މޯލްޑިވްސް ސައިކްލިންގ ކުލަބުގެ ރައީސްގެ މަގާމަށް އަޙްމަދު ވަޙީދު (ވައްޑެ) އިންތިޚާބު ކޮށްފިއެވެ.

ހޮނިހިރު ދުވަހު ބޭއްވި އެ ކުލަބުގެ ހިންގާ ކޮމިޓީގެ އިންތިޚާބުގައި ވޯޓުލުމުގެ ހައްގު 48 މެންބަރުންނަށް ލިބިގެންދިޔަ ނަމަވެސް، ވޯޓު ލާފައިވަނީ 27 މީހުންނެވެ.

މި އިންތިޚާބުގައި ރައީސް ކަމަށް ވައްޑޭ އެކަނި ކުރިމަތިލެއްވިއިރު، އޭނާ ހޮވިވަޑައިގަތީ ފެންނަ ނުފެންނަ ކަމަށް ނެގި ވޯޓުގައި 26 މީހުންގެ ވޯޓާއެކުއެވެ. ނުފެންނަ ކަމަށް ވޯޓު ދިނީ އެންމެ މީހެކެވެ.

ރައީސް ކަމަށް އިންތިޚާބު ވުމަށްފަހު ވައްޑޭ ވިދާޅުވީ އެ ކުލަބުގެ ހިންގާ ކޮމިޓީ ހޮވުމަށް ވޯޓު ދެއްވި ހުރިހާ ފަރާތްތަކަށް ވަރަށް ބޮޑަށް ޝުކުރުއަދާކުރާ ކަމަށާއި، މޯލްޑިވްސް ސައިކްލިންގ ކުލަބަކީ ބައިސްކަލު ކުޅިވަރު ކުރިއެރުވުމަށް މަސައްކަތް ކުރާނެ ކުލަބެއް ކަމަށެވެ. އަދި ވިދާޅުވީ އެ ކުލަބު މިހާ ހިސާބަށް އައިސްފައިވަނީ ވަރަށް ގިނަ ބައެއްގެ އެހީތެރިކަމާއެކުގައި ކަމަށާއި، އެގޮތުން ކުލަބަށް ރާއްޖޭގެ ޗެމްޕިއަން އިބްރާހީމް ޝަރީފް (ވީސަން ޝަރީފް) އަދި މުޙައްމަދު ތައުފީގު (ސައުތު ތައުފީގު) ދެއްވި އެއްބާރުލުމަށް ޝުކުރުއަދާކުރައްވާ ކަމަށްވެސް ވިދާޅުވިއެވެ.

މޯލްޑިވްސް ސައިކްލިންގ ކުލަބުގެ ނައިބު ރައީސް ކަމަށް ތިން ބޭފުޅަކު ހޮވަން ގަވާއިދުގައި ހިމަނާފައިވާއިރު، މަގާމަށް ކުރިމަތިލެއްވި ތިން ބޭފުޅުންވެސް ވަނީ އިންތިޚާބުވެވަޑައިގެންފައެވެ. އެގޮތުން ނައިބު ރައީސްގެ މަގާމަށް ހޮވިވަޑައިގަތް ތިން ބޭފުޅުންނަކީ މުޙައްމަދު އާދަމް، އަބްދުﷲ ފިރުޝާން އަދި އިބްރާހިމް ޝަމީމެވެ.

ހަޒާންދާރުގެ މަގާމަށް ކުރިމަތިލެއްވީ އެންމެ ބޭފުޅެކެވެ. އެހެންކަމުން ފެންނަ ނުފެންނަ ވޯޓުގައި މި މަގާމަށް ކުރިމަތިލެއްވި ހުސެއިން ސަމީރަށް ވަނީ 26 ވޯޓު ލިބިވަޑައިގެންފައެވެ. އަދި ހިންގާ ކޮމިޓީގެ މެންބަރު ކަމަށް ހޮވިފައިވާ ތިން ބޭފުޅުންނަކީ މުޙައްމަދު ޝުޖާއު، އިބްރާހީމް އިމްރާން އަދި ހުސެއިން ޝަރީފެވެ.