މޭޔަރުގެ ހައިސިއްޔަތުން ރައީސްގެ ކިބައިން އާޒިމްގެ ފުރަތަމަ އެދިލެއްވުން - "އެމްޑީޕީގެ ސަރުކާރުގެ ބޯހިޔާވަހިކަމުގެ ސިޔާސަތާއި އެއްގޮތަށް ގޯއްޗާއި ފްލެޓްގެ މަސައްކަތް ކޮށްދެއްވާ"
22 ޖެނުއަރީ 2024 | ހޯމަ 17:14ލާމަރުކަޒީ ނިޒާމް ހަރުދަނާކުރާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވާތީ އުފާކުރައްވާ ކަމަށް ވެސް އާޒިމް ވިދާޅުވި
މާލޭގެ މޭޔަރ އާދަމް އާޒިމް އަދި މާލެ ސިޓީ ކައުންސިލަށް އަލަށް އިންތިޚާބުވެވަޑައިގެންނެވި މެމްބަރުން ހުވާކުރެއްވުމުގެ ރަސްމިއްޔާތުގެ ތެރެއިން
އެމްޑީޕީގެ ސަރުކާރުގެ ބޯހިޔާވަހިކަމުގެ ސިޔާސަތާއި އެއްގޮތަށް ގޯއްޗާއި ފްލެޓްގެ މަސައްކަތް ކޮށްދެއްވުމަށް މާލެ ސިޓީ ކައުންސިލްގެ މޭޔަރ އާދަމް އާޒިމް، ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ކިބައިން އެދިވަޑައިގަންނަވައިފިއެވެ.
އާޒިމް އެފަދައިން ވިދާޅުވީ މޭޔަރކަމުގެ ހުވާކުރެއްވުމަށް ފަހު ދެއްކެވި ވާހަފުޅުގައެވެ. އާޒިމްވަނީ އެމަނިކުފާނު ޤަބޫލުކުރައްވާ ގޮތުގައި ޕާޓީ ނިޒާމަކީ އާއްމުން ބޭނުންވާ ކަންކަން ފުރިހަމަ ކުރަން އޮތް ހުރަހަކަށް ވެގެން ނުވާނެ ކަމަށް ވެސް ވިދާޅުވެފައެވެ. އާޒިމް ވަނީ އާއްމުން ތިބީ ވަރަށް ބޮޑަށް ބޯހިޔާވަހިކަމަށް ބޭނުންވެފައި ކަމަށް ވިދާޅުވެފައެވެ. އާޒިމް ވަނީ މާލޭގެ ރައްޔިތުން ދިރިއުޅެމުންދަނީ ވަރަށް ދަތި ހާލުގައިކަން ފާހަގަކުރައްވާފައެވެ. އެގޮތުން މާލޭގެ ގޭގެ އަށް ޒިޔާރަތްކުރުމުން ފެނިގެން ދަނީ ފިތްކަނޑައިގެން ދާހާ ހިތްދަތި މަންޒަރުތައް ކަމަށް އޭނާ ވަނީ ވިދާޅުވެފައެވެ. ކަރުނުން ތެންމާލާ ފަދަ ހިތާމަވެރި މަންޒަރުތައް ފެނިވަޑައިގަންނަވާފައިވާ ކަމަށް ވެސް އާޒިމް ވިދާޅުވިއެވެ.
އިތުރަށް އާޒިމް ވިދާޅުވީ މާލޭގައި އެތައް ކުދިންނެއް މަންމައާއި ބައްޕަ އާއި އެކު އެއް ކޮޓަރި ތެރޭގައި އުޅެ ބޮޑުވެފައިވާ ކަމަށާއި، އެ ކުދިންނަށް ކުދިން ލިބުނު އިރުވެސް އުޅެނީ ހަމަ އެއް ހާލެއްގައި ކަމަށް އާޒިމް ވިދާޅުވިއެވެ. އެހެންކަމުން އެ ރައްޔިތުންގެ އަޑު އަހާ ބޯހިޔާވަހިކަމުގެ މައްސަލަ އަށް ހައްލެއް ހޯދުމަށް މަސައްކަތް ކުރަން ޖެހޭކަން އާޒިމް ވަނީ ފާހަގަކުރައްވާފައެވެ. މާލޭގެ ރައްޔިތުން އެދެނީ ބްރިޖަކުން ގުޅިފައިވާ ރަށްތަކަކަށް ދާން ކަމަށް ވެސް އާޒިމް ވިދާޅުވިއެވެ. އެހެންކަމުން އެމްޑީޕީގެ ބޯހިޔާވަހިކަމުގެ ސިޔާސަތާއި އެއްގޮތަށް ފްލެޓާއި ގޯތީގެ މަސައްކަތް ކޮށްދެއްވުމަށް ރައީސްގެ ކިބައިން އާޒިމް އެދިލެއްވިއެވެ. މާލެ އާއި ދަފްތަރުގެ ރައްޔިތުންނަށް އަވަހަށް ބޯހިޔާވަހިކަން ހޯދާދެވޭނީ އެގޮތަށް ޢަމަލުކޮށްގެން ކަމަށް އާޒިމް ފާހަގަކުރެއްވިއެވެ.
މީގެ އިތުރުން ގުޅީފަޅު، އުތުރުތިލަފަޅު އަދި ގިރާވަރުފަޅު މާލޭގެ އިހްތިސާސްގެ ތެރޭގައި ހިމަނާދެއްވުމަށް ވެސް އާޒިމް ވަނީ އެދިވަޑައިގަންނަވާފައެވެ. މީގެ އިތުރުން ބާރުތައް ދެމި އޮންނަނީ ރައްޔިތުންގެ ކިބައިގައި ކަމަށް ފާހަގަކުރައްވާ އާޒިމް ވިދާޅުވީ ޤާނޫނު އަސާސީ ދަންނަ ގޮތަކީ އެ މަގު ހޯދާދެވޭނެ ބޭފުޅަކީ ގައުމުގެ އެންމެ އިސްވެރިޔާ އަށް ވުން ކަމަށް އާޒިމް ވަނީ ވިދާޅުވެފައެވެ. އަދި ލާމަރުކަޒީ ނިޒާމް ހަރުދަނާކުރުމަށް ޤާނޫނުތައް ފުރިހަމަކުރުމަށް ކުރީގެ ސަރުކާރުތަކުން ކޮށްފައިވާ މަސައްކަތް ފާހަގަކުރައްވާ އެކަމަށް ވެސް އާޒިމް ވަނީ ޝުކުރު އަދާކުރައްވާފައެވެ. އެގޮތުން ކައުންސިލްތައް މެދުވެރިކޮށް އާއްމުންނަށް ލިބޭ ޚިދުމަތްތައް އިތުރުކުރުމަށް ވޭތުވެދިޔަ ސަރުކާރުތަކުން މަސައްކަތް ކޮށްފައިވާ ކަމަށް އާޒިމް ވަނީ ވިދާޅުވެފައެވެ. ހަމައެހެންމެ އެމްޑީޕީން އުފަންކޮށްފައިވާ ލާމަރުކަޒީ ނިޒާމް ހަރުދަނާކުރާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވާތީ އުފާކުރައްވާ ކަމަށް ވެސް އާޒިމް ވިދާޅުވިއެވެ.
