ދައުރުން ބޭރުން ބާއްވާ ޖަލްސާގައި އާދީއްތަ ދުވަހުގެ ރޭ ބާއްވަން އުޅުނު ޖަލްސާ ސަރުކާރުގެ މެންބަރުން ހުރަސް އެޅުމާއި ގުޅިގެން ކުރިއަށް ނުގެންދެވުނެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު އައްޔަންކުރައްވާފައިވާ 22 ވަޒީރުންނަށް ރުހުން ދިނުމާ ގުޅޭގޮތުން ނަގާ ވޯޓު މިއަދު 1:30ގައި ނެގުމަށް އޮތީ ހަމަޖެހިފައެވެ. އެހެންނަމަވެސް ޕީއެންސީގެ މެމްބަރުން މަޖިލިސް ފްލޯރ ތަޅުލައިގެން ތިބުމުން، ރައްޔިތުންގެ މަޖިލީހުގެ ޖަލްސާ ކުރިއަށް ގެންދިއުމުގެ ޖާގައެއް ނުލިބުނެވެ.

އަދި އާދިއްތަ ދުވަހުގެރޭ 8:00 ގައި ޖަލްސާ އަލުން ފެށުމުން ރިޔާސަތުން މެންބަރުންނަށް އެންގިއެވެ. ނަމަވެސް ޖަލްސާ ފެށުމާއެކު ސަރުކާރަށް ތާއިދުކުރާ މެންބަރުން ވަނީ ޗެމްބަރަށް އަރާ އަޑުގަދަކޮށްފައެވެ. އެގޮތުން މަޖިލީހުގެ ނިޒާމް ގެއްލުވާލާ މެންބަރުން ވަނީ ދުންމާރި ފުމެ ޖަލްސާ ކުރިއަށް ގެންދިޔަނުދީ އަޑުގަދަކޮށްފައެވެ.

ޖަލްސާ ކުރިއަށް ގެންދިއުމަށް ރިޔާސަތުން މަސައްކަތްކޮށް ޖަލްސާ ކުރިއަށް ނުގެންދެވިގެން ވަނީ މެދުކަނޑާލާފައެވެ.

މީގެ އިތުރުން މަޖިލީހުގެ ބޭރުގައި ސަރުކާރަށް ތާއިދު ކުރާ ފަރާތްތައް ދަނީ އިހްތިޖާޖު ކުރަމުންނެވެ. އަދި އެގަޑީގައި މަޖިލީހަށް އައި މެންބަރުންނަށް ފުރައްސާރަކޮށް، ބައެއް މެންބަރުންގެ ގަޔަށް އަތްލާފައިވެއެވެ.