ސައުދީ އަށް ފަހު، މިއާމީ ހޮންގް ކޮންގް އަށް
އަލް ހިލާލާ ވާދަކޮށް، 4-3 އިން ބަލިވެފައިވާއިރު، އަލް ނަސްރާ ވާދަކޮށް ބަލިވީ ހަ ލަނޑުގެ ތަފާތުން
އިންޓަ މިއާމީގެ ކެޕްޓަން ލިއޮނަލް މެސީ ބޯޓުން ފައިބަނީ
ސައުދީ އަރަބިޔާގައި ކުޅުނު ރަޙުމަތްތެރިކަމުގެ މެޗުތަކަށްފަހު، އެމެރިކާގެ އިންޓަ މިއާމީން ހޮންގް ކޮންގް އަށް ގޮސްފި އެވެ.
އާޖެންޓީނާގެ ކެޕްޓަން ލިއޮނަލް މެސީ ވެސް ކުޅެމުން އަންނަ މިއާމީން، ހޮންގް ކޮންގް އަށް ގޮސްފައި ވަނީ ހުކުރު ދުވަހު އެވެ. އެ ދަތުރުގައި މިއާމީން ހޮންގް ކޮންގް ގެ ފުރަތަމަ ޑިވިޝަންގެ ޓީމުތަކުން ހޮވާާލެވޭ ކުޅުންތެރިންގެ ޓީމަކާ ދެކޮޅަށް ރަޙުމަތްތެރި ކަމުގެ މެޗެއް ކުޅޭނެ އެވެ. އެ މެޗު ކުޅުމަށް ހަމަޖެހިފައި ވަނީ، އާދީއްތަ ދުވަހު އެވެ. މިއީ، އައު ސީޒަންގެ މޭޖާ ލީގު ސޮކާ (އެމެރިކާ ލީގު) އަށް ތައްޔާރުވުމުގެ ގޮތުން މިއާމީން ކުޅޭ ރަޙުމަތްތެރިކަމުގެ މެޗުތަކެކެވެ.
ހޮންގް ކޮންގްގެ ކުރިން، މިއާމީން ވަނީ ސައުދީ ލީގުގެ އަލް ޙިލާލް އަދި އަލް ނަސްރާ ދެކޮޅަށް ކުޅެފަ އެވެ. އަލް ހިލާލާ ވާދަކޮށް، 4-3 އިން ބަލިވެފައިވާއިރު، އަލް ނަސްރާ ވާދަކޮށް ބަލިވީ ހަ ލަނޑުގެ ތަފާތުންނެވެ. އޭގެ ކުރިން މިއާމީ ވަނީ އިތުރު ތިން މެޗު ވެސް ކުޅެފަ އެވެ. އޭގެ ތެރެއިން އެއް މެޗުން އެއްވަރުވެފައިވާއިރު، އަނެއް ދެ މެޗުން ވަނީ ބަލިވެފަ އެވެ.
އައު ސީޒަނަށް މިއާމީން ތައްޔާރުވަމުން އަންނައިރު، އެ ޓީމުގެ ނަތީޖާ ވަނީ ދަށްވެފަ އެވެ. އެކަމާ ގުޅިގެން އިންޓަ މިއާމީގެ ކޯޗު ޖެރާޑޯ މާޓިނޯ ބުނެފައި ވަނީ، މަސައްކަތް ކުރަމުން އަންނަނީ ޓީމުގެ ޙާލަތު ދެނެގަތުމަށް ކަމަށެވެ. އަދި ރަޙުމަތްތެރިކަމުގެ މެޗުތައް ކުޅުމުގެ މަޤްސަދަކީ އެއީ ކަަމަށާއި، އެކަމުން ސީޒަން ފެށެންވާއިރަށް ރަނގަޅު ޓީމެއް އެކުލަވާލެވޭނެ ކަމުގެ އުންމީދު އޮތް ކަމަށް ވެސް އޭނާ ވަނީ ބުނެފަ އެވެ.
