މިދުވަސްވަރު ރައްޔިތުންގެ ކަންބޮޑުވުން އޮތް އެންމެ ބޮޑު އެއް މައްސަލަ ކަމަށްވާ މެޑިކަލް އިވެކުއޭޝަންއާ ގުޅޭގޮތުން ކެބިނެޓުގައި މަޝްވަރާ ނުކުރާކަމަށް ސަރުކާރުން ބުނެފިއެވެ.

އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، މި ދުވަސްވަރު މެޑިކަލް އިވެކުއޭޝަންއާ ގުޅޭގޮތުން ރައްޔިތުންގެ ވަރަށް ބޮޑެތި ކަންބޮޑުވުންތަކެއް ހުރިކަން ފާހަގަކޮށްފައެވެ. އަދި މި މައްސަލާގައި ސަރުކާރުގެ ނިންމުމަކީ ކޮބާތޯއާއި، މި މައްސަލައާ ގުޅިގެން ކެބިނެޓްގެ ބައްދަލުވުމުގައި މަޝްވަރާކުރެވިފައި ވޭތޯ ސުވާލުކޮށްފައިވެއެވެ.

މި ސުވާލަށް ޖަވާބުދެއްވަމުން ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވިދާޅުވީ, ކެބިނެޓުގައި މަޝްވަރާކުރެވޭނީ އެޖެންޑާ ކުރެވި، ތާވަލް ކުރެވިގެން ކަމަށާއި، އާދިއްތަ ދުވަހުގެ ބައްދަލުވުމުގެ އެޖެންޑާގައި މެޑިކަލްގެ މައްސަލާގެ މައުލޫ ހިމެނިފައި ނުވާކަމަށެވެ.

މެޑިކަލް އިވެކުއޭޝަންއާ ގުޅޭގޮތުން ކެބިނެޓުގައި މަޝްވަރާނުކުރާ ކަމަށް ސަރުކާރުން ބުނެފައިވާއިރު، ގއ. ވިލިނގިލިން އިތުރު ފަރުވާއަށް މާލެެއަށް ގެނައުން ލަސްވި ކުއްޖާ އައިޖީއެމްއެޗްގައި ފަރުވާ ދެމުން ދަނިކޮށް 20 ޖެނުއަރީ 2024ގައި ވަނީ ނިޔާވެފައެވެ. ގއ އަތޮޅު ހޮސްޕިޓަލުގެ ޑޮކްޓަރުން އެ ކުއްޖާ މާލެ ފޮނުވަން އަންގާފައި ވަނިކޮށް ކުއްޖާ މާލެ ގެނެވުނީ އޭގެ 16 ގަޑިއިރު ފަހުންނެވެ.

ސަރުކާރަށް ފާޑުކިޔުން ބޮޑުވެފައިވަނިކޮށް، އިމަޖެންސީ ކޭސްއެއް އަތުވެއްޖެނަމަ، ފްލައިޓް ޝެޑިއުލުން އެންމެ އިސްކަމެއް ދީގެން އިމަޖެންސީކޮށް އުފުލަންޖެހޭ ފަރާތް އުފުލާގޮތަށް މޯލްޑިވިއަންގެ އުސޫލަށް ވަނީ ބަދަލު ގެނެސްފައެވެ. އަދި މި މައްސަލައާ ގުޅިގެން އާސަންދައިން ނެރުނު ބަޔާނުގައި ބުނީ، އެ ކުއްޖާ މާލެ ގެންދަން އިމަޖެންސީ އިވެކުއޭޝަނަކަށް ގއ. ވިލިނގިލީ އަތޮޅު ހޮސްޕިޓަލުން އެދުނީ 18 ޖެނުއަރީ 2024 ވީ ބުރާސްފަތި ދުވަހުގެ ފަތިހު 5:03ގައި ކަމަށެވެ. އެ ކުންފުނީގެ މެޑިކަލް ސެކްޝަނުން އެ ކޭސް 12 މިނިޓުތެރޭ ޕްރޮސެސްކޮށް، ކުއްޖާ އިމަޖެންސީގައި މާލެ ގެންނަން ހުއްދަ ދިން ކަމަށާއި، ފްލައިޓެއް ލިބޭތޯ ބަލަން އެ ކުންފުނިން 5:19ގައި ހޮސްޕިޓަލަށް އެންގިކަމަށް އާސަންދައިގެ ބަޔާނުގައި ބުނެފައިވެއެވެ.