ނޭމާ އަށްވުރެ ލަލީގާއަށް މުހިންމީ ރޮނާލްޑޯ އާއި މެސީ: ޖެވިއާ ޓޭބަސް

ސްޕެއިންގެ ބާސެލޯނާއަށް ކުޅެމުން އަންނަ ބްރެޒިލްގެ ތަރި ނޭމާއަށް ވުރެ ރޮނާލްޑޯ އާއި މެސީ، ލަލީގާއަށް މާ މުހިންމު ކަމަށް ސްޕެނިޝް ލަލީގާގެ ރައީސް ޖެވިއާ ޓޭބަސް ބުނެފިއެވެ.

ކުޅިވަރު ހަބަރު ފަތުރާ މީޑީއާއެއް ކަމަށްވާ "މާސާ" އަށް ޓޭބަސް ދެއްވި އިންޓަވިއު އެއްގައި އޭނާ ވިދާޅުވީ، ބާސާގެ ތަރި މެސީ އާއި ރެއާލްގެ ތަރި ރޮނާލްޑޯ ކްލަބް ދޫކޮށް އެހެން ލީގެއްގެ ކްލަބަކަށް ބަދަލުވާނަމަ މާބޮޑަށް ކަންބޮޑު ވާނެ ކަމަށާއި، ނޭމާ އަށްވުރެ އެދެ ކުޅުންތެރިން ލަލީގާއަށް މާ މުހިންމު ކަމަށެވެ.

ޓޭބަސް ވިދާޅުވީ، ނޭމާ ބާސާ ދޫކޮށްލުމުން އެކަމުގެ އަސަރު ކޮންމެވެސް ވަރަކަށް ލަލީގާއަށް ކުރާނެ ކަމަށާއި، ނަމަވެސް އެކަމުގެ ސަބަބުން ބޮޑަށް ގެއްލުންވާނީ ބާސާއަށް ކަމަށެވެ. އޭނާ ވިދާޅުވީ، ބާސާގެ ކުރިއަށް ރޭވިފައިހުރި ބައެއް ޕްލޭން ތަކަށް އަސަރު ކުރާނެ ކަމަށާއި، އެކުލަބުގެ ގޭމް ޕްލޭނަށް އެކަމުގެ ސަބަބުން ބަދަލު ގެންނަން ޖޭހޭނެ ކަމަށް ގަބޫލު ކުރާކަމަށެވެ.

އިތުރަށް ވާހަކަ ދައްކަމުން ޓޭބަސް ވިދާލުވީ، އެއް ނަޒަރަކުން ބަލާނަމަ ނޭމާ ބާސާ ދޫކޮށް ދިއުމުން، އޭނާގެ ހުނަރުވެރި ކުޅުން ލަލީގާގައި ނުފެނުން ވެގެންދާނީ ކޮންމެވެސް ވަރެއްގެ ފަޅު ކަމެއް ކަމަށެވެ. އެގޮތުން އޭނާ ވަނީ، ނޭމާ އަކީ މީގެ ކުރިން ދުނިޔޭގެ މޮޅު ކުޅުންތެރިއާގެ އެވޯޑަށް ވާދަ ކޮށްފައިވާ ކުޅުންތެރިއެއް ކަމަށާއި، އަދި ކެރިއަރުގެ ވަކި ހިސާބަކުން އެންމެ މޮޅު ކުޅުންތެރިއާގެ އެވޯޑް ހާސިލް ކުރެވޭ ފެންވަރުގެ ކުޅުންތެރިއެއްކަން ފާހަގަކޮށްފައެވެ.

ސްޕެނިޝް ފުޓުބޯޅައިގައި މިހާރު އެންމެ ބާރަށް ދެކެވޭ ވާހަކައަކީ، ބްރެޒިލްގެ ތަރި ނޭމާ ބާސެލޯނާ ދޫކޮށް ފްރާންސްގެ ޕީއެސްޖީއަށް ބަދަލުވުމާއި ގާތަށް އައިސްފައިވާ ކަމަށް ބުނާ ވާހަކައެވެ. ރިޕޯޓްތައް ބުނާގޮތުން އެކުލަބުން ވަނީ އޭނާއަށް 222 މިލިއަން ޔޫރޯ ހުށަހަޅާފައެވެ. އަދި އެއްބަސްވުމަކާއި ގާތަށް ވަނީ އާދެވިފައެވެ.