއުން. މިވަގުތަކު އެކަން ކުރިއަށް ގެންދަން ނީޑެއް އޮތް ކަމަކަށް ސަރުކާރަށް ނުފެނޭ.ފޮރިން މިނިސްޓަރު މޫސާ ޒަމީރު
އިންޑިއާގެ ސިފައިން ތިބީ ރާއްޖޭގެ ތިން ސަރަހައްދެއްގައި ކަމަށް ސަރުކާރުން ބުނެއެވެ. އެއީ އައްޑޫ ސިޓީ ގަމުގައި އޮތް ހެލިކޮޕްޓަރެއް އޮޕަރޭޓްކުރަން 26 ސިފައިން، ލ. ކައްދޫގައި އޮތް ހެލިކޮޕްޓަރެއް އޮޕަރޭޓް ކުރަން 25 ސިފައިން، އަދި ހދ. ހަނިމާދޫގައި އޮތް ޑޯނިއާ މަތިންދާބޯޓު އޮޕަރޭޓްކުރަން ތިބި 25 ސިފައިންނެވެ.
އިންޑިއާއިން ރާއްޖެއަށް ހަދިޔާކޮށްފައިވާ މިއުޅަނދުތައް ދުއްވާނީ ދިވެހި ސިފައިން ކަމަށް މީގެ ކުރިން މިސަރުކާރުގެ ބޭފުޅުން ވިދާޅުވި ނަމަވެސް މިއުޅަނދުތައް އޮޕަރޭޓް ކުރުމަށް ގެނެސްފައިވަނީ އިންޑިއާގެ މަދަނީންނެވެ. ނަމަވެސް ރާއްޖެއަށް ގެނައި މަދަނީންގެ އަދަދެއް ހާމަކޮށްފައިނުވެއެވެ.
ރާއްޖޭގައި ތިބި އިންޑިއާގެ ސިފައިންނާއި ގުޅޭގޮތުން ސަރުކާރުން ހާމަކޮށްފައިވަނީ އެކިފަހަރު އެދި އަދަދުތަކެވެ. އެންމެފަހުން އިންޑިއާގެ ސިފައިންގެ އަދަދާއި ގުޅޭގޮތުން ރައީސް ޑރ.މުހައްމަދު މުއިއްޒު ވިދާޅުވެފައިވަނީ އިންޑިއާ ސިފައިންގެ އަދަދު އަދިވެސް މުޅިން ސާފުނުވާ ކަމަަށާއި މިހާތަނަށް ބެލި ލިޔެކިޔުންތަކުން 77 އާއި 89އާ ދެމެދުގެ އަދަދުތަކެއް ފާހަގަކުރެވިފައިވާ ކަމަށެވެ.
