ޓިކެޓް ލިބިވަޑައިގެންނެވި ބޭފުޅުންގެ ތެރޭގައި އަބްދުއްރަހީމް އަބްދުﷲއާއި އޭދަފުށީ ދާއިރާގެ މެންބަރު އަހުމަދު ސަލީމްގެ އިތުރުން މަހިބަދޫ ދާއިރާގެ މެންބަރު، އަހުމަދު ޠާރިގު ހިމެނިވަޑައިގަންނަވާ
ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޗެއާޕާސަން އަދި ރައީސް މުއިއްޒުގެ ސްޕެޝަލް އެޑްވައިޒަރު އަބްދުއްރަހީމު އަބްދުﷲ (އަދުރޭ)
ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި، ވެރިކަންކުރާ ޕީޕީއެމް/ޕީއެންސީ ކޯލިޝަންގެ ޓިކެޓް ޕްރައިމަރީ އާ ނުލާ 13 ފަރާތަކަށް ލިބިއްޖެއެވެ.
އެކޯލިޝަނުން ބުނީ ކޯލިޝަންގެ ފަރާތުން ވާދަކުރުމަށް އެދޭ ފަރާތްތަކަށް ހުޅުވާލި ފުރުސަތުގައި އެކަމަށް އެދި ހުށަހެޅި ފަރާތްތަކުގެ ތެރެއިން އެންމެ މެމްބަރަކު ވާދަކުރުމަށް އެދި ހުށަހަޅައިފައިވާތީ އާއި އެކިއެކި ސަބަބުތަކާއެކު ބައެއް މެމްބަރުން ނަން އަނބުރާ ގެންދިޔުމުގެ ސަބަބުން އެއް މެމްބަރަށް އަދަދު މަދުވެފައިވާތީ ޕްރައިމަރީ އެއް ބޭއްވުމެއްނެތި ކޯލިޝަންގެ ޓިކެޓް ދިނުމަށް ނިންމާފައިވާކަމަށެވެ.
ޕްރައިމަރީ އެއް ނެތި ޓިކެޓް ލިބޭ މެމްބަރުންގެ ތެރޭގައި ޕީއެންސީގެ ޗެއާޕާސަން އަދި ރައީސްގެ އިސް އެޑްވައިޒަރު އަބްދުއްރަހީމް އަބްދުﷲއާއި އޭދަފުށީ ދާއިރާގެ މިހާރުގެ މެންބަރު އަހުމަދު ސަލީމްގެ އިތުރުން މަހިބަދޫ ދާއިރާގެ މެންބަރު، އަހުމަދު ޠާރިގު ހިމެނިވަޑައިގަންނަވައެވެ.
ޕީއެންސީ/ޕީޕީއެމްގެ މަޖިލިސް ޕްރައިމަރީ ބޭއްވުމަށް ހަމަޖެހިފައިވަނީ މިހަފްތާގެ ހޮނިހިރު ދުވަހުއެވެ. ޕާޓީގެ ޕްރައިމަރީއަށް ކުރިމަތިލުމަށް ފޯމު ހުށަހެޅި ބައެއް ކެންޑިޑޭޓުންގެ ކެންޑިޑެސީ ބަލައިނުގަތުމަށް އެ ކޯލިޝަނުގެ ލީޑަރުޝިޕުން ނިންމުމާއެކު ކޯލިޝަންގެ ތެރޭގައި ނުތަނަވަސްކަން އުފެދި، ބައެއް އާންމު މެންބަރުން ޕާޓީގެ ދަފުތަރުން ވަކިވާން ފެށުމުން އެ ނިންމުން ބަދަލުކޮށް ހުރިހާ ކެންޑިޑޭޓުންނަށް ޕްރައިމަރީން ފުރުސަތު ދިނުމަށް އެ ޕާޓީން ފަހުން ނިންމިއެވެ.
ބައެއް ކެންޑިޑޭޓުންގެ ކެންޑިޑެންސީ ބާތިލުކޮށްފައިވަނީ އެކެންޑިޑޭޓުން ޕާޓީއަށް އެކަށީގެންވާ ޚިދުމަތްނުކުރާކަމަށާއި ފިތުނަ އުފައްދާކަމަށް ބުނެއެވެ. އެހެންކަމުން ފަހުން ހުރިހާ މެމްބަރުންނަށް ވާދަކުރުމުގެ ފުރުސަތު ހުޅުވާލިނަމަވެސް ކޯލިޝަން ނަމުގައި ވާދަނުކުރާން ބައެއް ފަރާތްތަކުން ވަނީ ނިންމާފައެވެ.
