ވަޒީރުންނަށް ރުހުން ދިނުމަށް މަޖިލީހުގައި ކުރިއަށް ގެންދިޔަ ޖަލްސާތަކުގައި ހިންގި ހަމަނުޖެހުންތައް ތަހުގީގު ކުރަނީ
2 ފެބުރުއަރީ 2024 | ހުކުރު 09:24ބައެއް މެންބަރުންނަށް އިންޒާރުގެ މެސެޖްތައް ދީފައިވޭ
މަޖިލީހުގެ ޖަލްސާ ފެށުމާއެކު ސަރުކާރުގެ މެންބަރު ޗެމްބަރަށް ގޮސް އަޑުގަދަކުރަނީ
ވަޒީރުންނަށް ރުހުން ދިނުމަށް ރައްޔިތުން މަޖިލީހުގައި ކުރިއަށް ގެންދިޔަ ޖަލްސާތަކުގައި ހިންގި ހަމަނުޖެހުންތަކުގެ މައްސަލަތައް ތަހުގީގު ކުރަމުންދާ ކަމަށް ފުލުހުން ބުނެފިއެވެ.
ފުލުހުންގެ މަސައްކަތްތަކާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް ޗީފް ސުޕްރިޓެންޑެންޓް އޮފް ޕޮލިސް އަހުމަދު ނާފިޒު ވިދާޅުވީ ވަޒީރުންނަށް ރުހުން ދިނުމަށް މަޖިލީހުގައި ކުރިއަށް ގެންދިޔަ ޖަލްސާތަކުގައި ހިންގި ހަމަނުޖެހުންތަކުގައި ބައެއް މެންބަރުންނަށް އަނިޔާވެފައިވާ ކަމަށެވެ. މި މައްސަލަތައް ބަލައިދިނުމަށް މަޖިލިސް އިދާރާއިންނާއި، އެމެންބަރުންގެ ފަރާތުން ފުލުހުންނަށް މައްސަލަ ހުށަހަޅާފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ މިމައްސަލަތައް ތަހުގީގު ކުރަމުންދާ ކަމަށެވެ.
ނާފިޒު ވިދާޅުވީ މެންބަރުންނަށް އަނިޔާވުމުގެ އިތުރުން ބައެއް މެންބަރުންނަށް އިންޒާރުގެ މެސެޖްތައް ދީފައިވާ ކަމަށެވެ. އެމައްސަލަތައް ވެސް ތަހުގީގު ކުރަމުންދާ ކަމަށް ނާފިޒު ވިދާޅުވިއެވެ.
ނާފިޒު ވިދާޅުވީ މަޖިލިސް މެންބަރުންނާއި ގުޅޭ މިމައްސަލަތަކުގައި ކަމާގުޅުންހުރި އިދާރާތަކާއި މައުލޫމާތު ހިއްސާކޮށް، އެމެންބަރުންގެ ރައްކާތެރިކަމަށް އަޅަންޖެހޭ ފިޔަވަޅުތައް އަޅާފައިވާ ކަމަށެވެ.
28 ޖެނުއަރީ 2024 ގައި ރައްޔިތުން މަޖިލީހުގެ ޖަލްސާ ކުރިއަށްގެންދިއުމަށް ޕީއެންސީގެ މެންބަރުން ހުރަސްއެޅުމާ ގުޅިގެން މަޖިލިސް އިދާރާގައި ވަނީ ވަރަށް ބޮޑަށް ހަމަނުޖެހުން ހިންގާފައެވެ. އެކި މެންބަރުންނަށް އަނިޔާވެ، ކަނޑިތީމު ދާއިރާގެ މެންބަރު ޢަބްދުﷲ ޝަހީމް އަބްދުލްހަކީމްގެ ބޯ ފަޅައިގެން ގޮސްފައިވެއެވެ. އަދި ކެނދިކުޅުދޫ ދާއިރާގެ މެންބަރު އަހުމަދު އީސާއާއި އޭނާގެ އާއިލާގެ މެންބަރުން މަރާލާނެކަމަށް ބުނެ އިންޒާރުދީފައިވެއެވެ.
