ކެނދިކުޅުދޫ ދާއިރާގެ މެންބަރު އަހުމަދު އީސާއާއި އޭނާގެ އާއިލާގެ މެންބަރުން މަރާލާނެކަމަށް ބުނެ އިންޒާރުދީފިއެވެ.

ރާއްޖެއެމްވީއަށް މައުލޫމާތު ދެއްވަމުން އީސަ ވިދާޅުވީ، ރާއްޖޭގެ ނަންބަރަކުން ގުޅާފައި، އޭނާއަށް ވަރަށް ހަޑި ހުތުރު ބަހުރުވައިން އެއްޗެހި ކިޔައި، އިންޒާރު ދީފައިވާ ކަމަށެވެ. އީސަ ވިދާޅުވީ ގުޅީ ފިރިހެނެއް ކަމަށާއި، އަޑުން ވައްތަރީ ޒުވާނަކާ ކަމަށެވެ. އަދި ގުޅާފައި ބުނީ ވަޒީރުންނަށް ރުހުން ދިނުމުގެ މައްސަލައިގައި ވޯޓުލާން މަޖިލީހަަށް ވަޑައިގަންނަވާނަމަ، ނުކުމެވަޑައިގަންނަވާ ތަނުން މަރާލާނެ ކަމަށެވެ.

މަރާލަނީ އޭނާ އެކަނި ނޫން ކަމަށާއި، އަނބިދަރިން ވެސް މަރާލާނެ ކަމަށާއި، މަގުމަތިން ޅަ ދަރިއަކު ފެނުނަސް މަރާލާނެކަމަށް ބުނެ އިންޒާރު ދީފައިވާ ކަމަށެވެ. އަދި ވޯޓުލާން ވަޑައިގަންނަވާ، މަޖިލީހުގެ އެމްޑީޕީގެ މެންބަރުންވެސް މަރާލާނެކަމަށް ބުނެ ވަރަށް ހަޑިބަހުރުވައިން އިންޒާރުދިން ކަމަށެވެ.

އީސަ ވިދާޅުވީ ގުޅި ނަންބަރަކީ އޭނާ ދެނެވަޑައިގަންނަވާ ނަންބަރެއް ނޫންކަމަށާއި، އެ މައްސަލަ މަޖިލީހުގެ ރައީސް އަދި ރަސްމީ ވަޓްސްއެޕް ގްރޫޕަށްވެސް ލައްވާފައި ވާނެކަމަށެވެ.

މެންބަރު އީސަ ވިދާޅުވީ، މައްސަލަ ފުލުހުންނަށް ހުށަހެޅުމަކީ ބޭކާރު ކަމެއް ކަމަށާއި، މީގެ ކުރިންވެސް މިފަދަ މައްސަލަތައް ފުލުހުންނަށް ހުށަހެޅުއްވި ކަމަށާއި، އެއިން އެއްވެސް މައްސަލައެއް ބަލާފައި ނުވާކަމަށެވެ. އަދި މީގެ ކުރިން ރައްޔިތުންގެ މަޖިލީހުގެ ގޯތި ތެރޭގައި ހުންނަވަނިކޮށް ސައިކަލުގައި އައި މީހަކު އިންޒާރު ދިން މައްސަލައިގައި ސީސީޓީވީ ފުޓޭޖާއެކު މައްސަލަ ހުށަހެޅުއްވި ކަމަށާއި، ނަމަވެސް ފުލުހުން އެ މައްސަލަ ނުބަލާ ކަމަށެވެ.

އަދި މަޖިލީހުގެ މެންބަރުންނަށް ސިޔާސީ ކަންކަމާ ގުޅިގެން އަންނަ އިންޒާރުތަކަކީ ފުލުހުން އެޓެންޑްވާންޖެހޭ ކަންތައްތަކެއްގެ ގޮތުގައި ފުލުހުން ނުދެކޭކަމަށެވެ. އަދި އިންޒާރު ދިން މައްސަލައިގައި ފުލުހުންގެ އެހީތެރިކަމަށް އެދޭނީތޯ ނުވަތަ ފުލުހުން މިފަދަ މައްސަލަތަކުގައި އެއްބާރުލުން ނުދޭތީ، ޕްރޮސެކިއުޓަރ ޖެނެރަލްގެ އެހީތެރިކަމާއެކު އެކަން ކުރިއަށްގެންދާނީތޯ ގާނޫނީ ވަކީލުންނާ މަޝްވަރާކުރައްވަމުން ގެންދަވާކަމަށެވެ.

މެންބަރު އީސަ ވިދާޅުވީ، މި އިންޒާރަކީ ސަރުކާރުން ރާވައިގެން، ސަރުކާރުން ހިތްވަރުދީގެން އަދި އެހީތެރިވެގެން، ފާޅުކަން ބޮޑުގޮތެއްގައި ރާއްޖޭގެ ނަންބަރަކުން ގުޅާފައި ދިން އިންޒާރެއް ކަމަށާއި، ސަރުކާރުގެ އަތެއް މިކަމުގައި ނުވާނަމަ އެހާ ފާޅުކަން ބޮޑުގޮތެއްގައި އިންޒާރުދޭން ނުކުރޭނެ ކަމަށެވެ.

އަދި އެންމެ ބޮޑު ކަންބޮޑުވުމަކީ އޭނާއާއި އޭނާގެ އާއިލާއަށް ހަމަލާދިނުމަކީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ބައިވެރިވުން އޮވެގެން ކުރާ ކަމަށްވާތީ ކަމަށް މެންބަރު އީސަ ވިދާޅުވިއެވެ.

މެންބަރު އީސަ ވިދާޅުވީ، އިންޒާރު ދީފައިވަނީ ވަޒީރުންނަށް ރުހުން ދިނުމުގެ މައްސަލައިގައި ކަމަށް ގަބޫލުކުރެއްވޭ ކަމަށާއި، ސަބަބަކީ ގުޅާފައި އިންޒާރު ދިނީ ވޯޓުލާ ވާހަކައިން ކަމަށާއި، ވޯޓުލާން ގެއިން ނުކުމެއްޖެނަމަ މަރާލާނެކަމަށް ބުނެފައިވާކަމަށާއި، ދެން އާއިލާއަށް މަރުގެ އިންޒާރުދީ، ފޯނު ބާއްވަމުން ބުނީ ވޯޓުލާން މަޖިލީހަށް ވަޑައިގަންނަވާ އެމްޑީޕީގެ ކޮންމެ މެންބަރަކު ވެސް މަރާލާނެކަމަށް ކަމަށެވެ.

މެންބަރު އީސަ ވިދާޅުވީ ވަޒީރުންގެ ވޯޓަށް މަޖިލީހަށް ވަޑައިގަންނަވާނެ ކަމަށާއި، ކެނދިކުޅުދޫ ދާއިރާގެ މެންބަރުން އޭނާއާ ހަވާލުކޮށްފައިވާ މަސްއޫލިއްޔަތު އެންމެފަހު ވަގުތާ ޖެހެންދެން ވެސް އަދާކުރައްވަމުން ގެންދަވާނެ ކަމަށެވެ. އަދި މަސައްކަތް ކުރައްވަނީ އިންޒާރަކާއެކު ހަރުގައި ފިލާ އޮންނަވަން ނޫންކަމަށާއި، މަރާލިޔަސް ހަވާލުކުރެވިފައިވާ ޒިންމާ އަދާކުރައްވާނެ ކަމަށެވެ.