ސިލްވާގެ ކުރިމަގާ މެދު ގޮތެއް ނިންމާނީ ކުލަބުން: ޕޮޗެޓީނޯ

ޗެލްސީ އަށް ކުޅެމުން އަންނަ ބްރެޒިލްގެ ތަޖުރިބާކާރު ޑިފެންޑަރު، ތިއާގޯ ސިލްވާގެ ކުރިމަގާ މެދު ގޮތެއް ނިންމާނީ ކުލަބުން ކަމަށް އެ ޓީމުގެ ކޯޗު މައުރީސިއޯ ޕޮޗެޓީނޯ ބުނެފި އެވެ.

ޕޮޗެޓީނޯ މިހެން ބުނީ ޗެލްސީގައި ސިލްވާގެ ކުރިމަގާ ގުޅޭ ގޮތުން ވާހަކަ ދައްކަމުންނެވެ. އެގޮތުން، ޕޮޗެޓީނޯ ޤަބޫލު ކުރާ ގޮތުގައި އެއީ އޭނާ ދެއްކުމަށްވުރެ، ސިލްވާ ދެއްކުން އެންމެ ރަނގަޅު ވާހަކައެކެވެ. ޕޮޗެޓީނޯ ބުނީ އަންނަ ސީޒަނުގައި ކަންތައް ކުރާނެ ގޮތަކާމެދު، ސިލްވާއާއެކު އޭނާ މަޝްވަރާ ކޮށްފައި ނުވާނެ ކަމަށެވެ.

މީގެ އިތުރުން ޕޮޗެޓީނޯ ބުނީ، ސިލްވާ އަށް އޮތީ އޭނާގެ ފިޓްނަސް ރަނގަޅު ފެންވަރެއްގައި ހިފެހެއްޓުން ކަމަށެވެ. މިހާރު ސިލްވާގެ އުމުރަށް ބަލާއިރު، އޭނާ އަންނަނީ ރަނގަޅު މަސައްކަތްތަކެއްކޮށް، ރަނގަޅު ކުޅުމެއް ދައްކަމުން ކަމަށް ވެސް ޕޮޗެޓީނޯ ވަނީ ބުނެފަ އެވެ. އެހެންކަމުން، ސިލްވާއާ މެދު ވަރަށް އުފާވެ، ހިތްހަމަ ޖެހޭކަން ފާހަގަކޮށް ޕޮޗެޓީނޯ ބުނީ، އޭނާގެ މުސްތަޤުބަލާ މެދު ގޮތެއް ނިންމާނީ ކުލަބާއި، ސިލްވާއާ ދެކެވޭ ވާހަކަ އިން ކަމަށެވެ.

އުމުރުން 39 އަހަރުގެ ކުޅުންތެރިޔާ މިހެން ބުނީ، ޗެލްސީގައި އޭނާގެ ކުރިމަގާ ގުޅޭ ގޮތުން ވާހަކަދައްކަމުންނެވެ. ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށް، ސިލްވާ ޗެލްސީ އަށް ބަދަލުވީ 2020 ވަނަ އަހަރު އެވެ. ޗެލްސީ އާއެކު އެންމެ ފަހުން ސިލްވާ ސޮއިކުރި އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ. ނަމަވެސް މިހާތަނަށް ސިލްވާ، އޭނާގެ ކުރިމަގާ ގުޅޭ ގޮތުން ވަކި ނިންމުމެއް ނިންމައިފައެއް ނުވެ އެވެ. އެކަމާ ގުޅޭ ގޮތުން ދާދި ފަހުން ސިލްވާ ބުނެފައި ވަނީ، ޗެލްސީގައި ހޭދަކުރެވޭ ކޮންމެ ވަގުތަކީ ވެސް އޭނާ އަށް ޚާއްސަ ވަގުތު ކޮޅެއް ކަމަށެވެ.

މިހާތަނަށް ޗެލްސީގައި ހޭދަކުރި ހަތަރު ސީޒަންގެ ތެރޭގައި ސިލްވާ ވަނީ އެ ކުލަބަށް 141 މެޗު ކުޅެދީ، ހަތް ލަނޑު ޖަހައިފަ އެވެ. ޗެލްސީ އާއެކު އޭނާ ވަނީ ތިން ތައްޓެއް ކާމިޔާބުކޮށްފަ އެވެ. އެއީ ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕެވެ. މީގެ އިތުރުން އެފްއޭ ކަޕްގެ ފައިނަލްގައި ދެ ފަހަރު އަދި ކަރަބޯ ކަޕްގެ ފައިނަލްގައި އެއް ފަހަރު ވަނީ ކުޅެފަ އެވެ.