ސައޫދީ އަރަބިއްޔާގެ ލީގުގައި ކުޅޭ ޔޫރަޕުގެ ގިނަ ކުޅުންތެރިން ތިބީ އުފަލުން ނޫން ކަމަށް އައް ނަސްރުގެ ޑިފެންޑަރު އެމެރިކް ލަޕޯޓް ބުނެފި އެވެ.

މެންޗެސްޓާ ސިޓީން ސައޫދީ ލީގަށް ބަދަލުވި ސްޕޭންގެ ޑިފެންޑަރު މިހެން ބުނީ ސައޫދީ އަރަބިއްޔާގައި ދިރިއުޅެން ދަތިކަމަށް ބުނެ ލިވަޕޫލްގެ ކުރީގެ ކެޕްޓަން ޖޯޑަން ހެންޑަސަން އެގައުމު ދޫކޮށްލުމާއެކުގަ އެވެ. އޭނާ ބަދަލުވީ ނެދަލޭންޑްސްގެ އަޔެކްސް އަށެވެ.

ލަޕޯޓް ބުނީ ޔޫރަޕުގެ ގިނަ ކުޅުންތެރިންގެ ދިރިއުޅުން އޮތީ ވަކި ގޮތަކަށް ބައްޓަންވެފައި ކަމަށާއި ކުއްލިއަކަށް ސައޫދީގެ ހޫނު މާހައުލަށް ހޭނެން ކުޅުންތެރިންނަށް ފަސޭހަނޫން ކަމަށެވެ.

ނަމަވެސް އޭނާ ފަހުން ބުނީ ކޮންމެ ކުލަބަކުންވެސް އެބަޔަކަށްވީ ވަރަކުން ކުޅުންތެރިންނަށް ލުއިފަސޭހަކަން ހޯދައިދިނުމަށް މަސައްކަތް ކުރާ ކަމަށެވެ. އަދި ކުޅުންތެރިން އުފަލުގައި ބައިތިއްބޭނެ ގޮތްތަކަކީ ކޮބާތޯ ބަލައި މަޝްވަރާކުރެވޭ ކަމަށެވެ.

ސައޫދީ ލީގުގައި ޔޫރަޕުގެ ގިނަ ކުޅުންތެރިންތަކެއް ކުޅެން ފެށީ ބޮޑު މުސާރަ ލިބޭތީވެ މި ސީޒަނުން ފެށިގެންނެވެ. އެ ލީގު ޕްރޮމޯޓް ކުރަން ގެންދިޔަ އެންމެ މަޝްހޫރު ކުޅުންތެރިއަކީ ކްރިސްޓިއާނޯ ރޮނާލްޑޯ އެވެ. އޭނާ ބުނެފައިވަނީ ސައޫދީ ލީގުގައި ކުޅެމުންދަނީ އުފަލުގައި ހުރެ ކަމަށެވެ.