ޢާއިލާ މެންބަރެއްގެ ކުއްލި މަރުން ކުރިވި އިޙްސާސްތައް ގެނެސްދިން 'ހޮލޮބޮކްސް': އެތައް މޭލެއްގެ ދުރުން ސީދާ ކޮޓަރިއަށް!

އިންތިހާ ހަލުވި ދުވެލީގައި، އިންޤިލާބީ ބަދަލުތަކެއް ގެނެސްދޭ ޓެކްނޮލޮޖީއަކީ ދުނިޔެވީ ދިރިއުޅުމުގައި އޮންނަ ރާސްތާތަކުގެ ދުރުކަން ފޮހެލަދޭ އެއްޗެކޭ ބުނެ އުޅެނީ ސަބަބެއް ނެތިއެއް ނޫނެވެ. ފައިމަގުގައި ފަސޭހައިން ހިނގާފައި ނުދެވޭ ހިސާބުގައި ހުރި މީހަކަށް ގޮވާލައިދިން ފޯނާ ހިސާބުން ފެށިގެން ގޮސް، އެއަށް ވުރެ ދުރުން، ދޭސީ އިމުން ބޭރުގައި ތިބި އެތައް ބަޔަކަށް މަންޒަރާއެކު ވާހަކަދައްކާލެވޭ ހިސާބަށް ޓެކްނޮލޮޖީ ވަނީ ދުނިޔެ 'ކުޑަކޮށްދީފަ'އެވެ. ޓެކްނޮލޮޖީއަކީ ތާ އަބަދު ބަދަލުވެ، އަދާހަމަ ނުވަތަ އެއަށްވުރެވެސް ދުރަށް ފިޔަވަޅު އަޅަމުން ދާ ބަހާއެއް ކަމުން، މި ދެންނެވި ބީދައިން ދުރު ރާސްތާ ގާތް ކޮށްދިނުމުގައި އަނެއްކާވެސް މި ވަނީ އިންޤިލާބީ އުފެދުމެއް އީޖާދު ކޮށްފައެވެ.

އަދުގެ ހަލަބޮލި ދުނިޔޭގައި އެމީހަކާ އެމީހަކު، ޒާތީ ކަންކަމުގައި އަވަދި ނެތި އުޅެން މަޖުބޫރުވެފައި އޮތް އިރު، އެކަނިވެރި ކަމުގެ އިޙްސާސް ކުރަން ޖެހޭ ފަހަރުތައް އާދެއެވެ. އެފަދަ ވަގުތެއްގައި އެންމެ ބޭނުންވާ އެއް ކަމަކަށް ގިނަ ފަހަރު  ވެފައި އޮންނަނީ، ތިބާ ލޯބިވާ މީހަކާ އެ ވާހަކަތައް ހިއްސާކޮށް، ތިބާ ދެކެ ލޯބިވާ މީހުންގެ އޯގާތެރިކަމާއި އަޅާލުމެވެ. ނަމަވެސް އެމީހަކީ ތިބާ ހުރި މަންޒިލާ އެތައް މޭލެއް ދުރުގައި ހުރި މީހަކަށް ވެއްޖެނަމަ ދެން ހަދާނީ ކިހިނެއް ހެއްޔެވެ؟ ވީޑިއޯ ކޯލަކުންވެސް އެ ޖަޒުބާތުތައް ބަންޑުން ކުރެވެން ނެތް އިރު، ދެން ހަދާނީ ކިހިނެއް ހެއްޔެވެ؟

'ހޮލޮބޮކްސް'ގެ ނަމުގައި ޓެކްނޮލޮޖީގެ މޭސްތިރިން ގެނެސްދިނީ އެ ކަމުގެ ޙައްލެވެ. ދުނިޔޭގެ އަނެއް ބިތުގައި ހުރި މީހަކުވެސް ތިބާގެ ގާތަށް ގެނެސްދީގެންނެވެ.

މި އީޖާދުގެ މޭސްތިރިންނަކީ ނެދަލަންޑްސްގެ ހޮލޮކަނެކްސްޓް ނަމަކަށް ކިއާ ކުންފުންޏެވެ. މި އީޖާދު ބިނާވެގެން ވަނީ ދެފުށް ފެންނަ، 86 އިންޗީގެ ސްކްރީނެއް ވަށައިގެންނެވެ. އެންމެ ފަހުގެ، ޒަމާނީ ސޮފްޓްވެއަރތަކާއި ހަރޑްވެއަރތައް ބޭނުންކޯށްގެން، ޙަޤީޤީ މީހާއާއި އިންތިހާއަށް ހުރިހާ ގޮތަކުންވެސް ވައްތަރު، އެޗްޑީ، 3-ޑީ ހޮލޮގްރާމެއް، 4-ކޭ ކޮލިޓީގައި ދުނިޔޭގެ ކޮންމެ ހިސާބަކުން، ތިބާ ހުރި ހިސާބަށް ގެނެސްދެއެވެ. ބޭނުންވާ ހަމަ އެކަނި އެއްޗަކީ އިންޓަރނެޓް ކަނެކްޝަނަކާއި ހޮލޮބޮކްސްއެކެވެ.

ހޮލޮބޮކްސްގެ ތެރެއިން ފެންނަން ބޭނުންވާ މީހާ އަތުގައި، އޭނާގެ މަންޒަރުތައް ވީޑިއޯ ކުރުމަށް 4-ކޭ ކޮލިޓީގެ ކެމެރާއެއް އޮންނަން ޖެހެއެވެ. އަދި އެމީހަކީ ފުދޭ ވަރަކަށް އަލި ވަންނަ ތަނެއްގައި ހުންނަ މީހަކަށްވެސް ވުން މުހިންމުވާ އިރު، އެންމެ އެދެވިގެން ވަނީ އެމީހެއްގެ ފަހަތުގައި ހުދުކުލައިގައި ހުރުމެވެ. އެއީ ހުދު ފޮތިގަނޑެއް ނުވަތަ ހުދު ފާރެއް ނުވަތަ ހުދު ފިލާ ޖެހި ކަބަޑެއްގެ އެހީގައި ކަމުގައި ވީ ނަމަވެސް ހެވެވެ.

ހޮލޮކަނެކްޓްސްގެ އުންމީދަކީ، ހޮލޮބޮކްސްގެ އެހީގައި، އިޖުތިމާޢީ އެކަހެރިކަމާއި އެކަނިވެރިކަން ތަޙައްމަލު ކުރަމުންދާ މީހުންނަށް ލުޔެއް ހޯދައިދިނުމެވެ.

ހޮލޮބޮކްސްއަކީ ހޮލޮކަނެކްޓްސްގެ ސީއީއޯ، އާންޑްރޭ ސްމިތުއާއި އޭނާގެ ބިޒްނަސް ޕަރޓްނަރު މަރނިކްސް ލޮކްގެ ޚިޔާލަށް ފަރުމާކޮށްފައި ވާ ޓެކްނޮލޮޖީއެކެވެ. ސްމިތުއާއި ލޮކް، ހޮލޮކަނެކްޓްސް އުފެއްދީ، 2020 ވަނަ އަހަރުގެ ތެރޭގައެވެ. އެއީ ޢާއިލީ މެންބަރެއް މި ދުނިޔެއާ ވަކިވި ހިސާބުންނެވެ. ސްމިތުއާއި ލޮކްއަކީ ޢާއިލީ ގޮތުން ގުޅުން އޮންނަ ދެ މީހުންނެވެ. އެ މީހުންގެ ޚިޔާލުގެ ފެށުން އައީ، މާޒީގެ ހަނދާންތައް އައުކޮށްދެނިވި ޑިވައިސް އީޖާދު ކުރުމާ ހިސާބުންނެވެ. ލޯބިވާ މީހަކު މި ދުނިޔެއާ ވަކިވެ ދިޔައެއް ކަމަކު، ޙަޤީޤީ ދުނިޔޭގައި އެމީހަކު ހުރި ކަމުގެ އިޙްސާސްތައް، ހަނދާންތަކެއްގެ ގޮތުގައި އައު ކުރުމަށް ފުރުޞަތު ފަހިވަނިވި އީޖާދެއް ކުރުމުގެ ޚިޔާލު ފުޅާ ވަމުން ގޮސް، ހޮލޮބޮކްސް އުފެއްދީއެވެ.

ޓެކްނޮލޮޖީގެ ދުނިޔޭގައި އެންމެ ވަރުގަދަ އިވެންޓްގެ ގޮތުގައި ސިފަކުރަމުން އަންނަ ކޮންޒިއުމަރ އިލެކްޓްރޯނިކްސް ޝޯވގެ މިއަހަރުގެ އިވެންޓަށް ޒިޔާރަތްކުރާ މީހުންގެ ފަރާތުންވެސް ހޮލޮބޮކްސްއަށް ބޮޑު ތަރުޙީބެއް ދަނީ ލިބެމުންނެވެ.

86 އިންޗީގެ ހޮލޮބޮކްސްއަކީ ތިބާ ދިރިއުޅޭ ގެއަށް ނުވަތަ އޮފީހަށް މާ ބޮޑު ޑިވައިސްއަކަށް ވާ ނަމަ، ހޮލޮކަނެކްޓްސްއިން ވަނީ 22 އިންޗީގެ ހޮލޮބޮކްސް މިނީވެސް ތަޢާރަފު ކޮށްފައެވެ. 86 އިންޗީގެ ހޮލޮބޮކްސްގެ ހަރޑްވެއަރ އަގު އުޅޭނީ 40000 ޑޮލަރާއި 50000 ޑޮލަރާ ދެމެދުގައި ކަމަށާ، ހޮލޮބޮކްސް މިނީގެ އަގު އުޅެނީ 7000 ޑޮލަރާއި 10000 ޑޮލަރާ ދެމެދު އަގުތަކެއްގައި ކަމަށް ހޮލޮކަނެކްޓްސްއިން އަންދާޒާ ކުރެއެވެ.