ޣައްޒާގައި ކޮންމެ ގަޑިއަކު އެވްރެޖްކޮށް ދެ މައިންގެ ފުރާނަ ގެއްލޭ: އދ.ގެ އަންހެނުންނާއި ބެހޭ އިދާރާ

ޣައްޒާގެ ހަމަނުޖެހުންތަކުގެ ސަބަބުން އަންހެނުންނަށް ލިބެމުންދާ ގެއްލުންތަކުގައި ކޮންމެ ގަޑިއަކު އެވްރެޖްކޮށް ދެ މައިންގެ ފުރާނަ ގެއްލޭ ކަމަށް ބުނެފިއެވެ.

މިހެން ބުނެފައިވަނީ އދ.ގެ އަންހެނުންނާއި ބެހޭ އިދާރާއިން ހޮނިހިރު ދުވަހު ނެރުނު ނޫސްބަޔާނެއްގައެވެ.

އަދި އިސްރާއީލުން ޣައްޒާއާ ދެކޮޅަށް ހިންގަމުންދާ ލޭއޮހޮރުވުމުގެ ހަނގުރާމައިގެ ތެރޭގައި، އަންހެނުންނާއި އަންހެން ކުދިންނަށް އިންސާނީ އެހީތެރިކަން ފޯރުކޮށްދިނުމަށް ޓަކައި ވަގުތުން ވަގުތަށް ހަނގުރާމަ ހުއްޓާލުމަށް އދ.ގެ ވިމެން އިދާރާއިން ދަނީ ގޮވާލަމުންނެވެ.

އދ.ގެ ވިމެންގެ އެގްޒެކެޓިވް ޑިރެކްޓަރު ސިމާ ބަހޫސް ވިދާޅުވީ ޣައްޒާގެ ހަމަނުޖެހުންތަކުގައި މަރުވި މީހުންގެ ގާތްގަނޑަކަށް 70 ޕަސެންޓަކީ އަންހެނުންނާއި ކުޑަކުދިން ކަމަށެވެ.

ފަލަސްތީނުގެ 24،620 މީހުން ޝަހީދުވި ކަމަށް ރިޕޯޓުކުރި އިރު، އެ މީހުންގެ ތެރެއިން 16،000 އަށް ވުރެ ގިނަ މީހުންނަކީ އަންހެނުންނާއި ކުޑަކުދިންނެވެ. މިއީ ފާއިތުވި 15 އަހަރުގެ ތެރޭގައި އެ ސަރަހައްދުން މަރުވި މީހުންގެ އަދަދަށް ވުރެ ތިން ގުނަ އިތުރު އަދަދެކެވެ.

އިސްރާއީލުގެ ހަމަލާތައް ފެށުނު ފަހުން އަންހެނުންނާއި ކުޑަކުދިންނަށް ކުރިމަތިވެފައިވާ ގޮންޖެހުންތަކުގެ މައްޗަށް އަލިއަޅުއްވާލައްވަމުން ބަހޫސް ވިދާޅުވީ، "އިސްރާއީލުން ދަނީ ޣައްޒާގެ ކުދިން ނިކަމެތިކުރަމުން ކަމަށާއި، މި 100 ދުވަހުގެ ތެރޭގައި ފަލަސްޠީނުގެ ރައްޔިތުންނަށް ލިބުނު ނާކާމިޔާބީއާއި ޖީލުތަކުގެ ހިތާމައިގެ ސަބަބުން، އަދި އެކަން ނިމުމަކަށް ނާންނާނަ ކަމަށެވެ. އޭނާ ވިދާޅުވީ އަންނަން އޮތް ޖީލުތަކަށް އަޅުގަނޑުމެން އެންމެން މިކަމުގެ ސަބަބުން ހިތާމަކުރާން ޖެހޭނެކަމަށެވެ.

ހަމަނުޖެހުން ތައް ހިނގަމުން ދާއިރު، ބަހޫސް ވަނީ އިސްރާއީލަށް ވަރުގަދަ އިންޒާރެއް ދީފަ އެވެ.

ޣައްޒާގައި އަންހެނުންނާއި އަންހެން ކުދިންގެ ސަލާމަތާއި ބޭހާއި ސިއްހީ ފަރުވާ އާއި ބޯހިޔާވަހިކަން ނެތުމުން އދ.ގެ އަންހެނުންނާއި ބެހޭ އެ އިދާރާއިން ދަނީ ނުރައްކާތެރިކަމުގެ ރަނގަބީލު އަޅަމުންނެވެ.

ޔޫއެން ވިމެން އިން ދާދި ފަހުން ނެރުނު "ޖެންޑާ އެލާޓް" ރިޕޯޓްގައި މި ކާރިސާގެ އަސަރުތަކާ ބެހޭ ގޮތުން ޝާއިއުކޮށްފައިވާ "ޖެންޑާ އެލާޓް" އިން ދައްކާ ގޮތުގައި މަރުވި މީހުންނާއި ޒަހަމްވި ނުވަތަ ގެދޮރު ގެއްލުނު މީހުންގެ ތެރޭގައި ގިނައީ އަންހެނުންނެވެ.

އެ އެޖެންސީން ވަނީ މިންތީގެ ހަމަހަމަކަން ނެތި ދިއުމާއި، ކުޑަކުދިން ހަނގުރާމައާއި ހަމަނުޖެހުންތަކުގައި ދިރިއުޅެން ޖެހުމަކީ ނިހާޔަތަށް ކަންބޮޑުވާކަމެއްކަމަށް ފާހަގަކޮށް ހަމަނުޖެހުންތައް ވަގުތުން ހުއްޓާލުމަށް ދެފަރާތަށް ވެސް ގޮވާލައިފައެވެ.

2.3 މިލިއަން މީހުންގެ ތެރެއިން 1.9 މިލިއަން މީހުން ގެދޮރު ގެއްލިފައިވާއިރު، އޭގެ ތެރެއިން ގާތްގަނޑަކަށް މިލިއަނަކީ އަންހެނުންނާއި އަންހެން ކުދިންނެވެ.