ހަ ކުލަބުގެ ވޯޓާއެކު ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އިންތިޚާބު މުޙައްމަދު ރަނޭޝް (ރަނޭ) ކާމިޔާބުކުރައްވައިފިއެވެ.

މައްސަލަ ގަނޑެއްގެ ތެރޭގައި ގިނަ ދުވަސްތަކެއް ވަންދެން އޮތް ވީއޭއެމުގެ އިންތިޚާބު ބުރާސްފަތި ދުވަހު ބޭއްވީ ދުނިޔޭގެ ވޮލީބޯޅައިގެ މައި ޖަމުޢިއްޔާ (އެފްއައިވީބީ) އާއި އޭޝިއަން ވޮލީބޯލް ކޮންފެޑެރޭޝަން (އޭވީސީ) އިސްވެ އޮވެ އުފެއްދި "އެޑްހޮކް ކޮމިޝަން" އިން ވީއޭއެމުގެ މައްސަލަ ދާދި ފަހުން ނިންމުމާއެކުއެވެ. އެގޮތުން ވީއޭއެމުގެ ޖެނެރަލް އިލެކްޓޯރަލް އެސެމްބްލީ ބުރާސްފަތި ދުވަހުގެ ހަވީރު ޒުވާނުންގެ މަރުކަޒުގެ ސެމިނާ ރޫމުގައި ބާއްވާފައިވަނީ އިލެކްޓޯރިއަލް ކޮމިޓީގެ ބެލުމުގެ ދަށުންނެވެ.

މި އިންތިޚާބުގައި ނުވަ ކުލަބަކަށް ވަނީ ވޯޓުލުމުގެ ޙައްޤު ލިބިފައެވެ. އެއީ ދިވެހި ސިފައިންގެ ކުލަބު، ޕޮލިސް ކުލަބު، އައްޑޫ ސްޕޯޓްސް ކުލަބު، ސްޕޯޓްސް ކުލަބު ހޯކްސް، ގުޑީސް ސްޕޯޓްސް ކުލަބު، މޯލްޑިވިއަން ސްޕޯޓްސް އެންޑް ރެކްރިއޭޝަން، ޔޫތު ނިއު ޖެނަރޭޝަން އަދި ކުލަބު ހާފް ލައިން ލިންކޭޖެވެ.

މި އިންތިޚާބުގައި ރަނޭއާއެކު ރައީސްގެ މަޤާމަށް ދެން ވާދަކުރެއްވީ ވީއޭއެމުގެ ކުރީގެ ނައިބު ރައީސް އިލްޔާސް ވަހީދު (އިއްލަ) އެވެ. މި އިންތިޚާބު ފެށިއިރު، އިންތިޚާބު ކުރިއަށްދިޔަ ހޯލުގައި އިއްލަ އިންނެވި ނަމަވެސް، ވޯޓުލުން ފެށުމުގެ ކުރިން އިއްލައާއެކު ތިން ކުލަބަކުން ވަނީ ކޮންގްރެސް ދޫކޮށް ނުކުމެފައެވެ. އެ ކުލަބުތަކުން ކޮންގްރެސް ދޫކޮށް ނުކުތީ، ވީއޭއެމުގެ މަޤާމުތަކަށް ކުރިމަތިލާން ހުޅުވާލި މުއްދަތު ކަމަށްވާ މިދިޔަ އަންގާރަ ދުވަހުގެ މެންދުރު 12:00 ގެ ފަހުންވެސް މަޤާމުތަކަށް ކުރިމަތިލެއްވި ބޭފުޅުންގެ ކެންޑިޑެންސީ ބަލައިގަންނަން އެޑްހޮކް ކޮމިޝަނުން ނިންމުމުމާ ގުޅިގެންނެވެ.

ނުރުހުން ފާޅުކޮށް އިއްލައާއެކު ތިން ކުލަބެއް އިންތިޚާބީ ކޮންގްރެސް ދޫކޮށް ނުކުތް ނަމަވެސް، އިލެކްޓޯރިއަލް ކޮމިޓީން ވަނީ ވޯޓުލުން ކުރިއަށްގެންގޮސްފައެވެ. އެއާއެކު ވީއޭއެމުގެ ރައީސަކަށް ރަނޭ އިންތިޚާބުވީ ވޯޓުގައި ބައިވެރިވި ހަ ކުލަބުގެ ތާއީދާއެކުއެވެ.

ވީއޭއެމުގެ ރައީސަކަށް ރަނޭ އިންތިޚާބުވިއިރު، 1993 ވަނަ އަހަރުން ފެށިގެން ވޮލީބޯޅަ ކުޅެން ފެށި މަޝްހޫރު ސެޓަރު ރަނޭއަކީ ދޯހާ އޭޝިއަން ގޭމްސްގައި ވާދަކުރި ރާއްޖޭގެ ޤައުމީ ވޮލީބޯޅަ ޓީމުގެ ކެޕްޓަނެވެ. އަދި ޤައުމީ ވޮލީބޯޅަ މުބާރާތުގެ އެންމެ މޮޅު ސެޓަރުގެ މަޤާމު ޖެހިޖެހިގެން ތިން އަހަރު ހޯދާފައިވާ ރަނޭ ވަނީ ހިޒް ކުލަބަށް ޤައުމީ ތަށި މިލްކުކޮށްދިނުމުގައި މުހިންމު ދައުރެއް އަދާކުރައްވާފައެވެ. މީގެ އިތުރުން އައްޑޫ ސްޕޯޓްސް ކުލަބާއި، ދ. ވާނީ ޒުވާނުގެ ޖަމުޢިއްޔާ އާއި، ދިވެހި ސިފައިންގެ ކުލަބު އަދި މޯލްޑިވިއަން ސްޕޯޓްސް ކުލަބުން ޤައުމީ ތަށި އުފުލާލިއިރު، އެ ކުލަބުތަކުގެ ސެޓަރަކީވެސް ރަނޭއެވެ. މީގެ އިތުރުން ކެމްޕޯ އާއި، ރެފްރޯލް އާއި، ބީޗް ބޯއީޒް ޤައުމީ މުބާރާތަށް ކޮލިފައިކޮށްދީ، އެ ޓީމުތައް ޤައުމީ ފައިނަލަށް ގެންގޮސްދީފައި ވަނީވެސް ރަނޭގެ މޭސްތިރިކަމުގެ ދަށުންނެވެ.

ރާއްޖޭގެ ޤައުމި އެއާލައިން، މޯލްޑިވިއަންގެ ޕައިލެޓެއްގެ ވަޒީފާ އަދާކުރަމުންދާ ރަނޭއަކީ މޯލްޑިވިއަންގެ ވޮލީބޯޅަ ޓީމު އުފެއްދުމުގައި މުހިންމު ދައުރެއް އަދާކުރެއްވި ބޭފުޅެކެވެ. އަދި ކާބޯތަކެތީގެ ވިޔަފާރި ފުޅާދާއިރާއެއްގައި ކުރަމުންދާ ޗީބޯގެ ހިއްސާދާރެއްގެ އިތުރުން، ޗީބޯ އެކެޑަމީ އުފައްދައި، ތުއްތު ކުދިން ވޮލީބޯޅައަށް ނެރުމަށް ރަނޭ ދަނީ ގިނަ މަސައްކަތްތަކެއް ކުރައްވަމުންނެވެ.

ކުރިއަށް އޮތް ހަތަރު އަހަރަށް ވީއޭއެމުގެ ރައީސްގެ މަޤާމަށް ރަނޭ އިންތިޚާބުވެވަޑައިގެންނެވިއިރު، މީގެ ކުރިން 2016 ވަނަ އަހަރު ބޭއްވި ވީއޭއެމުގެ އިންތިޚާބުގައި ރައީސަކަށް އިންތިޚާބުވެވަޑައިގަތް މުޙައްމަދު ލަތީފުގެ ޓީމުގައިވެސް ރަނޭ ހިމެނުނެވެ. އެގޮތުން އެ ފަހަރު ރަނޭ އެންމެ ފުރަތަމަ މަސައްކަތްކުރެއްވީ ޚަޒާންދާރެއްގެ ގޮތުގައެވެ. އެކަމަކު ފަހުން ސީނިއާ ނައިބު ރައީސަކަށް ރަނޭ ހަމަޖެއްސި ނަމަވެސް، 2018 ވަނަ އަހަރު ރަނޭ ވަނީ އިސްތިއުފާދެއްވާފައެވެ.

މި ފަހަރުގެ އިންތިޚާބުގައި ހަ ކުލަބަކުން ރަނޭއަށް ތާއީދުކުރިއިރު، ރަނޭގެ ނައިބު ރައީސްކަމަށް އިންތިޚާބުވީ ޤައުމީ ވޮލިބޯޅަ ޓީމުގެ މެނޭޖަރުގެ އިތުރުން ވޮލީބޯޅަ ކޯޗެއްގެ ގޮތުގައިވެސް މަސައްކަތްކުރައްވާ އަލީ އަޝްރަފް (އަޝްރާ) އެވެ. އަދި ޚަޒާންދާރަކަށް އިންތިޚަބުވީ 1979 ވަނަ އަހަރު ރީޔޫނިއަންނަށް ދިޔަ ޓީމުގައި ހިމެނުނު މުޙައްމަދު ރާމިޒް (ރާންބެ) އެވެ. ރާންބެ މީގެ ކުރިން ވަނީ ސާފް ގޭމްސްގައި ޤައުމީ ވޮލީބޯޅަ ޓީމުގެ މެނޭޖަރުގެ މަޤާމުވެސް އަދާކޮށްފައެވެ.

މީގެ އިތުރުން މި އިންތިޚާބުގައި ރޫލްސް ކޮމިޝަނަށް އިންތިޚާބުކޮށްފައިވަނީ ވީއޭއެމުގެ ކުރީގެ ޖެނެރަލް ސެކްރެޓަރީ އަޙްމަދު އަދީލް (ބޭބެ) އާއި، މުޙައްމަދު ހަމީދު އަދި މުޙައްމަދު ޝަހާދެވެ. ޓެކްނިކަލް އެންޑް ޑިވެލޮޕިމެންޓް ކޮމިޝަނަށް ޤައުމީ ވޮލީބޯޅަ ޓީމުގެ ކޯޗު މުޙައްމަދު ސާޖިދު (ބޮޑު ކާއްޓޭ) އާއި، ވޮލީބޯޅަ ކޯޗު އަޙްމަދު ޝުއިބާއި، ބައިނަލްއަގުވާމީ ރެފުރީ އަޙްމަދު ސަލީމް (ކުނޑި) އިންތިޚާބުކުރިއިރު، ބީޗް ވޮލީ ކޮމިޝަނަށް އިންތިޚާބުކުރީ މީގެ ކުރިންވެސް އެ ކޮމިޝަނުގައި ހުންނެވި އަބްދުﷲ ނަޝީދު (އަބުޅޯ) އާއި، އިސްމާޢީލް ސަމާހު އާއި، އިސްމާޢީލް ޝަރީފާއި، ހުސައިން ޝަރީފް (ނަލަ) އަދި އަދުނާން އަބްދުއް ރަހީމެވެ.

ބުރާސްފަތި ދުވަހުގެ ހަވީރު ވީއޭއެމުގެ ކުރީގެ ރައީސް މުޙައްމަދު ރިޔާޒުގެ ބެލުމުގެ ދަށުން ވީއޭއެމުގެ އިންތިޚާބު ބޭއްވިއިރު، އެފްއައިވީބީ އާއި، އޭވީސީ އާއި، މޯލްޑިވްސް އޮލިމްޕިކް ކޮމިޓީ (އެމްއޯސީ) އަދި ސްޕޯޓްސް ކޮމިޝަނުން ވަނީ މި އިންތިޚާބު މޮނިޓާކޮށްފައެވެ.