ރޯދަ އެލަވަންސް ދިނުމުން ވެސް ގެއަށް ގެންދަން ލިބުނު އާމްދަނީ އިތުރެއް ނުވި!

ރޯދަ މަހު އެލަވަންސްގެ ގޮތުގައި މުސާރައާ އެކު 3،000ރ. ދިން ނަމަވެސް ސަރުކާރު މުވައްޒަފުން ގެއަށް ގެންދަން ލިބުނު އާމްދަނީ އެހެން މަސްތަކާ އަޅާބަލާއިރު އިތުރުނުވާ ކަމުގެ ޝަކުވާ ބޮޑުވެއްޖެއެވެ.

ރޯދަ މަސް ފެށުމުގެ ކުރިން ރޯދަ އެލަވަންސް ލިބޭތީ އުފަލުން ތިއްބައި އަންގާރަ ދުވަހާއި ބުދަ ދުވަހު ސަރުކާރު މުވައްޒަފުންނަށް މުސާރަ ލިބުމުން ވަނީ މާޔޫސްކަމާ ކުރިމަތިލާންޖެހިފައެވެ.

Advertisement

އައިޖީއެމްއެޗްގައި ވަޒީފާ އަދާކުރާ މީހަކު ބުނީ ރޯދަ އެލަވަންސްގެ ގޮތުގައި 3،000ރ. ލިބުނު ނަމަވެސް މި މަހު ވެސް މުސާރައިގެ ގޮތުގައި ލިބުނީ އެހެން މަސްތަކުގައި ވެސް ލިބޭ މިންވަރަށް ކަމަށެވެ. ރޯދަ މަހުގެ އެލަވަންސަކީ ރޯދަ މަހުގެ ޚަރަދުތައް ބޮޑުވެގެންދާނެތީ ދޭ އެލަވަންސެއް ނަމަވެސް މި ފަހަރުގެ މުސާރަ އަށް ވީގޮތުން ގޭތެރޭގެ ކަންކަން ކުރުމަށް ދަތިތަކެއް ކުރިމަތިވާނެ ކަމަށް އޭނާ ބުންޏެވެ.

ރޯދަ އެލަވަންސް ދިން ނަމަވެސް މުސާރަ ބޮޑު ނުވީ ސަރުކާރު މުވައްޒަފުންގެ މުސާރަ މި ފަހަރު ހަދާފައި ވަނީ މަހުގެ 10 ވަނަ ދުވަހާ ހަމައަށް ކަމަށް ވުމުންނެވެ. އާންމު އުސޫލެއްގެ ގޮތުން މުސާރަ ހަދަނީ މަހުގެ 15 އިން 15 އަށް ކަމަށް ވިޔަސް މި މަހުގެ މުސާރަ ހަދާފައި ވަނީ މިދިޔަ މަހުގެ 15 އިން މި މަހުގެ 10 ވަނަ ދުވަހާ ހަމައަށް ކަމަށް ވުމުން މުސާރައިން ފަސް ދުވަސް މަދުވާނެއެވެ. އެހެން ކަމުން އެ ފަސް ދުވަހަށްވާ ފައިސާ މި މަހުގެ މުސާރައިގަ ނުހިމެނޭތީ ގެއަށް ގެންދަން ލިބޭ އާމްދަނީން ބޮޑު ބައެއް އުނިވެގެންދާނެއެވެ. އުނިކުރި ފަސް ދުވަހުގެ ފައިސާ ލިބޭނީ އަންނަ މަހުގެ މުސާރައާ އެކުއެވެ.

"މުސާރައިގެ އިތުރުން އެ ތިންހާސް ލިބުން ނަމަ ވަރަށް ރަނގަޅު. ނަމަވެސް މިހާރު އެލަވަންސާ އެކު ވެސް މި ލިބުނީ ގާތްގަނޑަކަށް ހަމަ މިދިޔަ މަހު ވެސް ލިބުނު ވަރު. ދެރައީ މި މަހު ޚަރަދުތައް ބޮޑުވާނެތީ،" ސަރުކާރުގެ ވަޒީފާއެއް އަދާކުރާ މީހަކު ބުންޏެވެ.