ވިއްސާރައާ ގުޅިގެން މާލޭގެ މަގުތަކުގައި ހެދިފައިވާ ފެން ހިންދާ އާންމު ހާލަތަކަށް ގެނެސްފި
176 ގެއެއްގައި ވެލިބަސްތާ ޖަހައި އެހީތެރިކަން ފޯރުކޮށްދީފައިވޭ
މާލޭގެ މަގުތަކުން ފެން ހިންދުމުގެ މަސައްކަތްކުރަނީ
މާލެއަށް ބޯކޮށް ވާރޭ ވެހި ފެންބޮޑުވުމުމުގެ ސަބަބުން އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ފެންހިންދުމުގެ މަސައްކަތް ކުރަމުންދިޔަ ސަރަހައްދުތައް އާންމު ހާލަތަކަށް ގެނެސްފައިވާކަމަށް އެމްއެންޑީއެފުން ބުނެފިއެވެ.
ހުކުރު ދުވަހު ހެނދުނުން ފެށިގެން މާލެ އަށާއި އަތޮޅުތަކަށް ވަނީ ބޯކޮށް ވާރޭވެހި ފެން ބޮޑުވެފައެވެ. މާލެއަށް ބޯކޮށް ވާރޭވެހި، ގޭގެއަށް ފެން ވަންނަމުންދާތީ އެމްއެންޑީއެފް މާލެ އޭރިއާ ކޮމާންޑުން ވަނީ 176 ގެއެއްގައި ވެލިބަސްތާ ޖަހައި އެހީތެރިކަން ފޯރުކޮށްދީފައެވެ. އަދި 27،449 ޓަނުގެ ފެން ވަނީ ޕަންޕު ބޭނުންކޮށްގެން ހިންދާފައިކަމަށް އެމްއެންޑީއެފުން ބުނެއެވެ. މި މަސައްކަތުގައި 8 ސަރަހައްދެއްގައި 23 ޕަންޕު ބޭނުންކޮށްފައިވެއެވެ. މާލެ އާންމު ހާލަތަކަށް ގެނެސްފައިވަނީ ފަތިހު ފަހެއް ޖަހާކަން ހާއިރުއެވެ.
މާލެ އާއި އަތޮޅުތަކަށް ކުރި ވިއްސާރާގައި ފެން ބޮޑުވުމުގެ ސަބަބުން މާލޭގެ 144 ގެއަކުން ގުޅާ އެހީތެރިކަމަށް އެދުނުކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)ން ބުނެއެވެ. އަދި 8 ގެޔެއްގެ 57 މީހުންނަށް ވަގުތީ ބޯހިޔާވަހިކަމާއި ކެއިން ބުއިން ހަމަޖައްސައިދީފައިވާކަމަށް އެންޑީއެމްއޭއިން ބުނެއެވެ. މީގެއިތުރުން 4 ރަށެއްގައި ފެންބޮޑުވެގެން ރިޕޯޓުކޮށްފައިވާކަމަށާއި އެއީ ތ. ގުރައިދޫ، ތ. ދިޔަމިގިލި، ލ. މާމެންދޫ އަދި ދ ކުޑަހުވަދޫކަމަށް އެންޑީއެމްއޭއިން ބުނެއެވެ.
މިފަހުން ކުރަމުންދާ ވިއްސާރާގައި މާލޭގައި އަންނަނީ ވަރަށް ބޮޑަށް ފެން ބޮޑުވެ ގެތަކަށް ފެންވަދެ އާންމު ދިރިއުޅުމަށް އެކަމުގެ އަސަރުކުރަމުންނެވެ.
