އެސްޓީއޯގެ އާމްދަނީ ދަށްވި ނަމަވެސް، ފައިދާގެ ގޮތުގައި 2.7 ބިލިއަން ރުފިޔާ ހޯދައިފި
31 ޖެނުއަރީ 2024 | ބުދަ 01:49އާމްދަނީ ދަށްވި ނަމަވެސް، ސާފު ފައިދާ ވަނީ 91 މިލިއަން ރުފިޔާއަށް އިތުރުވެފައި
އެސްޓީއޯ ބިލްޑިން
ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް ނިމިދިޔަ ކުއާޓަރުގައި ލިބުނު އާމްދަނީ ދަށްވި ނަމަވެސް، 2.7 ބިލިއަން ރުފިޔާގެ ފައިދާއެއް އެ ކުންފުނިން ހޯދައިފިއެވެ.
އެސްޓީއޯ އިން އާންމު ކުރި އެކުންފުނީގެ މާލީ ތަފާސް ހިސާބުތަކުން ދައްކާ ގޮތުން، މިދިޔަ އަހަރު އެ ކުންފުންޏަށް އާމްދަނީގެ ގޮތުގައި 16.4 ބިލިއަން ރުފިޔާ ލިބުނު ނަމަވެސް، އެއީ 2022 ވަނަ އަހަރު އެ ކުންފުންޏަށް ލިބުނު 18.2 ބިލިއަން ރުފިޔާގެ ޢާމްދަނީއަށް ވުރެ، ގާތްގަޑަކަށް 1.8 ބިލިއަން ރުފިޔާ މަދު އަދަދެކެވެ.
އެގޮތުން އެ ކުންފުންޏަށް މިދިޔަ އަހަރުގެ ތިންވަނަ ކުއާޓަރުގައި ޢާމްދަނީގެ ގޮތުގައި 4.13 ބިލިއަން ރުފިޔާ ލިބުނު އިރު، އާމްދަނީ 3 އިންސައްތައަށް ވެއްޓި، މިދިޔަ އަހަރުގެ އެންމެ ފަހު ކުއާޓަރުގައި އެ ކުންފުންޏަށް ލިބުނީ 4.01 ބިލިއަން ރުފިޔާއެވެ.
އެގޮތުން އާމްދަނީ ދަށްވި މައިގަނޑު ސަބަބެއްކަމުގައި އެ ކުންފުނިން ބުނީ، ދުނިޔޭގެ ބާޒާރުގައި ތެލުގެ އަގަށް އައިބަދަލާއިއެކު ކުންފުނިން ވިއްކަމުން ދިޔަ ތެލުގެ އަގު ދަށްކުރުމާއިއެކު، ތެލުގެ ވިޔަފާރިން ލިބުނު އާމްދަނީ ދަށްވުމެވެ.
އެހެން ނަމަވެސް، އެ ކުންފުނިން ވިކުނު ތެލުގެ އަދަދު އިތުރުވުމާއި ކުންފުނިން ކުރަމުން ގެންދާ އެހެނިހެން ވިޔަފާރިތައް ކުރިއަރައި ރަނގަޅުވުމާއެކު، އެކުންފުންޏަށް މިދިޔަ އަހަރު ޖުމްލަ ފައިދާގެ ގޮތުގައި 2.7 ބިލިއަން ރުފިޔާ ލިބިފައިވެއެވެ.
އެއާއެކު، އެ ކުންފުންޏަށް މިދިޔަ އަހަރު ލިބުނު ސާފު ފައިދާ، ޓެކުހުގެ ކުރިން 995 މިލިއަން ރުފިޔާއަށް އެރިއިރު، ޓެކުހަށް ކެނޑުމަށްފަހު އެ ކުންފުންޏަށް 819 މިލިއަން ރުފިޔާގެ ސާފު ފައިދާއެއް ލިބިފައިވެއެވެ. މިއީ އޭގެ ކުރީ އަހަރާ އަޅާބަލާއިރު ގާތްގަޑަކަށް 91 މިލިއަން ރުފިޔާގެ އިތުރުވުމެކެވެ.
