ޑި ލިޓް، ބަޔާން ދޫކޮށްލަން އުޅޭ ވާހަކަތަކަށް ޓުޗެލް ރައްދު ދީފި

ޖަރުމަނުގެ ބަޔާން މިއުނިކަށް ކުޅެމުން އަންނަ، ނެދަލެންޑްސްގެ ޑިފެންޑަރު މަތައިސް ޑި ލިޓް އެ ކުލަބު ދޫކޮށްލަން އުޅޭ ވާހަކަތަކަށް، ކޯޗު ތޯމަސް ޓުޗެލް ރައްދު ދީފި އެވެ.

އުމުރުން 24 އަހަރުގެ ކުޅުންތެރިޔާ ބަޔާނަށް ބަދަލުވީ 2022 ވަނަ އަހަރު އެވެ. ޔުވެންޓަސް ދޫކޮށްލުމަށްފަހު އޭނާ އެ ޓީމަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް، މިއަހަރުގެ ޖޫން މަހުގެ ތެރޭގައި ޑި ލިޓް ބަޔާން ދޫކޮށްލަން އުޅޭ ވާހަކަތައް ޖަރުމަނުގެ ބައެއް މީޑިއާ ތަކުގައި ވަނީ ރިޕޯޓުކޮށްފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ޓުޗެލް ބުނީ، ކުޅިވަރުގައި ވެސް، ޚާއްސަކޮށް ފުޓުބޯޅައިގައި އެކި ފަހަރު، އެކި ވާހަކަތައް ފެތުރެމުން ދާނެ ކަމަށެވެ. ޚާއްސަކޮށް، ގިނަ ފަހަރު އެގޮތަށް ދައުރުވަމުންދާ ގިނަ ވާހަކަތަކުގައި އެއްވެސް އަސްލެއް އެކުލެވިގެން ނުވާނެ ކަމަށް ވެސް އޭނާ ވަނީ ބުނެފަ އެވެ. ޓުޗެލް ބުނީ، މުސްތަޤުބަލަށް ބަޔާނުން ތައްޔާރު ވަނީ ޑި ލިޓް އާއެކު ކަމަށެވެ. އޭނާ އަކީ މަތީ ފަންތީގައި ގުނާލެވޭ މޮޅު ކުޅުންތެރިޔެއް ކަމަށް ވެސް ޓުޗެލް ވަނީ ފާހަގަކޮށްފަ އެވެ.

މީގެ އިތުރުން ޓުޗެލް ބުނީ، ޖަރުމަނު ޤައުމީ ޓީމާއެކު ހޭދަކުރުމަށްފަހު، ޑި ލިޓް އަލުން ކުލަބަށް އައިއިރު ހުރީ އަނިޔާގައި ކަމަށެވެ. އެކަމުގެ ސަބަބުން އޭނާ އަށް ޕްރީ ސީޒަން ގެއްލުނު ކަމަށާއި، ސުޕަ ކަޕްގައި އޭނާ ލައްވާ ކުޅުވުނީ މާއަވަހަށް ކަމަށް ޓުޗެލް ބުންޏެވެ. އެއާއެކު، އަނެއްކާ ވެސް ޑި ލިޓް އަށް އަނިޔާ ލިބުނުކަން އޭނާ ފާހަގަ ކުރި އެވެ. ނަމަވެސް އޭނާ އަންނަނީ އަނެއްކާ ވެސް ޓީމުގައި ހިމެނި، ފޯމަކަށް އެޅެމުން ކަމަށް ޓުޗެލް ބުންޏެވެ.

ބަޔާންގައި ހޭދަކުރި ދެ ސީޒަންގެ ތެރޭގައި ޑި ލިޓް ވަނީ މިހާތަނަށް އެ ކުލަބަށް 55 މެޗު ކުޅެދީ، ހަތަރު ލަނޑު ޖަހައިފަ އެވެ. ބަޔާނާއެކު އޭނާ ވަނީ ޖަރުމަނު ލީގު އަދި ޖަރުމަނު ސުޕަ ކަޕް ކާމިޔާބު ކޮށްފަ އެވެ.