10 ކުލަބުގެ ސޮޔާއެކު އެކްސްޓްރާ އޯޑިނަރީ ކޮންގްރެސްއެއް ބާއްވަން ހުށަހަޅައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް، 10 ކުލަބުގެ ސޮޔާއެކު ހުށަހަޅައިފި އެވެ.

އެފްއޭއެމްގެ އެކްސްޓްރާ އޯޑިނަރީ ކޮންގްރެސްއެއް ބާއްވަން ހުށަހެޅީ ރާއްޖޭގެ އެންމެ ފަހުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން އިސް ނަގައިގެންނެވެ. މާޒިޔާ އަކީ ކުރިއަށް އޮތް އެެފްއޭއެމްގެ އިންތިޚާބުގައި، އަޙުމަދު ޠާރިޤް (ޓޮމް) އަށް ތާއިދު ކުރާ ކުލަބެކެވެ.

މާޒިޔާ އާއެކު، އެކްސްޓްރާ އޯޑިނަރީ ކޮންގްރެސްއަކަށް އެދުނު އެހެން ކުލަބުތަކަކީ، ކުލަބު ވެލެންސިއާ، ޓީސީ ސްޕޯޓްސް ކުލަބު، މަހިބަދޫ ސްޕޯޓްސް ކުލަބު، އެލްޓީ ސްޕޯޓްސް ކުލަބު، ކުޑަ ހެންވޭރު ޔުނައިޓެޑު، ބީޖީ ސްޕޯޓްސް، ޓެންޓް ސްޕޯޓްސް ކުލަބު، ސީބީއެލް ސްޕޯޓްސް އަދި ދަ ގްރޭންޑޭ ސްޕޯޓްސް ކުލަބު އެވެ.

މާޒިޔާގެ ޗެއާމަން އަޙުމަދު ސާޖިދު ސޮއިކުރައްވާ އެފްއޭއެމަށް ފޮނުއްވި ސިޓީގައި ވަނީ ގިނަ ކަންތައްތަކެއް ފާހަގަކުރައްވާފަ އެވެ. އެގޮތުން، އެފްއޭއެމްގައި ހުންނަ ޖެހޭ ބައެއް ކޮމެޓީތައް ނެތުމާއި، އަނެއް ބައި ކޮމެޓީތައް ޤަވާއިދާ ޚިލާފުކަން ވަނީ ފާހަގަކުރައްވާފަ އެވެ. ހަމައެއާއެކު، އެފްއޭއެމްގެ މަގާމުތަކުން ބައެއް ބޭފުޅުން އިސްތިއުފާ ދީފައިވާކަން ވެސް ވަނީ ފާހަގަކުރައްވާފަ އެވެ.

ކުލަބުތަކުގެ އެދުމުގެ މަތިން، އެފްއޭއެމްގެ އަސާސީ ޤަވާއިދު ބުނާ ގޮތުން، 14 ދުވަހުގެ ތެރޭގައި އެކްސްޓްރާ އޯޑިނަރީ ކޮންގްރެސްއެއް ބާއްވަން ޖެހޭނެ އެވެ. އެ މުއްދަތުގައި އެފްއޭއެމުން ކޮންގްރެސްއެއް ނުބާއްވާފައި ނަމަ، ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި ސަރަހައްދީ ފުޓުބޯޅަ އިދާރާ (އޭއެފްސީ)ގެ އެހީތެރިކަމާއެކު ކުލަބުތަކަށް އަމިއްލަ އަށް އެކްސްޓްރާ އޯޑިނަރީ ކޮންގްރެސް ބޭއްވޭނެ އެވެ.