ޗެލްސީގައި ހޭދަކުރެވޭ ކޮންމެ ވަގުތުކޮޅެއް ވެސް ވަރަށް ޚާއްސަ: ސިލްވާ

ޗެލްސީގައި ހޭދަކުރެވޭ ކޮންމެ ވަގުތަކީ ވެސް ވަރަށް ޚާއްސަ ވަގުތުކޮޅެއް ކަމަށް، އެ ޓީމަށް ކުޅެމުން އަންނަ ބްރެޒިލްގެ ޑިފެންޑަރު ތިއާގޯ ސިލްވާ ބުނެފި އެވެ.

އުމުރުން 39 އަހަރުގެ ކުޅުންތެރިޔާ މިހެން ބުނީ، ޗެލްސީގައި އޭނާގެ ކުރިމަގާ ގުޅޭ ގޮތުން ވާހަކަދައްކަމުންނެވެ. ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށް، ސިލްވާ ޗެލްސީ އަށް ބަދަލުވީ 2020 ވަނަ އަހަރު އެވެ. ޗެލްސީ އާއެކު އެންމެ ފަހުން ސިލްވާ ސޮއިކުރި އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ. ނަމަވެސް މިހާތަނަށް ސިލްވާ، އޭނާގެ ކުރިމަގާ ގުޅޭ ގޮތުން ވަކި ނިންމުމެއް ނިންމައިފައެއް ނުވެ އެވެ.

ބައިނަލްއަޤުވާމީ މީޑިއާއަކާ ވާހަކަދައްކަމުން ސިލްވާ ބުނީ، ޗެލްސީގައި ހޭދަކުރަމުން ގެންދަނީ ވަރަށް ކާމިޔާބު ދުވަސްތަކެއް ކަމަށެވެ. ޚާއްސަކޮށް ގިނަ ކާމިޔާބީތަކެއް ވެސް ހޯދިފައިވާނެކަން ފާހަގަކޮށް އޭނާ ބުނީ، ޗެލްސީގައި އެކި ކަހަލަ އިޙުސާސްތައް ކުރެވިފައި ވާނެ ކަމަށެވެ. އުފާވެރި ވަގުތުތައް އަދި ހިތާމަވެރި ވަގުތައް ހޭދަކުރެވުނު ކަަމަށް އޭނާ ބުންޏެވެ. އެހެން ނަމަވެސް، ޗެލްސީގައި ހޭދަކުރެވޭ ކޮންމެ ވަގުތަކީ ވެސް އޭނާ އަށް ވަރަށް ޚާއްސަ ވަގުތު ކޮޅެއް ކަމަށް ސިލްވާ ވަނީ ބުނެފަ އެވެ.

މީގެ އިތުރުން ސިލްވާ ބުނީ، މިހާރު އޭނާ ކުޅެމުން އަންނަ ކޮންމެ މެޗެއް ވެސް ނިމުމާއެކު، ޗެލްސީގައި އޭނާގެ އެންމެ ފަހު ދުވަސްތައް ކައިރިވެފައިވާކަމުގެ އިޙުސާސް ކުރެވޭ ކަމަށެވެ. އެހެން ވިޔަސް، މުސްތަޤުބަލު އޮތް ގޮތެއް ބުނަން އުނދަގޫ ކަމަށާއި ކޮންމެ ނިންމުމެއް ނިންމަން ޖެހުނު ނަމަވެސް، އެކަން ކުރާނީ އެންމެ ރަނގަޅު ގޮތަށް ވިސްނާފައި ކަމަށް ސިލްވާ ބުންޏެވެ.

މިހާތަނަށް ޗެލްސީގައި ހޭދަކުރި ހަތަރު ސީޒަންގެ ތެރޭގައި ސިލްވާ ވަނީ އެ ކުލަބަށް 141 މެޗު ކުޅެދީ، ހަތް ލަނޑު ޖަހައިފަ އެވެ. ޗެލްސީ އާއެކު އޭނާ ވަނީ ތިން ތައްޓެއް ކާމިޔާބުކޮށްފަ އެވެ. އެއީ ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕެވެ. މީގެ އިތުރުން އެފްއޭ ކަޕްގެ ފައިނަލްގައި ދެ ފަހަރު އަދި ކަރަބޯ ކަޕްގެ ފައިނަލްގައި އެއް ފަހަރު ވަނީ ކުޅެފަ އެވެ.