ފުޓުބޯޅަ ކޯޗިން ކެރިއަރުގައި އޭނާ އަކީ ކާމިޔާބު މީހަކަށް ވުމުގެ އެންމެ ބޮޑު އެއް ސަބަބަކީ، ސްޕެއިންގެ ބާސެލޯނާ ކަމަށް ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ހޮވާ އަހަރުގެ އެންމެ މޮޅު ކޯޗުގެ މަގާމު ހޯދުމަށްފަހު ވާހަކަ ދައްކަމުންނެވެ. އެންމެ މޮޅު ކޯޗަކަށް ގާޑިއޯލާ ހޮވުނީ، އިޓަލީގެ އިންޓަ މިލާނަށް އިރުޝާދު ދެމުން އަންނަ ސިމޯން އިންޒާގީ އަދި އިޓަލީ ޤައުމީ ޓީމުގެ ކޯޗު ލޫސިއާނޯ ސްޕަލެއްޓީއާ ވާދަކޮށެވެ.

އެވޯޑު ހާސިލު ކުރުމަށްފަހު ވާހަކަ ދައްކަމުން ގާޑިއޯލާ ބުނީ، އޭނާގެ ހިތާ ގުޅިފައިވާ ކުލަބަކީ، އަބަދު ވެސް ބާސެލޯނާ ކަމަށެވެ. އެގޮތުން، މިއަދު ކޯޗިން ކެރިއަރުގައި އޭނާ އަށް މިހިސާބަށް އާދެވުމުގެ އެންމެ ބޮޑު ސަބަބަކީ ވެސް ބާސެލޯނާ ކަމަށް ގާޑިއޯލާ ވަނީ ބުނެފަ އެވެ. ހަމައެއާއެކު، ބާސެލޯނާ އަކީ އޭނާގެ ޙަޔާތުގައި ވަރަށް މުހިންމު އެއް ބައި ކަމަށް ވެސް ގާޑިއޯލާ ބުންޏެވެ. އޭނާ ފާހަގަ ކުރި ގޮތުގައި، ފުޓުބޯޅައިގައި ބާސެލޯނާއާ ގުޅިފައި އޮންނާނީ ވަރަށް ފޮނި ހަނދާންތަކެވެ.

މީގެ އިތުރުން ގާޑިއޯލާ ބުނީ، އޭނާ އަށް އެ އެވޯޑު ލިބުނީ ވަރަށް ބުރަ މަސައްކަތުން ކަމަށެވެ. ޚާއްސަކޮށް އޭނާ އިރުޝާދު ދެމުން އަންނަ އިނގިރޭސި ޕްރިމިއާ ލީގުގެ މެންޗެސްޓަރ ސިޓީގެ ކުޅުންތެރިން ކުރި މަސައްކަތާއި، ޓީމާއެކު ދެއްކި ކުޅުން ވެސް އޭނާ ވަނީ ފާހަގަކޮށްފަ އެވެ. ސިޓީ އާއެކު އަށް އަހަރު ހޭދަކޮށްފައިވާ ކަމަށާއި، އެއީ ބުނެދޭން ވެސް ނޭނގޭހާ ގިނަ މަސައްކަތްތަކެއް ކުރެވުނު ދުވަސްތަކެއް ކަމަށް އޭނާ ބުންޏެވެ. މޮޅުވުމާއި، ބަލިވުމުގައި އެތައް ދުވަސްތަކެއް ހޭދަކޮށްފައިވާއިރު، މި ފާއިތުވި ދުވަސްތަކުގައި މަސައްކަތް ކުރި ގޮތް އެހެން މީހުންނަށް އިޙުސާސް ނުވެދާނެ ކަމަށް ވެސް އޭނާ ފާހަގަ ކުރި އެވެ.

ގާޑިއޯލާ ވަނީ 2013 ވަނަ އަހަރުން ފެށިގެން، 2016 ވަނަ އަހަރަށް ސްޕެއިންގެ ބާސެލޯނާ އަށް އިރުޝާދު ދީފަ އެވެ. އެ މުއްދަތުގައި އޭނާ ވަނީ ބާސެލޯނާ އާއެކު ގިނަ ކާމިޔާބީތަކެއް ވެސް ހާސިލުކޮށްފަ އެވެ. ބާސެލޯނާ އާއެކު އޭނާ ވަނީ ޖުމުލަ 14 ތައްޓެއް ކާމިޔާބު ކޮށްފަ އެވެ.