އިޓާލިއަން ލީގުގައި ސެލަނިޓާނާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ނަޕޯލީން ލީގުގެ ހަތަރެއްގެ އުންމީދު ހިފަހައްޓައިފި އެވެ.

ލީގުގައި ހޮނިހިރު ދުވަހުގެ ރޭ ނަޕޯލީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ސެލަނިޓާނާ އިންނެވެ. ނަމަވެސް ނަޕޯލީން ވަނީ ފަހަތުން އަރައި ދެ ލަނޑު ޖަހައިގެން މެޗު ކާމިޔާބު ކޮށްފަ އެވެ.

މެޗު ފަށައިގެން ފުރަތަމަ 29 ވަނަ މިނެޓުގައި ސެލަނިޓާނާ އިން ލީޑު ނެގި އެވެ. ޑޮމަގޯ ބްރަޑަރިކް ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ އެންޓޯނިއޯ ކަންޑްރެވާ އެވެ. ފުރަތަމަ ހާފުގެ އިތުރު ވަގުތުގައި ނަޕޯލީން ވަނީ ލަނޑު ޖަހައި، ނަތީޖާ ހަމަހަމަ ކޮށްފަ އެވެ. އެ ޓީމަށް ލިބުނު ޕެނަލްޓީއެއް ކާމިޔާބުކޮށް، ނަތީޖާ ހަމަހަމަ ކޮށްދިނީ މަތެއޯ ޕޮލިޓާނޯ އެވެ. އޭގެ ފަހުން މެޗުގައި ލަނޑު ޖެހުމަށް ނަޕޯލީން ކުރި މަސައްކަތް ކާމިޔާބުވީ، މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގަ އެވެ. މެޗުން އެ ޓީމަށް ތިން ޕޮއިންޓު ކަށަވަރުކޮށްދިނީ އާމިރު ރަހްމާނީ އެވެ.

މޮޅާއެކު ނަޕޯލީ އޮތީ ލީގު ތާވަލްގެ ހަ ވަނައިގަ އެވެ. އެއީ މިހާތަނަށް ކުޅުނު 20 މެޗުން 31 ޕޮއިންޓު ހޯދައިގެންނެވެ. ނަޕޯލީ އަށްވުރެ އެއް މެޗު މަދު ކުޅެގެން ފަސް ވަނައިގައި ބޮލޮގްނާ އަށް ލިބެނީ 32 ޕޮއިންޓެވެ. ހަތަރު ވަނައިގައި އޮތް ފިއޮރެންޓީނާ އާއި ނަޕޯލީއާ ދެމެދު އޮތީ ދެ ޕޮއިންޓުގެ ފަރަގެކެވެ. ނަމަވެސް އެ ޓީމު ވަނީ ނަޕޯލީ އަށްވުރެ އެއް މެޗު މަދުން ކުޅެގެންނެވެ.