އެމްޑީޕީ ސަރުކާރުގައި ރައްޔިތުންނަށް ދިން ގޯތިތައް ސަރުކާރަށް އެގޮތަށް ހިފަހައްޓައިގެން ނުތިބެވޭނެކަމުގެ މެސެޖު ރައްޔިތުންގެ މަޖިލީހުގެ އިންތިޚާބުގައި ދޭންޖެހޭ
އިންތިޚާބީ މޭޔަރ އާދަމް އާޒިމް
އެމްޑީޕީ ސަރުކާރުން މާލޭގެ ރައްޔިތުންނަށް ދިން ގޯތިތައް ކަށަވަރުކުރުމަށް ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި މަޖިލީހުގެ ގޮނޑިތައް އެމްޑީޕީއަށް ދިނުމަށް ރައްޔިތުންގެ ކިބައިން އިންތިޚާބީ މޭޔަރ އާދަމް އާޒިމް އެދިވަޑައިގެންފިއެވެ.
އެމްޑީޕީގެ ޓިކެޓްގައި ނިކުމެވަޑައިގެންނެވި އާދަމް އާޒިމް މޭޔަރކަމުގެ ގޮނޑި ކާމިޔާބުކުރެއްވުމާއި ގުޅިގެން މާލޭގެ ރައްޔިތުންނަށް ޝުކުރު އަދާކުރުމަށް އެމްޑީޕީން ސަލްޓަންޕާކުގައި ބޭއްވި ޖަލްސާގައި ވާހަކަދައްކަވަމުން އާޒިމް ވިދާޅުވީ މޭޔަރ ކަމުގެ ގޮނޑި ކާމިޔާބުވުމުން އެހިސާބުން އަދި ނުފުދޭކަމަށެވެ. މިހާރު މިއޮތް ސަރުކާރަކީ ރައްޔިތުންގެ އަޑުއަހާ ސަރުކާރެއް ނޫންކަމަށާއި އެހެންކަމުން ރައްޔިތުން ބޭނުންވާ ގޮތަށް ކަންކަން ވުމަށް ކުރިޔަށް އޮތް މަޖިލީހުގެ އިންތިޚާބު އެމްޑީޕީއަށް ކާމިޔާބުވުން ވަރަށް މުހިންމުކަމަށް އާޒިމް ވިދާޅުވިއެވެ.
އާޒިމް ވިދާޅުވީ އެމްޑީޕީ ސަރުކާރުގައި ރައްޔިތުންނަށް ދިން ގޯތިތައް ސަރުކާރަށް އެގޮތަށް ހިފަހައްޓައިގެން ނުތިބެވޭނެކަމުގެ މެސެޖު ރައްޔިތުންގެ މަޖިލީހުގެ އިންތިޚާބުގައި ދޭންޖެހޭކަމަށެވެ.
އާޒިމް ވިދާޅުވީ މިހާރު ހިނގަމުންދާ މަޖިލީހުގައި ގޮނޑިތައް އެމްޑީޕީއަށް ދިނުމުންވެސް ރައްޔިތުންނަށް ފައިދާވިކަމަށެވެ. ބައެއް މީހުން ފައިދާ ނުވާކަމަށް ބުނާކަމަށާއި ނަމަވެސް ވަކިވަކި ފަރުދަކަށް ފައިދާ ނުވިނަމަވެސް މުޅި ރައްޔިތުންނަށް ފައިދާވިކަމަށް އާޒިމް ވިދާޅުވިއެވެ.
އެގޮތުން މާލޭގައި އުޅޭ ރައްޔިތުންނަށް ގޯތި ލިބިގެންދިޔައީ މަޖިލީހުގެ މެޖޯރިޓީ އެމްޑީޕީއަށް އޮތުމުންކަމަށާއި ރައީސަށް އެކަން ކުރަން ފަސޭހަފުޅުވީ އެހެންވެގެންކަމަށް އާޒިމް ވިދާޅުވިއެވެ.
އެހެންކަމުން ކުރިޔަށްއޮތް ރައްޔިތުންގެ މަޖިލީހުގެ އިންތިޚާބު އެމްޑީޕީއަށް ކާމިޔާބުވުމަކީ މުހިންމުކަމެއްކަމަށް އާޒިމް ވިދާޅުވިއެވެ.
އާޒިމް ވަނީ އެމްޑީޕީ ސަރުކާރުން ގޯއްޗާއި ފްލެޓް ދިނުމަށް ކަނޑައަޅާފައިވާ ތަންތަނުން މިސަރުކާރުން ގޯއްޗާއި ފްލެޓް ދިނުމަށް ގޮވާލައްވާފައެވެ. އަދި އެކަން އެމަގުން ކުރުމަށް ކުރެވެން ހުރިހުރިހާ މަސައްކަތެއް ކުރައްވާނެކަމަށް އާޒިމް ވިދާޅުވިއެވެ.
