ސްޕެނިޝް ލީގުގައި ލަސް ޕަލްމާސްއާ ދެކޮޅަށް ކުޅުނު މެޗުން މޮޅުވެ، ރެއާލުން އެއް ވަނައިގައި ދެމިއޮވެއްޖެ އެވެ.

ލީގުގައި ހޮނިހިރު ދުވަހުގެ ރޭ ލަސް ޕަލްމާސްގެ ދަނޑުގައި ކުޅުނު މެޗު ރެއާލުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ޖެހިފަައިނުވާއިރު، މެޗުގެ ލަނޑުތައް ފެނުނީ ދެ ވަނަ ހާފުގަ އެވެ.

ދެ ވަނަ ހާފު ފަށައިގެން އަށް ވަނަ މިނެޓުގައި، ފުރަތަމަ ލަނޑު ޖަހައި ކުރި ހޯދީ ލަސް ޕަލްމާސް އެވެ. މެޗުގައި ލަސް ޕަލްމާސް އަށް ލީޑު ނަގައިދިނީ ޖަވިއޭ މުނޯޒް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ސަންޑްރޯ ރަމިރޭޒް އެވެ. އޭގެ ފަހުން މެޗުގެ 65 ވަނަ މިނެޓުގައި ރެއާލުން ވަނީ ލަނޑު ޖަހައި ނަތީޖާ ހަމަހަމަކޮށްފަ އެވެ. އެޑުއާޑޯ ކަމަވިންގާ ތަނަވަސްކޮށްދިން ފުރުސަތެއްގައި ރެއާލަށް ނަތީޖާ ހަމަހަމަ ކޮށްދިނީ ވިނީޝިއުސް ޖޫނިއާ އެވެ. އޭގެ ފަހުން، މެޗުގެ 84 ވަނަ މިނެޓުގައި އައުރެލިން ޗުއަމެނީ ވަނީ ލަނޑު ޖަހައި ރެއާލް މޮޅު ކޮށްދީފަ އެވެ. އެ ލަނޑު ޖަހަން ފުރުސަތު ތަނަވަސްކޮށްދިނީ ޓޯނީ ކްރޫސް އެވެ.

މޮޅާއެކު ރެއާލް އެއް ވަނައިގައި އޮތީ ދެ ޕޮއިންޓުގެ ލީޑަކުންނެވެ. މިހާތަނަށް ކުޅުނު 21 މެޗުން އެ ޓީމަށް ލިބެނީ 54 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ޖިރޯނާ އަށް ލިބެނީ 52 ޕޮއިންޓެވެ. ތިން ވަނައިގައި އޮތީ ވާދަވެރި އަދި އެންމެ ފަހުގެ ޗެމްޕިއަން ބާސެލޯނާ އެވެ.