އެފްއޭއެމް އިންތިޚާބުގެ މައްސަލަ ފީފާ އަދި އޭއެފްސީ އަށް!

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބާ ގުޅޭ މައްސަލަ، ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި ސަރަހައްދީ ފުޓުބޯޅަ އިދާރާ (އޭއެފްސީ) އަށް ހުށަހަޅައިފި އެވެ.

އިންތިޚާބުގެ މައްސަލަ ފީފާ އަދި އޭއެފްސީ އަށް ހުށަހެޅީ، ޤައުމީ ޓީމުގެ ކުރީގެ ފޯވާޑް އަދި އެފްއޭއެމްގެ ކުރީގެ ރައީސް، އަޙުމަދު ޠާރިޤް (ޓޮމް) އެވެ. ޓޮމްގެ ފަރާތުން މައްސަލަ ހުށަހެޅީ އޭނާގެ ކެންޑިޑެންސީގެ ޝަރުތު ފުރިހަމަ ނުވާ ކަމަށް، އެފްއޭއެމްގެ އިލެކްޓޯރިއަލް ކޮމެޓީން ނިންމާފައި ވަނިކޮށެވެ. ފީފާ އަދި އޭއެފްސީ އަށް މައްސަލަ ހުށަހެޅުމުގެ ކުރިން، ޓޮމް ވަނީ އެ މައްސަލަ އިސްތިއުނާފަށް ވެސް ހުށަހަޅައިފަ އެވެ. ނަމަވެސް އެފްއޭއެމްގައި އެޕީލް ކޮމެޓީއެއް ނެތް ކަން ވެސް ވަނީ ފެންމަތިވެފަ އެވެ.

ޓޮމްގެ ފަރާތުން ފީފާ އަދި އޭއެފްސީ އަށް ހުށަހެޅި މައްސަލައިގައި ބުނެފައި ވަނީ، އިންތިޚާބަށް ހުޅުވާލި ފުރުސަތުގައި އެފްއޭއެމްގެ 18 މެންބަރު ކުލަބުގެ ތެރެއިން، ނުވަ ކުލަބުގެ ތާއީދާއެކު ހުށަހެޅި ކެންޑިޑެންސީ ބާތިލްކޮށްފައިވާ ކަމަށެވެ. އެއީ ކުލަބުގެ ވެލެންސިޔާގެ ތާއީދު ދެ ސިޓީ ވެސް ޞައްޙަ ކަމަށް ނިންމާ، ފީފާގެ އަސާސީ ގަވާއިދުގެ މާއްދާއަކަށް ރިއާޔަތްކޮށް ކަމަށް ބުނެފައިވެ އެވެ. ހަމައެއާއެކު، އެފްއޭއެމްގެ އިންތިޚާބީ ގަވާއިދުގެ 12 ވަނަ މާއްދާގައި ބުނާ އިލެކްޓޯރަލް އެޕީލް ކޮމިޓީ ކޮންގްރެސްގައި ނިންމާފައި ނެތްކަމަށާއި، ޓޮމްގެ ފަރާތުން ޖަނަވަނީ މަހުގެ 12 ވަނަ ދުވަހު މައްސަލަ އިސްތިއުނާފު ކޮށްފައިވާނެ ކަމަށް ވެސް ބުނެފައިވެ އެވެ.

އެ މައްސަލައިގައި ހޯމަ ދުވަހުބެ ނިޔަލަށް ގޮތެއް ނިންމަން ޖެހޭއިރު، ކޮމެޓީ ނެތުމުން މިހާތަނަށް ޖަލްސާއެއް ބާއްވާފައި ނުވާ ކަމަށް ފާހަގަކޮށްފައިވެ އެވެ. އެފްއޭއެމް އިލެކްޓޯރަލް ކޯޑްގެ ހަތަރު ވަނަ މާއްދާގައި ބުނަނީ އިލެކްޓޯރަލް ކޮމިޓީގެ މެންބަރުން ޖެހިޖެހިގެން ދެ ދައުރަށް އިންތިޚާބުކޮށްގެން ނުވާނެކަމަށެވެ. ނަމަވެސް އިލެކްޓޯރަލް ކޮމިޓީ އިތުރު ދައުރަކަށް 2023 ވަނަ އަހަރު އޮތް ކޮންގްރެސްގައި އިންތިޚާބުކޮށްފައިވާކަން ޓޮމްގެ މައްސަލައިގައި ވަނީ ބުނެފަ އެވެ. އިލެކްޓޯރަލް ކޮމިޓީގެ ޗެއާ އަބްދުﷲ އަލީ ޖެހިޖެހިގެން ތިން ދައުރު ގަވާދާއި ޚިލާފަށް މެންބަރުކަން ކޮށްފައިވާ ކަމަށާއި، ވައިސް ޗެއާ އަހްމީމް އަބްދުއްރައްޒާޤް އަދި އަބްދުﷲ އަލީ ދެ ވަނަ ދައުރަކަށް އިލެކްޓޯރަލް ކޯޑާއި ޚިލާފަށް ކޮންގްރެސްއިން އިންތިޚާބުކޮށްފައިވާކަން ވެސް ވަނީ ފާހަގަކޮށްފަ އެވެ. އެހެންކަމުން، އެފްއޭއެމްގެ އަސާސީ ޤަވާއިދާއި، އިންތިޚާބީ ޤަވާއިދާ ޚިލާފް ކޮމިޓީއަކުން އިންތިޚާބާ ބެހޭ އެއްވެސް ކަމެއް ކުރިއަށް ނުގެންދެވޭނެ ކަމަށް ބަޔާންކޮށް ފީފާ އަދި އޭއެފްސީއަށް މައްސަލަ ހުށަހަޅާ ކަމަށް ވެސް ބުނެފައިވެ އެވެ.

އެފްއޭއެމްގެ އިލެކްޓޯރިއަލް ކޮމެޓީން މިދިޔަ ބުދަ ދުވަހު ނިންމީ، އެފްއޭއެމްގެ ރައީސްކަން ވެސް ކުރިން ކުރައްވާފައިވާ ޓޮމްގެ ޝަރުތު ހަމަނުވާ ކަމަށެވެ. އެއީ އޭނާ އަތުގައި އޮތް ކުލަބު ވެލެންސިއާގެ ތާއީދު ސިޓީ ބާތިލް ކަމަށް ނިންމުމުންނެވެ. އިލެކްޓޯރިއަލް ކޮމެޓީން އެހެން ނިންމީ، ވެލެންސިއާގެ ތާއީދު ސިޓީ ދެ ކެންޑިޑޭޓުންގެ އަތުގައި ވެސް އޮތުމުންނެވެ. ޓޮމްގެ އިތުރުން އިންތިޚާބުގައި ވާދަކުރެއްވުމަށް ފޯމް ހުށަހެޅުއްވި ކުލަބު އީގަލްސްގެ ވައިސް ޗެއާމަން, މުފާވިޒް ޙާޝިމް (މުފާ) އަތުގައި ވެސް ވެލެންސިއާގެ ތާއީދު ސިޓީ އޮތެވެ. އިލެކްޓޯރިއަލް ކޮމެޓީން ނިންމީ، ވެލެންސިއާ އިން ދީފައިވާ ދެ ސިޓީ އަކީ ވެސް ޞައްޙަ ދެ ސިޓީ ކަމަށެވެ. އެހެން ނަމަވެސް، އެއް ކުލަބަކަށް ދެ ކެންޑިޑޭޓުންނަށް ތާއީދު ސިޓީ ނުދެވޭތީ، ކޮމެޓީން ނިންމީ ވެލެންސިއާގެ ދެ ސިޓީ ވެސް ބަލައިނުގަތުމަށެވެ.

އެހެން ނިންމުމުން، ޓޮމް އަތުގައި އޮތީ ފުރަތަމަ ޑިވިޝަންގެ ދެ ކުލަބުގެ ތާއީދު ސިޓީ އެވެ. ނަމަވެސް، މުފާ އަތުގައި ފަސް ކުލަބެއްގެ ތާއީދު ސިޓީ އޮތެވެ.