މޮއިސް ކީން ހޯދުމުގެ ޑީލުގައި ޔުވެންޓަސް އާއި އެތުލެޓިކޯ އެއްބަސްވުމަކަށް
28 ޖެނުއަރީ 2024 | އާދީއްތަ 06:05ދެ ކުލަބަށް އެއްބަސްވުމަކަށް އާދެވިފައިވާއިރު، ދާއިމީ ގޮތެއްގައި އޭނާ ހޯދޭނެ މާއްދާ އެއްބަސްވުމުގައި ނުހިމަނާނެ
ޔުވެންޓަސް އަށް ކުޅެމުން އަންނަ މޮއިސް ކީން
ޔުވެންޓަސް އަށް ކުޅެމުން އަންނަ އިޓަލީގެ ފޯވާޑް މޮއިސް ކީން ހޯދުމުގެ ޑީލުގައި، ސްޕެއިންގެ އެތުލެޓިކޯ މެޑްރިޑާއި ޔުވެންޓަސް އަށް އެއްބަސްވުމަކަށް އާދެވިފައިވާ ކަމަށް މީޑިއާ ރިޕޯޓުތައް ބުނެފި އެވެ.
އުމުރުން 23 އަހަރުގެ ޒުވާން ކުޅުންތެރިޔާ އެތުލެޓިކޯ އަށް ބަދަލުވާނީ ލޯނު އެއްބަސްވުމެއްގެ ދަށުންނެވެ. މީޑިއާތަކުގައި ބުނެފައިވާ ގޮތުން މޮއިސް ހޯދުމަށް އެތުލެޓިކޯ އިން، ޔުވެންޓަސް އަށް ދައްކާނީ ފަސް ލައްކާ ޔޫރޯ އެވެ. އަދި އޭނާގެ މުސާރަ އެއްކޮށް ކަވަރުކުރާނީ ވެސް އެތުލެޓިކޯ އިން ކަމަށް ވަނީ ބުނެފަ އެވެ. ޔުވެންޓަސް އާއެކު ކުރިއަށް ގެންދިޔަ މަޝްވަރާތަކަށްފަހު، އެތުލެޓިކޯއާ ދެ ކުލަބަށް އެއްބަސްވުމަކަށް އާދެވިފައިވާއިރު، ދާއިމީ ގޮތެއްގައި އޭނާ ހޯދޭނެ މާއްދާ އެއްބަސްވުމުގައި ނުހިމަނާނެ އެވެ.
މޮއިސް ކީން އޭނާގެ ސީނިއާ ކެރިއަރު ފެށީ ވެސް ޔުވެންޓަސް އިންނެވެ. އޭގެ ފަހުން ދެ ވަނަ ފަހަރަށް ޔުވެންޓަސް އަށް ބަދަލުވީ ވެސް ބަދަލުވީ ލޯނު އެއްބަސްވުމެއްގެ ދަށުންނެވެ. ލޯނު އެއްބަސްވުމެއްގެ ދަށުން ޔުވެންޓަސްގައި އެއް ސީޒަން ކުޅުމަށްފަހު، މިދިޔަ އަހަރު އޭނާ ވަނީ އެ ކުލަބާއެކު ދާއިމީ އެއްބަސްވުމެއްގައި ސޮއިކޮށްފަ އެވެ. ދެ އަހަރު ދުވަހަށް އެކުލަވާލި އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އޭގެ ފަހުން ވެސް އެއްބަަސްވުމުގެ މުއްދަތު އައުކުރުމުގެ ފުރުސަތު އޮންނާނެ އެވެ.
މޮއިސް ކީން ވަނީ ދެ ވަނަ ފަހަރަށް ޔުވެންޓަސް އަށް ބަދަލުވެ އެ ޓީމަށް 93 މެޗު ކުޅެދީ 14 ލަނޑު ޖަހައިފަ އެވެ. މިހާރު ކުރިއަށްދާ ސީޒަނުގައި އޭނާ ވަނީ 11 މެޗު ކުޅެފަ އެވެ. އެންމެ ފުރަތަމަ ޔުވެންޓަސް އިން ސީނިއާ ކެރިއަރު ފެށުމަށް ފަހު އޭނާ ވަނީ އެ ކުލަބާއެކު ކާމިޔާބީތަކެއް ވެސް ހޯދައިފަ އެވެ. އެގޮތުން އިޓާލިއަން ލީގު ދެ ފަހަރު ކާމިޔާބު ކުރުމުގެ އިތުރުން، އިޓާލިއަން ކަޕް އަދި އިޓާލިއަން ސުޕަ ކަޕް ވަނީ ކާމިޔާބުކޮށްފަ އެވެ.
