އަންނަ ދިރާސީ އައު އަހަރު ޤައުމިއްޔަތު މާއްދާ ކިޔަވައި ދިނުމަށް ކުރަން ޖެހޭ މަސައްކަތްތަކުގެ ތެރެއިން، މިހާރު ކުރިއަށް ދަނީ ޓެކްސްޓް ފޮތް އެކުލަވާލުމުގެ މަސައްކަތް ކަމަށް ދިވެހި ބަހާއި ސަގާފަތާއި ތަރިކައާއި ބެހޭ ވުޒާރާއިން ބުނެފިއެވެ.
ޤައުމިއްޔަތު ދިރުވާ އާލާކުރުމުގެ ގޮތުން ދިވެހި ގައުމިއްޔަތު ކިޔަވައި ދިނުމަށް ވަކި މާއްދާއެއް ތައުލީމުގެ މަންހަޖުގައި ހިމެނުމަށް ނިންމާ ސަރުކާރުން ވަނީ އެކަން އިޢުލާންކޮށްފައެވެ. އަދި އެ ނިންމުމާ އެއްގޮތަށް، ދިރާސީ އައު އަހަރު، ދިވެހި ގައުމިއްޔަތު މާއްދާ ކިޔަވައިދޭން ފަށާނެ ކަަމަށް ވެސް ސަރުކާރުން ވަނީ ބުނެފައެވެ.
މި ކަމާއި ގުޅޭ މައުލޫމާތު ސާފުކުރުމަށް ސުވާލުކުރުމުން ދިވެހި ބަހާއި ސަގާފަތާއި ތަރިކައާއި ބެހޭ ވުޒާރާގެ އޮފިޝަލަކު ރާއްޖެއެމްވީ އަށް ވިދާޅުވީ އެ މާއްދާ އެކުލަވާލުމުގެ މަސައްކަތް ކުރިއަށް ގެންދަނީ ރައީސް އޮފީހާ މަޝްވަރާކޮށްގެން ކަމަށެވެ. އެހެންނަމަވެސް ޓެކްސް ފޮތުގައި ހިމެނޭ ކޮންޓެންޓް ނުވަތަ އޮށްޓަރާއި ގުޅުން ހުރި މަސައްކަތްތައް ކުރާނީ އެ މިނިސްޓްރީން ކަމަށް އޮފިޝަލް ވިދާޅުވިއެވެ. އަދި އެ މާއްދާއާ ގުޅުން ހުރި ބައެއް މަސައްކަތްތައް އެޑިއުކޭޝަން މިނިސްޓްރީން ވެސް ކުރަމުންދާކަން އޭނާ ވަނީ ފާހަގަކުރައްވާފައެވެ. އެހެންނަމަވެސް ޓެކްސްޓް ފޮތުގެ މަސައްކަތް ނިމޭނެ ތާރީހެއް އޭނާ ހާމަނުކުރައްވައެވެ.
ދިރާސީ އައު އަހަރު ފަށާއިރު، ގައުމިއްޔަތު މާއްދާ ވަކި މާއްދާއެއްގެ ގޮތުގައި ކިޔަވައިދޭން ފަށަން ނިންމާފައިވާކަން ހާމަކުރަމުން ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހީމް ވަނީ ދިވެހި ގައުމިއްޔަތު ކިޔަވައިދިނުމަށް ގައުމީ މަންހަޖުގައި ހިމެނުމާއި ގުޅޭގޮތުން، މިނިސްޓްރީ އޮފް އެޑިއުކޭޝަނުން ހުށަހަޅާފައިވާ މައްސަލައިގައި އަމަލުކުރާނެ ގޮތްތަކެއް ސަރުކާރުން ނިންމާފައިވާ ކަމަށް ވިދާޅުވެފައެވެ. އަދި އެ މާއްދާ ކިޔަވައިދޭނީ ދިވެހި ގައުމިއްޔަތުގެ ރުކުންތަކާއި އަގުތަކަށް އިސްކަންދިނުމުގެ ގޮތުން ކަމަށާއި ބޭނުމަކީ ގައުމިއްޔަތަށް ލޯބިކުރާ، އަދި ގައުމިއްޔަތުގެ ބަހާތަކަށް އަހުލުވެރިވެފައިވާ ޖީލެއް ބިނާކުރުން ކަމަށް ނާޒިމް ވިދާޅުވެފައިވެއެވެ.
