ކިއޭޝް ތަޢާރަފު ކޮށްދިނީ 'ޑިސްޕްލޭސް ވަޔަލަސް ޓީވީ' އެއް
ވާގަނޑެއް ނެތި ބޭނުންކުރެވޭ ޓީވީ
ޓެކްނޮލޮޖީގެ ރޭހުގައި ހަލުވި ދުވެލީގައި ކުރިއަރަމުން އަންނަ އަދުގެ ދުނިޔޭގައި އަދިވެސް އެ ވަޞީލަތެއްގެ ބޭނުން އެންމެ ގިނަ ބަޔަކު ހިފާ އެކައްޗަކީ ޓީވީއެވެ. ކޮންމެ ހިސާބަކަށް ބަލައިލި ކަމުގައި ވީ ނަމަވެސް، ޓީވީއެއް ނެތް ގެއެއް ވަރަށް މަދު ވާނެއެވެ. ތަފާތު ވަނީ ގެންގުޅޭ ޓީވީގެ ފެންވަރާއި، ޤާބިލިއްޔަތުކަމާއި ސައިޒު ފަދަ ކަންކަމެވެ. މުޅި ދުނިޔެއަށް ބެލި ކަމުގައި ވީ ނަމަވެސް ޓެކްނޮލޮޖީގެ މައިދާނުގައި އެންމެ ފޯރިގަދަ އިވެންޓްގެ ގޮތުގައި ސިފަކުރާ ކޮންޒިއުމަރ އިލެކްޓްރޯނިކްސް ޝޯވގެ މި އަހަރުގެ ހަރަކާތުގައި، ޓެކްނޮލޮޖީގެ ރޮނގުން އިންޤިލާބީ ކުރިއެރުންތަކެއް ގެނެސްދިން ޓީވީތަކެއް ވަނީ ފެނިފައެވެ.
ކޮންޒިއުމަރ އިލެކްޓްރޯނިކްސް ޝޯވގެ މި އަހަރުގެ އިވެންޓަށް އެފަދަ ޓީވީއެއް ގެނެސްދިން އެކަކީ އެރޮން ކިއޭޝްއެވެ. ކިއޭޝް ތަޢާރަފު ކޮށްދިނީ 'ޑިސްޕްލޭސް ވަޔަލަސް ޓީވީ' އެވެ. މި ޓީވީއަކީ ވާތަކެއް ގުޅަން ނުޖެހޭ، އަދި ފަސޭހަކަމާއެކީ ފާރުގައި ހަރުކޮށްލެވޭ ގޮތަށް ފަރުމާ ކޮށްފައި ވާ ޓީވީއެކެވެ.
ޓީވީ އުފައްދާފައި ވަނީ ވެކިއުމް ސީލް ޓެކްނޮލޮޖީ ބޭނުން ކޮށްގެންނެވެ. މިއީ ޓީވީއަށް ގުޅަންޖެހޭ ކޭބަލްތަކާ ހެދި ތަނުގެ ރީތިކަން ގެއްލިދާނެތީ ކަންބޮޑުވާ މީހުންގެ ހާސްކަން ފިލުވާލަދޭނެ ޓެކްނޮލޮޖީއެކެވެ. ނުވިތާކަށް، ޓީވީ ފަރުގައި ހަރުކުރުމަށްޓަކައި އެއްވެސް ވަރަކަށް ފާރު ތޮރުފާކަށް ނުވަތަ ފްރޭމެއް ހަރުކުރާކަށްވެސް ނުޖެހެއެވެ. އެހެން ތަނަކަށް ޓީވީ ބަދަލު ކުރަން ޖެހޭ ދުވަހަކުން ފާރުގައި ލޯވަޅުތަކެއް އަޅާފައި ހުރީތީ އެކަމާ ދެރަވެގެން އުޅޭކަށްވެސް ދެން ނުޖެހޭނެއެވެ.
ކިއޭޝް ބުނާ ގޮތުގައި، ރަހަ ހަމަ ތަނެއް ވިއްޔާ އެތަނެއްގައި ޑިސްޕްލޭސް ޓީވީއަށް ޖާގަ އޮންނާނެއެވެ.
ޑިސްޕްލޭސް ޓީވީ ފަރުމާ ކޮށްފައި ވަނީ އެކްޓިވް ލޫޕް ވެކިއުމް ޓެކްނޮލޮޖީ ހިމެނޭ ގޮތަށެވެ. ޓީވީގެ ދެފަރާތުގައި ވާ އަތްގަނޑަށް ފިތާލުމާއެކު، އޮމާން ކޮންމެ ތަނެއްގައި ޓީވީ ހުންނާނީ ހަރުވެފައެވެ. މިއީ ޓީވީ ވެއްޓިދާނެތީ ބިރުގަންނަ މީހުންގެ ހިތް ނުތަނަވަސް ކުރުވާނެ ކަމަކަށް ވުން ގާތެވެ.
ޑިސްޕްލޭސް އަކީ، މޫނުމަތިން އެއީ ކާކުކަން ދެނެގަންނަ ޓެކްނޮލޮޖީވެސް ހިމެނޭ ޓީވީއެކެވެ. އެހެން ކަމުން، ގޭގެ އެކި ތަންތަނުގައި އެ ޓީވީ ބޭނުން ކުރާ އިރު، އެކި މީހުންނަށް ޚާއްޞަވާ ގޮތަށް ޓީވީގެ ސެޓަޕް ހެދުމުގެ ފުރުޞަތު ތަނަވަސް ކޮށްދެއެވެ.
ޑިސްޕްލޭސްއަކީ މިހާތަނަށް މުޅި ދުނިޔޭގައިވެސް އުފެއްދި ޙަޤީޤީ، ހަމަ އެކަނި ވަޔަލަސް ޓީވީ ކަމަށް އެ ކުންފުނިން ބުނެއެވެ. ޑިސްޕްލޭސް ޓީވީ އުފެއްދި ކުންފުންޏަށް ކިއަނީވެސް ޑިސްޕްލޭސްއެވެ. ޑިސްޕްލޭސް ޓީވީއެއް ބޭނުން ނަމަ މިހާރުވެސް ރިޒަރވް ކުރުމުގެ ފުރުޞަތު އެބަ އޮތެވެ. ބޭނުން ނުވާ ނަމަ، ފައިސާ އަނބުރާ ލިބޭ ގޮތަށް ރީފަންޑް ޕޮލިސީއެއްވެސް އޮތްކަމަށް ވެއެވެ. ޚަބަރު ލިބޭ ގޮތުގައި ޑިސްޕްލޭސް ޓީވީ ބާޒާރަށް ނެރެވޭ ވަރު ވާނީ މި އަހަރުގެ މެދު ތެރޭގައެވެ.
