ސިޓީ ކައުންސިލުގެ ބޮޑެތި ޕްރޮޖެކްޓްތައް ސަރުކާރުގެ ދަށަށް ބަދަލުކުރުމުގައި ގޯހެއް ނެތް ކަމަށް ލޯކަލް ގަވަރމަންޓު އޮތޯރިޓީ (އެލްޖީއޭ)ގެ ޗީފް އެގްޒެކެޓިވް އޮފިސަރު (ސީއީއޯ) ޑރ. މަރިޔަމް ޒުލްފާ ވިދާޅުވެއްޖެއެވެ.

"ރާއްޖެ އެމްވީ" އަށް މައުލޫމާތުދެއްވަމުން ޑރ. ޒުލްފާ ވިދާޅުވީ އެއީ ޤާނޫނު އަސާސީއާ ޚިލާފު ކަމެއް ކަމަށް ވިދާޅުވެ ބައެއް ބޭފުޅުން އެކްސްގައި ޕޯސްޓްކުރެއްވި ނަމަވެސް، އެއީ ޤާނޫނު އަސާސީއާ ޚިލާފު ކަމެއް ކަމަށް އެއްގޮތަކަށް ވެސް ދެކެވަޑައިނުގަންނަވާ ކަމަށެވެ. ސަބަބަކީ މާލެ ސިޓީ ކައުންސިލްގެ ބޯޑަކީ ކައުންސިލްގެ އަމިއްލަ ނިންމުންތައް ނިންމުމުގެ އިޚްތިޔާރު އޮންނަ ބޯޑަކަށް ވުން ކަމަށް އޭނާ ވިދާޅުވިއެވެ.

މީގެ އިތުރުން އެ ބޯޑުން ނިންމާ ނިންމުމަކީ ރަނގަޅު ނިންމުމެއް ކަމަށް ލަފާކުރައްވާ ކަމަށް ވެސް އޭނާ ވިދާޅުވިއެވެ. އެހެންކަމުން މާލެ ސިޓީ ކައުންސިލްގެ އެ ނިންމުމުގައި މައްސަލަ އެއް އޮތް ކަމަށް ޤަބޫލު ނުކުރައްވާ ކަަމަށް ޑރ. ޒުލްފާ ވިދާޅުވިއެވެ.

ޑރ. ޒުލްފާ އިތުރަށް ވިދާޅުވީ ޤާނޫނު އަސާސީގައި ލާމަރުކަޒީ ބާބުގައި ކައުންސިލްގެ މަސްޢޫލިއްޔަަތުތަކުގެ ތެރޭގައި ވެސް ބޮޑެތި މަޝްރޫޢުތައް ހިންގުން ނުހިމެނޭކަމަށެވެ.

މާލެ ސިޓީ ކައުންސިލުގެ މޭޔަރު ކަމަށް އިންތިޚާބުވެވަޑައިގެންފައިވާ ޢާދަމް އާޒިމް، މޭޔަރު ކަމުގެ ހުވާކުރެއްވުމުގެ ކުރިން މާލެ ސިޓީ ކައުންސިލުން ހިންގަމުންދިޔަ ބޮޑެތި މަޝްރޫއުތައް އިންފްރާސްޓްރަކްޗާ މިނިސްޓްރީގެ ދަށަށް ބަދަލުކުރަން ފާސްކުރީ ސަރުކާރު ހިންގާ ޕީޕީއެމް އަދި ޕީއެންސީގެ މެޖޯރިޓީ އޮންނަ މާލެ ސިޓީ ކައުންސިލުން ބުދަ ދުވަހުގައި ބޭއްވި ކައުންސިލް ބައްދަލުވުމުގައެވެ.

އެގޮތުން އެ ބައްދަލުވުމުގައި ބައިވެރިވެވަޑައިގެންނެވި ރައީސް އޮފީހުގެ ކޯޕަރޭޓް ޑިވެލޮޕްމަންޓް މިނިސްޓަރު މުހައްމަދު ޝާހިދު ހުށަހަޅުއްވާފައި ވަނީ 100 މިލިއަން ރުފިޔާއަށް ވުރެ އަގު ބޮޑު ބައެއް މަޝްރޫއުތައް އިންފްރާސްޓްރަކްޗާ ވުޒާރާގެ ދަށަށް ބަދަލުކުރުމަށެވެ. އެ ހުށަހެޅުމާއި އެއްގޮތަށް ބަދަލުކުރަން ނިންމާފައިވަނީ ލޯކަލް މާރުކޭޓް އަދި ޕާކިން ބިލްޑިންތަކުގެ މަޝްރޫއުއެވެ. ބުދަ ދުވަހުގެ އެޖެންޑާގައި އޮތީ އެ މައްސަލައާ މެދު މަޝްވަރާކުރުމެވެ. އެހެން ނަމަވެސް އެ އެޖެންޑާއާ ޚިލާފަށް އެކަން ނިންމާފައިވަނީ ޕީއެންސީ-ޕީޕީއެމްގެ މެޖޯރިިޓީގެ ބޭނުން ހިފައިގެންނެވެ.

ސިޓީ ކައުންސިލުން މި ނިންމުން ނިންމާފައިވަނީ މާލެ ސިޓީ ކައުންސިލުގެ މޭޔަރު ކަމަށް އިންތިހާބުވެވަޑައިގެންނެވި ޢާދަމް އާޒިމު ހުވާކުރެއްވުމުގެ ރަސްމިއްޔާތު މި އަންނަ ހޯމަ ހޯމަ ދުވަހުގެރޭ ބޭއްވުމަށް ނިންމާފައިވަނިކޮށެވެ.