އެކަމަނާއަށް ފުރައްސާރަކުރާ ވީޑިއޯ އެއް ވެސް މީސް މީޑިޔާގައި ދަނީ ދައުރުވަމުން
އައްޑޫ މީދޫ ދާއިރާގެ މެންބަރު ރޮޒައިނާ އާދަމް
މަޖިލިސް ކައިރިއަށް އެއްވި އިދިކޮޅު އެކްޓިވިސްޓުން، އައްޑޫ މީދޫ ދާއިރާގެ މެންބަރު ރޮޒައިނާ އާދަމްއަށް ފުރައްސާރަކޮށްފިއެވެ.
ވަޒީރުންގެ އިތުބާރު ނެތްކަމުގެ މައްސަލައާ ގުޅިގެން، އެމްޑީޕީގެ ޕީޖީން ނެރުނު ވިޕާއެކު އާދިއްތަ ދުވަހު މަޖިލިސް ސަރަހައްދުގައި ސަރުކާރު ހިންގާ ފަރާތްތަކުން ވަނީ ހަމަނުޖެހުންތަކެއް ހިންގާފައެވެ. އެ ހަމަނުޖެހުންތަކުގައި ސަރުކާރުގެ އެކި މަގާމުތަކުގެ އަދި އެކި ފެންވަރުގެ ބޭފުޅުން ބައިވެރިވެ ޝުއޫރު ފާޅުކުރިއިރު، އާދިއްތަ ދުވަހުގެ ރޭގެ ވަގުތެއްގައި މަޖިލީހަށް ވަޑައިގަންނަވަނިކޮށް އެ ސަރަހައްދުން އެކްޓިވިސްޓުންތަކެއް ވަނީ މެންބަރު ރޮޒައިނާއަށް ފުރައްސާރަކޮށް، އެކަމަނާގެ ގަޔަށް އަތްލާފައެވެ.
އެގޮތުން އެކަމަށް އިޝާރަތްކުރައްވަމުން މެންބަރު ރޮޒައިނާ ވިދާޅުވީ އާދިއްތަ ދުވަހުގެ ކުރިން ވެސް މަޖިލިސް ކައިރިއަށް މީހުން އެއްވާ ކަމަށާއި، މިހާތަނަށް ވެސް އަނގައިން ބަސް ބުނި ނަމަވެސް އެއްވެސް މީހަކު އެކަމަނާގެ ގައިގައި އަތް ނުލާކަމަށެވެ. އެހެން ނަމަވެސް، އާދިއްތަ ދުވަހުގެ ރޭ، މަޖިލީހަށް ވަޑައިގަންނަވަނިކޮށް އެކަމަނާގެ ބަނޑުގައި އަޅައި އެކްޓިވިސްޓަކު ކޮށްޕާލިކަމަށް އެކަމަނާ ވިދާޅުވިއެވެ. އަދި ވިދާޅުވީ ފިރިކަލުން އަދި ކިނބިދޫ ދާއިރާގެ މެންބަރު މުހައްމަދު ނާޝިޒްއާ އެކު ސައިކަލުގައި ވަޑައިގެންނެވި އެ ވަގުތު، ބޮޑު އަނިޔާއެއް ލިބިވަޑައިނުގެންނެވީ އެވަގުތު އެ ސަރަހައްދުގައި ތިބި ފުލުހުން ޙިމާޔަތް ދިނުމުން ކަމަށެވެ.
ރޮޒައިނާ ވިދާޅުވީ އެކަމަކީ ވަރަށް ކަންބޮޑުވާ ކަމެއް ކަމަށާއި، ސިޔާސީ ގޮތުން ޚިޔާލު ތަފާތުވި ނަމަވެސް މަގުމައްޗަށް ނުކުމެ އުޅުވެންޖެހޭނެ ކަމަށެވެ. އަދި މަޖިލީހުގައި އަންހެނުން ގިނަކުރުމަށް ފަހި މަސައްކަތަކެއް ކޮށްދެއްވާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވި ނަމަވެސް، ޕީޕީއެމް އަދި ޕީއެންސީގެ ޕްރައިމެރީގައި ވެސް ފެނުނީ އެންމެ ދެ އަންހެނަކު ޕްރައިމެރީ ކާމިޔާބުކުރެއްވި މަންޒަރު ކަމަށް ރޮޒައިނާ ވިދާޅުވިއެވެ.
އަދި އެ އަންހެނުންގެ ތެރެއިން އެއް އަންހެނަކީ ރައީސް މުއިއްޒުގެ ކޮއްކޮއެއް ކަމުގައި ފާހަގަ ކުރައްވަމުން ރޮޒައިނާ ވިދާޅުވީ، މަޖިލީހުގައި މިހާރު ވެސް ތިއްބެވީ އެންމެ ހަތަރު ބޭފުޅުން ކަމަށާއި، އަންހެނުންގެ ގަޔަށް ބޮލަށް އަރަން މީހުން ފޮނުވުމުން ފެންނަނީ ރައީސް މުއިއްޒު ވިދާޅުވި ވާހަކަތައް ދިމާނުވާކަން ކަމަށެވެ.
ރޮޒައިނާ ވިދާޅުވީ މަޖިލީހުގައި ހޭދަކުރެއްވި 15 އަހަރުގެ ތެރޭގައި އެފަދަ ކަމެއް އަލަށް ހިނގުމުން ހުންނެވީ ޝޮކެއްގައި ކަމަށާއި، އެކަމުން ފެނުނީ މަޖިލިސް މެންބަރުންނަށް ރައްކާތެރިކަމެއް ނެތްކަން ކަމަށެވެ.
